Yoshlar kamoliga xizmat qilayotgan tashkilot

Yoshlarning maʼnaviyatini yuksaltirish, ularning boʻsh vaqtlarini mazmunli oʻtkazish, mafkura maydonining turli xurujlaridan himoya qilish, maʼnaviy-ruhiy va intellektual salohiyatini oshirish, jamiyatda ijtimoiy-maʼnaviy muhitni sogʻlomlashtirish ishlariga hissa qoʻshish maqsadida “Amudaryo televideniyesi” tahririyati tomonidan amalga oshirilayotgan “Yuksak maʼnaviyatli va axloqli yoshlar – yurt kelajagi” nomli grant loyihasi doirasida tumandagi davlat va nodavlat notijorat tashkilotlar bilan hamkorlikda turli tadbirlar, davra suhbatlari oʻtkazilmoqda.

Loyiha hamkorlaridan biri “Jayxun ilhomlari” nodavlat notijorat tashkiloti aʼzolarining bu boradagi saʼy-harakatlari ayniqsa eʼtiborga sazovor. Qariyb sakkiz yildan beri faoliyat yuritib, tumandagi iqtidorli yoshlarni qoʻllab-quvvatlashga, ularning iqtidorini yuksaltirishga va oʻzligini namoyon etishiga xizmat qilib kelayotgan tashkilot aʼzolari soni kundan kunga koʻpayayotgani uning nufuzi oshayotganidan darak beradi.

Bugungi kunda tashkilot qoshida faoliyat yuritayotgan kutubxona oʻsmirlar, yoshlarning sevimli maskaniga aylangan desak, xato boʻlmaydi. Bu bejiz emas. Tashkilot raisi, iqtidorli jurnalist, matbuot faxriysi Oʻrozali Reyimov tumanimiz maktablarida, ovul, mahallalarida boʻlib, iqtidorli yoshlarni izlab topishga, ular bilan suhbatlashishga hech erinmaydi, talantli yoshlarni tashkilotga birlashtirib, turli adabiy tadbirlar uyushtiradi.

Ayni kunda tumanda 200 nafarga yaqin turli yoshdagi ijodkorlarning roʻyxati Oʻrozali Reyimovning ish stolida turibdi. Yosh ijodkorlar sheʼr, hikoyalari jamlangan “Ummondan terilgan marjonlar” toʻplami 2022-yilda yorugʻlikka chiqdi.

Yoshlar maʼnaviyatini yuksaltirish, ularni milliy va umumminsoniy qadriyatlarga hurmat ruhida tarbiyalash, kelajagimiz egalarini “ommaviy madaniyat” niqobi ostidagi madaniyatsizlikning zararli taʼsirlaridan himoya qilish borasida ham tashkilot tomonidan aytishga arzigulik ishlar amalga oshirilayapti. Bu borada maktablar oʻquvchilari orasida turli mavzularda oʻtkazilayotgan insholar, rasmlar tanlovlari, yosh ijrochilarning kontsertlari va yoshlarni kitobxonlikka jalb qilish borasida “Kitobxon yoshlar” tanlovlarini aytib oʻtish joiz.

Shu yilning 19-iyulida tumandagi 41-sonli maktabdagi "Barkamol avlod" bolalar maktabining yosh rejissyor, jurnalist va notiq toʻgaragi aʼzolari ishtirokida oʻtkazilgan “Kitoblar karvoni” tadbirida tashkilot qoshidagi kutubxonaning maktab oʻquvchilari uchun moʻljallangan kitoblaridan namunalar namoyish etildi va oʻquvchilar kutubxonaga aʼzo boʻlishga, ularni olib oʻqishga daʼvat etildi.

Shuningdek tadbirda"Barkamol avlod" bolalar maktabining 41-sonli maktabdagi yosh rejissyor, jurnalist va notiq toʻgarigi rahbari Ziyoda Sadaddinova, “Jayxun ilhomlari” nodavlat notijorat tashkiloti aʼzosi Oygul Rajabovalar ham oʻquvchilarni kitoblar mutolaasiga chorlab, undan olinadigan bilimning inson hayotidagi ahamiyatiga keng toʻxtaldilar. Ular kitob oʻqish odamni hayotda oʻz oʻrnini topishiga, yuksak axloq-odobni oʻz xarakterida shakllantirishga va hurmat-eʼtibor qozonishiga zamin boʻlishini taʼkidladilar.

Tashkilot tomonidan kitob mutolaasini targʻib etuvchi buningdek tadbirlar tez-tez oʻtkazib turiladi. 5-marta turli tanlovlar tashkil etilib, gʻoliblar moddiy-maʼnaviy ragʻbatlantirildi.

Tashkilotda ayni kunlarda mamlakatimiz mustaqilligining 32-yilligi sharafiga bugungidek dorilomon kunlar qadrini yoshlar ongiga singdirishga ularni shu aziz Vatanimizning munosib farzandlari boʻlib yetishishga daʼvat qiluvchi tadbirlar oʻtkazishga saʼy-harakatlar boshlanib ketdi.

Oygul RAJABOVA.