AMUDARYoLIK PILLAKORLAR 254 TONNA YuQORI SIFATLI PILLA XOM AShYoSI TAYYoRLAShNI REJALAShTIRMOQDALAR

Pillachilikni xalqimiz yetti xazinaning biri sifatida eʼtirof etishadi. Chunki pilla xom ashyosini qayta ishlash sanoati korxonalari uni inson ehtiyojlari uchun eng zarur va foydali mahsulotlarga – mudofaa sanoati uchun muhim vositalarga, kiyim-kechak, chorva uchun vitaminlarga boy ozuqa, hatto qishloq xoʻjaligida qimmatli oʻgʻitga aylantiradilar. Qisqasi, pilla xom ayoshsini qayta ishlash orqali olinadigan mahsulotlarning son-sanogʻi yoʻq. Shu bois, mamlakatimizda pillachilik sohasini jadal rivojlantirishga alohida eʼtibor qaratiladi. Ayni kunlarda oʻz sohasining bilimdonlari boʻlgan soha mutaxassislari va pillakorlar 2023-yilgi “kumush tola” xirmonini bunyod etishni boshlab yubordilar.

Amudaryo tumanida ham agrar tizimning muhim tarmogʻi boʻlgan pillachilikka alohida eʼtibor qaratiladi. Soha rivojida muhim ahamiyat kasb etadigan omillardan biri – sifatli va samarador ipak qurti urugʻini tanlash hamda belgilangan muddatlarda jonlantirishdir.

Soha mutaxassislari tomonidan 2023-yil bahorgi pillachilik mavsumini muvaffaqiyatli oʻtkazish maqsadida ipak qurtini jonlantirishga alohida eʼtibor qaratilib, “Jayxun silk” MChJ pillani qayta ishlash korxonasi agronomlari tumanning 16 ta hududida tashkil etilgan inkubatoriyalarga birkitildi.

Xonadonlar sharoitida ipak qurti parvarishlab, yillar davomida sifatli pilla hosili yetishtirib kelayotgan 1845 nafar tajribali kasanachi-pillakorlarning qurtxonalari ipak qurtini parvarishlash mavsumiga oldindan tayyorlab qoʻyildi. Qurtxonalar sifatli oqlanib, zooveterinariya qoidalariga muvofiq obodonlashtirildi.

Joriy yilning 7-aprel sanasida “Andijan Guantong” xususiy korxonasidan 4000 quti, “Turtkul Silkworm Pro” masʼuliyati cheklangan jamiyati korxonasidan 1718 quti ipak qurti urugʻi olib kelinib, inkubatoriyalarga qoʻyildi va 18-19-aprel kunlari sifatli jonlantirilgan ipak qurti urugʻi kasanachi va pudratchi pillakorlarga tarqatildi.

Joriy yilgi pillachilik mavsumida “Jayxun silk” masʼuliyati cheklangan jamiyati pillani qayta ishlash korxonasi tomonidan 254 tonna yuqori sifatli pilla xom ashyosini tayyorlash rejalashtirilgan boʻlib, 1845 nafar kasanachi pillakorlar bilan kasanachilik shartnomalari tuzilgan. Unga koʻra, har bir kasanachining ipak qurtini parvarishlash mavsumi davomida amalga oshirishi talab etiladigan vazifalari aniq belgilab berilib, hududlarga birkitilgan pillachilik agronomlari tomonidan zarur tushuntirish ishlari olib borildi.

Tumandagi mavjud tutzorlar vaqtida oziqlantirilib, tut bargi yetishmovchiligi bilan bogʻliq muammolar kelib chiqishining oldi olindi. Ipak qurtlariga dasta qoʻyish jarayoni boshlangunga qadar ipak qurtlari zooveterinariya qoidalariga muvofiq oziqlantirib borildi. Natijada butun tuman boʻyicha barcha kasanachilar qaramogʻidagi ipak qurtlari yoppasiga sifatli pilla oʻrashga kirishdi.

Ilgʻor va tajribali pillakorlar oʻzlari yetishtirgan hosilni pillani qabul qilish punktlariga topshirishni boshlab yubordilar. Joriy yilning 24-may holatiga amudaryolik “kumush tola” ijodkorlari yaratgan xirmon 14451 kilogrammdan oshdi. Pillakorlarning shijoatidan ayonki, yana bir necha kundan soʻng Amudaryoning 254 tonnalik yuksak pilla xirmoni bunyod etilishiga hech shak-shubha yoʻq.

Robiya YOʻLDOShEVA.