52-sonli maktabda “Kitob – qalb quyoshi” nomli maʼnaviy-maʼrifiy tadbir oʻtkazildi

Insonlarning maʼnaviy dunyosini boyitish, Vatanga muhabbat va sadoqat tuygʻularini yuksaltirishda kitoblarning oʻrni beqiyos. Tumanimizda kitobxonlikka qaratilayotgan eʼtibor, yoshlarning kitobga mehrini oshirish borasidagi saʼy-harakatlar keng koʻlamda olib borilmoqda.

Shu jumladan, Amudaryo tumanining Namuna mahallasidagi 52-sonli umumiy oʻrta taʼlim maktabida ham oʻquvchi yoshlar oʻrtasida kitobxonlikni keng targʻib qilishga bagʻishlangan tadbirlar, davra suhbatlari oʻtkazilib kelinmoqda.

Ushbu maktabda bugungi kunda 391 nafar oʻquvchiga 41 nafar malakali oʻz kasbining yetuk mutaxassislari boʻlgan oʻqituvchilar taʼlim-tarbiya berib kelishmoqda.

Maktab direktori Qodirbergan Eshchonov maktab jamoasiga rahbarlik qilib, taʼlim-tarbiya ishlarini doimiy nazoratga olgan holda oʻz faoliyatini olib bormoqda.

Maktabda tashkil etilgan moʻjazgina kutubxonada oʻquvchilarning saviyasini boyitishga, dunyoqarashini kengaytirishga va maʼnaviyatini yuksaltirishga xizmat qiluvchi badiiy va ilmiy kitoblar koʻplab topiladi. Har yili kutubxonaga oʻzbek va jahon adabiyotining yetuk namoyondalari tarafidan yozilgan durdona asarlar va ilmiy adabiyotlar olib kelinib boyitib boriladi.

Shuningdek, maktabda doimiy ravishda turli xil sport musobaqalari, madaniy-maʼrifiy tadbirlar oʻtkazilib kelinadi.

15-aprel kuni maktabda “Kitobxonlik madaniyatini yuksaltirish− buyuk maqsadlarimizga erishishning muhim kafolatidir” shiori ostida “Kitob- qalb quyoshi” nomli tadbir oʻtkazildi. Tadbirda maktab oʻquvchilari oʻzlarining bor bilim va isteʼdodlarini namoyish etib faol ishtirok etishdi.

Badiiy kechada soʻzga chiqqanlar mamlakatimizda kitobxonlikka qaratilayotgan eʼtibor, yoshlarning kitobga mehrini oshirish borasidagi saʼy-harakatlarga toʻxtalib, bunga yoshlarimiz ham munosib javob berayotganliklarini, bunyod etilayotgan maʼrifat oʻchoqlari – kutubxonalar aholi maʼnaviy olamini yanada boyitishga, farzandlarimizni ezgu gʻoyalar asosida, kitobga mehrli etib tarbiyalashda yaqindan koʻmak berishini eʼtirof etishdi.

Badiiy kechada ishtirok etgan oʻquvchilar kitob haqida sheʼrlar aytishdi. Uning inson kamoloti, dunyoqarashini rivojlantirishdagi oʻrnini badiiy va taʼsirli soʻzlar bilan ifodalab berishdi. Shuningdek, oʻquvchilar oʻzbek mumtoz qoʻshiqlariga, taniqli xonandalar tomonidan qoʻshiq qilib ijro etilgan gʻazal kuylariga raqsga tushdilar.

Badiiy asarlardan olingan parchalarni sahna koʻrinishlari orqali gavdalantirib berdilar. Tadbir yakunida yoshlarni mantiqiy fikrlashga undovchi, qiziqarli savol-javoblar boʻlib oʻtdi.

Ushbu tadbirni tashkil etishda maktabning ijodiy-madaniy masalalar boʻyicha targʻibotchisi Gulmirza Bobojonov, maktab direktorining maʼnaviy va maʼrifiy ishlar boʻyicha oʻrinbosari Zarifboy Eshniyozov, oʻzbek tili va adabiyoti fani oʻqituvchisi Sevara Eshchonova va boshqa pedagog hodimlarning xizmatlari katta boʻldi.

Shuni aytib oʻtish kerakki, maktablarda tashkil etilayotgan kitobxonlik tadbirlari oʻquvchilarning qalbida kitobga boʻlgan mehr-muhabbatning yanada yuksalishida muhim ahamiyat kasb etadi.

Ota-bobolarimiz kitobni bekorga bilim manbai, tafakkur oʻchogʻi, aql chirogʻi, koʻngil tabibi, ruhiyat ozigʻi deb aytishmagan. bekorga

Shunday ekan, aziz yoshlar, oʻtayotgan har bir kunimizni gʻanimat bilib bilim olish, dunyoqarashimizni boyitish payida boʻlaylik!

Shahlo Sabirova, Berdaq nomidagi QDUning jurnalistika fakulʼteti 2-kurs talabasi.