Qoraqalpogʻiston Respublikasi Prokurori oʻrinbosari Yerpolat Qaipbergenov ishtirokida sayyor qabul boʻlib oʻtdi

Bugun “Xalq davlat idoralariga emas, davlat idoralari xalqimizga xizmat qilishi kerak” degan chaqiriq turmushimizning barcha sohalarida oʻz ifodasini topmoqda. Barcha darajadagi davlat idoralari xalqimizning ogʻirini yengil qilishga baholi qudrat hissa qoʻshayotir. Ayniqsa Prezidentimizning “Aholi muammolari bilan ishlash tizimini yanada takomillashtirish chora-tadbirlari toʻgʻrisida”gi Farmoniga muvofiq aholi va davlat organlari oʻrtasida ochiq muloqot yoʻlga qoʻyilib, dolzarb muammolar tilga olinmoqda va bu muammolar ijobiy hal etilmoqda.

12-iyul kuni Mangʻit shahrining Farovon mahallasida Qoraqalpogʻiston Respublikasi Prokurori oʻrinbosari Yerpolat Qaipbergenov tomonidan oʻtkazilgan sayyor qabulda ham aholi turmushidagi koʻpgina muammolar yechim topdi.

Sayyor qabulda 2-sektor hududidagi mahalla tizimi xodimlari, tegishli korxona va tashkilot rahbarlari hamda oʻz muammolari bilan tashrif buyurgan fuqarolar ishtirok etishdi.

Qabulda dastlab ishtirokchilarga hukumatimizning aholi turmushi farovonligini, sifatini oshirish borasida olib borilayotgan ishlar, bu borada qabul qilinayotgan qarorlar haqida qisqacha tushuntirish berildi. 2-sektor hududiga kiruvchi mahallalarda ijtimoiy himoyaga muhtoj, kam taʼminlangan oilalarni qoʻllab-quvvatlash, aholiga munosib turmush sharoiti yaratish, yoshlarning tadbirkorlik tashabbuslarini qoʻllab-quvvatlash sektor masʼullarining doimiy eʼtiborida ekanligi taʼkidlandi.

Shundan soʻng, aholi murojaatlari tinglandi. Qabul davomida 33 nafar fuqaro tomonidan turli mazmundagi murojaatlar kelib tushdi. Shulardan 2 ta murojaat tergov va surishtiruv faoliyatiga oid boʻlsa, 31 tasi ijtimoiy sohaga oid murojaatlar boʻldi.

Ushbu murojaatlarning ayrimlari sektor masʼullari tomonidan ijobiy hal etildi, ayrimlariga aniq va muddat belgilanib, baʼzilariga batafsil tushuntirishlar berildi. Hal qilinishi lozim boʻlgan murojaatlar yuzasidan tegishli masʼul xodimlarga topshiriqlar berilib, ijrosi uchun muddat belgilandi.

Shu oʻrinda qayd etish lozimki, bugun har bir fuqaro uchun barcha davlat organlari va tashkilotlarining eshiklari ochiq. Davlat idoralari rahbarlari fuqarolarning murojaatlarini ish xonalarida emas, balki joyiga borib, haqiqiy holatni koʻrgan va oʻrgangan holda koʻrib chiqmoqdalar.       

Bu borada muhim vosita boʻlayotgan sayyor qabullar aholi muammolarini joyida, tez va samarali hal etish imkonini berayotgani bilan ahamiyatlidir. Sayyor qabullarda ishtirok etib, murojaat qilayotgan yurtdoshlarimiz esa davlat organlari va tashkilotlari oldiga vazifalar qoʻyayotgani sababli hududlarda yigʻilib qolgan muammolarni aniqlash va ularni bartaraf etish ishlari qisqa fursatlarda amalga oshirilmoqda. Bu esa hududlarimizning yanada rivojlanib, aholi turmushining kun sayin farovon boʻlib borayotganining bosh omili boʻlmoqda.

Tuman hokimligining Axborot xizmati.