“QALDIRGʻOCh” BOLALAR OROMGOHI TARBIYaLANUVChILARI UChUN KUTUBXONAGA SAYoHAT UYuShTIRILDI

Yoshlar maʼnaviyatini yuksaltirish, ular ongida Vatanga muhabbat, milliy va umuminsoniy qadriyatlarga sadoqat ruhini shakllantirish, Prezidentimiz tomonidan ilgari surilgan besh muhim tashabbusning biri – yoshlar kitobxonligini rivojlantirish, ularning boʻsh vaqtlarini mazmunli oʻtkazish, mafkura maydonining turli xurujlaridan himoya qilish, maʼnaviy dunyosini boyitish maqsadida Amudaryo televideniyesi ijodiy jamoasi tomonidan taʼlim muassasalari oʻquvchilari va uyushmagan yoshlar oʻrtasida doimiy ravishda turli koʻrik-tanlovlar, davra suhbatlari, taniqli yozuvchi va shoirlar bilan uchrashuvlar oʻtkazilib kelinmoqda.

Ana shunday tadbirlardan biri Doʻrman ovulidagi xushmanzara maskan – “Qaldirgʻoch” bolalar oromgohida ham boʻlib oʻtdi. Yozgi taʼtil paytida Amudaryo tumanining turli hududlaridagi maktablarning oʻquvchilari miriqib dam olayotgan mazkur bolalar oromgohida ularning sport, musiqa va kitobxonlik bilan shugʻullanishlari, informatika xonasida  kompyuter texnologiyalari bilan ishlashni puxta oʻrganishlari uchun barcha sharoitlar yaratilgan. Bolalar oromgohi rahbari Zafar Abdullayevdan tortib, oromgohga birkitilgan Milliy gvardiya xodimi Jamol Aybosinov, inspektor-psixolog, mayor Omon Xojanazarov, Ichki ishlar boʻlimidan masʼul Amangaldi Orinbayev, tibbiyot xodimlari, tarbiyachi-enagalarning oʻz ishlarini koʻngildagidek olib borishayotganlari bois, oromgohda dam olayotgan bolalarning barchasi oʻtayotgan har bir lahzadan mamnun.

Shunisi eʼtiborliki, oromgohda har bir bolaning qiziqishlari, albatta inobatga olinadi va ularning iqtidorlarini rivojlantirishga qaratilgan mashgʻulotlar olib boriladi. Bunda tarbiyachilar – 53-sonli maktab oʻqituvchilari Ikrom Qurbonboyev, Malohatxon Matsafoyevalar musiqa yoʻnalishi boʻyicha, Surayyo Qurboniyozova va informatika fanidan qiziqarli mashgʻulotlar olib borishadi. Shaxmat va badiiy havaskorlik toʻgaragi mashgʻulotlaridan bolalar olam-olam zavq olishadi.

Joriy yilning 26-iyun sanasida Amudaryo televideniyesining “Yuksak maʼnaviyatli yoshlar – kelajak poydevori” grant loyihasi doirasida oromgoh tarbiyalanuvchilari uchun kutubxonaga sayohat tadbiri uyushtirildi. Sport, badiiy havaskorlik va kompyuter texnologiyalari toʻgaraklari mashgʻulotlaridan soʻng bolalar kutubxonaga sayohat qilishib, olam-olam zavq oldilar. Ularning har biri oʻzlari sevgan yozuvchi va shoirlarning asarlarini tanlab olishib, shu yerning oʻzidayoq mutolaani boshlab yuborishdi.

Kutubxonaga sayohat tadbirida “Yuksak maʼnaviyatli yoshlar – kelajak poydevori” grant loyihasi koordinatori Qoraqalpogʻiston Respublikasida xizmat koʻrsatgan jurnalist, Oʻzbekiston Yozuvchilar Uyushmasi aʼzosi, shoira Robiya Yoʻldosheva oʻquvchi-yoshlarga kitobning, kitobxonlikning inson hayotida tutgan oʻrni, insonning shaxs sifatida shakllanishidagi ahamiyati xususida soʻz yuritib, kitobxon bolalarning qiziqishlari, oʻzbek va jahon adabiyoti namoyondalarining asarlari va ular yaratgan qahramonlar haqida ular bilan dildan suhbatlashdi va Amudaryo tumanidan yetishib chiqqan yosh, umidli shoira, 35-sonli maktab bitiruvchisi, Zulfiya nomidagi davlat mukofoti sohibasi, qator xalqaro tashkilotlar tomonidan volontyorlik, reportyorlik va jamoatchilik faoliyatlari uchun turli darajadagi koʻkrak nishonlari bilan taqdirlangan Barnoxon Samandarovani bolalarga oʻrnak qilib koʻrsatdi. Oʻz navbatida Barnoxon Samandarova oʻquvchilarga kitob mutolaasi tufayli hayotida quvonchli yutuqlarga erishayotgani, umumtaʼlim maktabini oltin medal bilan tugatib, 2022-2023 oʻquv yilida muddatidan oldin talaba boʻlganini aytib, kitobxon oʻquvchilarning savollariga javob berdi.

Tadbir davomida oʻquvchilar oromgoh kutubxonasiga aʼzo boʻlganliklarini aytishib, oʻzlari oʻqigan kitoblaridan olgan taassurotlari haqida soʻzlab berdilar. Xususan, 28-sonli maktabning 7-sinf oʻquvchisi Behzod Ortiqov Ahmad Yassaviy gʻazallaridan, 39-sonli maktab oʻquvchisi Zahroxon Jumaboyeva Alisher Navoiy gʻazallaridan oʻqib berdilar.

Shuningdek, oromgoh tarbiyalanuvchilari kutubxonaga uyushtirilgan sayohatdan mamnun ekanliklarini bildirishib, hozirgi zamon oʻzbek adabiyoti namoyondalari asarlari yuzasidan oʻzlarini qiziqtirgan savollar bilan murojaat qildilar va barcha savollariga “Yuksak maʼnaviyatli yoshlar – kelajak poydevori” loyihasi doirasidagi mazkur tadbir tashkilotchilari tomonidan qiziqarli javoblar oldilar.

Mahmudjon Shomurodov, Ravshan Bahromov, Amudaryo televideniyesi muxbarlari.