QANGLI OVULIDA ChEGARASIZ ShIFOKORLAR TAShKILOTI XODIMLARI IShTIROKIDA ChEKIShNING ZARARI XUSUSIDA TADBIR OʻTKAZILDI

Tamaki chekish – jamiki zararli odatlar ichida eng koʻp tarqalgan odatdir. Insonning zamonaviy hayot tarzida kashandalik koʻpgina surunkali kasalliklarni keltirib chiqaruvchi ish qobiliyatini pasaytiruvchi, nogironlik va oʻlimning yosharib borayotganligiga sabab boʻluvchi xavfli omillarning asosiylaridan biri boʻlib bormoqda. Bugunjahon Sogʻliqni saqlash tashkilotining bayonnomalariga asosan, jahonda bir yil davomida 5 mln.dan ortiq kishi tamaki chekish bilan bogʻliq boʻlgan kasalliklar tufayli hayotdan koʻz yumadi. Chekuvchining umri chekmaydiganlarga qaraganda, kuniga 1 dona sigaret chekkanida ham oʻrtaga 5-8-yilga qisqarishini olimlar isbotlashgan. Sutkasiga 2 pachka sigaret chekuvchi kashandalarda umrining qisqarishi 10-yildan ziyodni tashkil etadi. Ayniqsa, nafas olish, yurak-qon tomir tizimlari va saraton kasalligining kelib chiqishiga sabab boʻladi.

Bu kabi insoniyat sogʻligiga xavf tugʻdiruvchi kasalliklarning kelib chiqishining oldini olish maqsadida Jahon Sogʻliqni saqlash tashkiloti tashabbusi bilan 1988-yildan eʼtiboran 31-may – “Butunjahon chekishga qarshi kurashish kuni” sifatida dunyo miqyosida keng nishonlanib kelinadi.

Har yili Amudaryo tumani Tibbiyot birlashmasi huzuridagi Aholining sogʻlom turmush tarzini qoʻllab-quvvatlash va jismoniy faolligini oshirish boʻlimi tomonidan jamoat va davlat tashkilotlari bilan hamkorlikda “Butunjahon chekishga qarshi kurashish kuni” munosabati bilan aholi keng qatlamlari orasida targʻibot-tashviqot tadbirlari oʻtkaziladi. Ana shunday tadbirlardan biri joriy yilning 31-may kuni Qangli ovulida ham boʻlib oʻtdi.

Tadbirda Aholi sogʻlom turmush tarzini qoʻllab-quvvatlash va jismoniy faolligini oshirish boʻlimi mutaxassislari Matyoqub Ernazarov, Tamara Saidova, ftiziatriya boʻlimi mudiri Gulora Abdullayeva, TTB OIV/OITS laboratoriyasi shifokori X.Ermatovalar chekishning zararli oqibatlari, bu zararli odatdan voz kechishning samarali usullari haqida zarur tushuncha va tavsiyalar berdilar.

Tadbir davomida ayni paytda tumanimizda boʻlib turgan Chegarasiz shifokorlar tashkiloti shifokori Pokiston Respublikasidan kelgan Janob Doktor Husayn hamda mazkur tashkilot xodimi P.Permanovlar Qangli ovuli aholisi bilan chekishni tashlashning inson sogʻligi uchun foydalari, sogʻlom turmush tarzi umummilliy dasturi, sil, OIV/OITS kasalliklari profilaktikasi toʻgʻrisida ochiq va samimiy suhbat oʻtkazib, ularni qiziqtirgan savollar yuzasidan keng tushuncha va tavsiyalar berdilar.

Shuningdek, janob Doktor Husayn chekishga qarshi kurashishning global maqsadi hozirgi va kelgusi avlodni tamakining nafaqat sogʻlik uchun salbiy jihatlaridan, balki ijtimoiy, ekologik va iqtisodiy talofatlarning vayronkor oqibatlaridan himoya qilishga qaratilgani, millionlab gektar yerda tamaki plantantsiyalarini yaratish uchun oʻrmonlar kesilib, dunyo ekotizimiga zarar yetayotganini taʼkidladi va barchani bu zararli odatga qarshi jipslashib kurashishga chaqirdi.

Robiya YOʻLDOShEVA.