10-sonli maktabda “Nihol” toʻgaragi aʼzolari ishtirokida tadbir boʻlib oʻtdi

Maʼlumki, umumiy oʻrta taʼlim muassasalarida asosiy dars mashgʻulotlaridan soʻng oʻquvchilarning boʻsh vaqtlarini mazmunli tashkil etish maqsadida toʻgaraklar tashkil etilgan. Darsdan tashqari oʻquv mashgʻulotlari oʻquvchilarning bilimini mustahkamlashga, toʻgarak tashkil etilgan fanni yanada chuqur oʻzlashtirishga yordam beradi.

Amudaryo tumani Maktabgacha va maktab taʼlimi boʻlimiga qarashli 10-sonli umumtaʼlim maktabida “Nihol” toʻgaragi aʼzolari ishtirokida “Tafakkur javohiri” nomli tadbir tashkil etildi. Toʻgarak rahbari Rayhon Palvonova tashabbusi bilan oʻtkazilgan mazkur tadbirda 5-, 7- sinf oʻquvchilari faol ishtirok etishdi.

Tadbir toʻgarak aʼzolari ijrosidagi “Barkamol avlod” qoʻshigʻi bilan boshlandi. Shundan soʻng, 5-“A” sinf oʻquvchilari tomoshabinlarga kitob haqida yod olgan sheʼrlarini oʻqib eshittirdilar. Ayniqsa, toʻgarak aʼzolari tomonidan sahnalashtirilgan “Bolaga kitob bering!” sahna koʻrinishi yigʻilganlarda katta taassurot qoldirdi.

Shundan soʻng, 5-“B” sinf oʻquvchilari badiiy asarlar haqida yozilgan goʻzal sheʼrlarini aytib oʻquvchilarni kitobxon boʻlishga, boʻsh vaqtini bekorga oʻtkazmaslikka chorladilar. Toʻgarak aʼzolari tomonidan ijro etilgan “Fargʻonacha raqs” barchaga oʻzgacha xush kayfiyat va koʻtarinki ruh baxsh etdi.

Tadbirda kitobxonlikni keng targʻib qilish maqsadida ijro etilgan har bir sahna koʻrinish oʻquvchilarga olam-olam tassurot bagʻishladi.  

Tadbir yakunida oʻquvchilar ona vatanni, tinchlikni, doʻstlikni tarannum etuvchi “Yashna, Oʻzbekiston!” qoʻshigʻini ijro etishib, raqsga tushdilar.

Shu oʻrinda aytish kerakki, oʻquvchilar toʻgarakda faqatgina adabiyot namoyondolarining ijod mahsullaridan bahra olmasdan, milliy urf-odatlarimiz, qadimiy kuy-qoʻshiqlarimiz, xalq oʻyinlari, lapar va aytishuvlardan ham namunalar yod olishadi.

Toʻgarak rahbari Rayhon Palvonova toʻgarakning har bir aʼzosi bilan alohida shugʻullanib, darsdan boʻsh paytlarida turli tadbir va bellashuvlar tashkil etib, ularning boʻsh vaqti mazmunli tashkil etilishiga katta hissa qoʻshib kelmoqda.

Sinfdan tashqari mashgʻulotlarning asosiy maqsadi – dastur va darsliklardan tashqari oʻquvchilarni qoʻshimcha bilim, koʻnikma va malakalarini oshishiga hamda ularning fan sohasidagi bilimlarini chuqurlashtirishga va kasb tanlashlariga yordam berishga qaratilgan.

Ayniqsa, adabiyot fani toʻgaraklari oʻquvchilarning nutqnini rivojlantirishga, mustaqil fikrlashga oʻrgatib, tengdoshlari bilan doʻstona munosabatlarini mustahkamlashga xizmat qiladi. Shuningdek, toʻgaraklar taʼlimdagi samaradorlikni oshirishga fanlarni chuqur oʻzlashtirshga, pedagogning mahorati oʻsishiga ham yordam beradi.

10-sonli maktabada “Nihol” toʻgaragi aʼzolari ishtirokida tashkil etilgan ushbu toʻgarak ham ayni shu maqsadlarni amalga oshirishga qaratilgani bilan yanada ahamiyatdi boʻldi.

Tuman hokimligining Axborot xizmati.