Tuman hokimining qipchoqlik yoshlar bilan uchrashuvi ochiq muloqot tarzida boʻlib oʻtdi

8-iyun kuni Qipchoq ovul fuqarolar yigʻini binosida tuman hokimining Qipchoq ovul fuqarolar yigʻini va Qipchoq shaharcha fuqarolar yigʻini hududida istiqomat qiluvchi yoshlar bilan uchrashuvi boʻlib oʻtdi.

Uchrashuvda tuman hokimi Sultonboy Yoʻldashev, tuman Xalq qabulxonasi boʻlimi mudiri Erkin Rajabov, tuman hokimi oʻrinbosari Mahmud Shermetov, Yoshlar ishlari agentligi tuman boʻlimi boshligʻi Sardor Ismailov hamda faol yoshlar ishtirok etishdi.

Uchrashuvda tuman hokimi Sultonboy Yoʻldashev tarixan qisqa davrda Oʻzbekiston yoshlari erishgan muvaffaqiyat va yutuqlar zamirida davlatimiz tomonidan koʻrsatilayotgan katta gʻamxoʻrlik va yuksak eʼtibor mujassam ekanligini taʼkidladi.

Shuningdek, “Iyun oyi – yoshlar oyligi” doirasida yoshlar manfaatiga xizmat qiluvchi koʻplab yirik amaliy loyihalar, turli xil intellektual tanlovlar, seminar va uchrashuvlar, biznes-marafonlar, sport musobaqalari hamda gala kontsertlar oʻtkazish rejalashtirilganini aytib oʻtdi.

Samimiy va ochiq muloqot tarzida boʻlib oʻtgan uchrashuvda yoshlarning biznes gʻoyalari, tashabbuslari tinglandi va qoʻllab-quvvatlandi. Tadbirkorlik qilish istagidagi yoshlardan ayrimlari tuman hokimiga murojaat qildi.

Jumladan, Qipchoq ovul fuqarolar yigʻini hududida istiqomat qiluvchi Feruza Sabirova oʻz tadbirkorlik faoliyatini tikuvchilik yoʻnalishi boʻyicha boshlash niyati borligini va subsidiya asosida tikuv mashinasi olish istagi borligini aytib murojaat qilgan boʻlsa, yana bir boʻlgʻusi tadbirkor Sanobar Matkarimova oʻz mahallasi hududida goʻzallik saloni ochish niyati borligini bildirib zaruriy jihozlar uchun subsidiya ajratilishida amaliy yordam soʻradi.

Undan tashqari, mahallada istiqomat qiluvchi ijtimoiy himoyaga muhtoj yoshlardan birining onasi Ozoda Safarbayeva ham farzandining operatsiyasi uchun amaliy yordam soʻrab murojaat qildi.

Tuman hokimi Qipchoq ovuli yoshlari tomonidan kelib tushgan hech bir murojaat eʼtibordan chetda qolmasligini, mazkur murojaatlar biroz vaqt talab etani uchun albatta oʻrganib chiqilib ijobiy hal qilinishini maʼlum qildi.

Uchrashuvda Qipchoq shaharchasi hududida istiqomat qiluvchi yoshlar ham oʻz taklif va muammolari bilan tuman hokimiga murojaat qildilar.

Shu mahallaning faol yoshlaridan biri Ulugʻbek Murodov subsidiya asosida motokultivatorga ega boʻlsa hamqishloqlariga beminnat xizmat koʻrastishni, Gulbarchin Kamolova esa subsidiya asosida tikuv mashinasi olib ayol-qizlarga bejirim liboslar tikib berishni maqsad qilishganini aytib murojaat qilishdi.

Ushbu yoshlarnning ham murojaati tuman hokimi va tegishli tashkilot mutasaddilari tomonidan qayd etilib tez kunlarda ijobiy hal etilishiga kelishib olindi.

Uchrashuv yakunida tuman hokimi barcha yoshlarni yaqinlashib kelayotgan “Yoshlar kuni”ni bilan samimiy tabriklab, oʻqish va ishlarida muvaffaqiyat tiladi.

Tuman hokimligining Axborot xizmati.