“OʻQITUVChI VA MURABBIYLAR SALOMATLIGI OYLIGI” AKTsIYaSI DOIRASIDA OʻQITUVChILAR UChUN ChUQURLAShTIRILGAN TIBBIY KOʻRIK OʻTKAZILMOQDA

Avlodlar barkamolligi va jamiyat sogʻlomligi dastlab bola dunyoga kelgan oilasida va maktabda ularga berilgan taʼlim-tarbiya sifatiga koʻp jihatdan bogʻliq. Shu boisdan ham ustoz murabbiylarni qoʻllab-quvvatlash, mehnatlarini munosib baholash borasida keyingi yillarda koʻpgina saʼy-harakatlar amalga oshirilmoqda, ularni eʼzozlash, ijtimoiy imtiyozlar yaratishga eʼtibor kuchaytirilmoqda.

Darhaqiqat, yurt ustoz-murabbiylar mehnati samarasidan obod, farovon, tinch va osoyishta. Yurtimizda istiqomat qiluvchi ustoz-murabbiylarga xalqimizning hurmat-ehtiromi sifatida Respublika Sogʻliqni saqlash vazirligi tashabbusi bilan “Oʻqituvchi va murabbiylar salomatligi oyligi” aktsiyasi oʻtkazilayapti.

Joriy yilning 20-iyul kuni tuman Tibbiyot birlashmasiga qarashli koʻp tarmoqli markaziy poliklinikasida oylik doirasida oʻqituvchilar uchun aktsiya tibbiy koʻrik tashkil etildi. Shunga muvofiq tuman Maktabgacha va maktab taʼlimi muassasalarining 137 nafar xodimlari EKG, UTT, laboratoriya tekshiruvlari, shuningdek, kardiolog, nevropatolog, urolog, ginekolog, oftalmolog va endokrinolog kabi tor soha mutaxassislari tomonidan chuqurlashtirilgan tibbiy koʻrikdan oʻtkazildi. Chuqurlashtirilgan tibbiy koʻrik davomida sogʻligʻida muammo aniqlanganlar shifokorlar nazoratiga olindi. Shuningdek kasallik aniqlangan xodimlarga holatiga qarab, statsionar va ambulator sharoitda davolanishga tavsiyalar berildi.

Tibbiy koʻrikdan oʻtkazish jarayonida ustoz-murabbiylarga shifokorlar sogʻlom turmush tarzi umummilliy harakati dasturlarini amalga oshirish maqsadida ular bilan induvidual suhbatlar ham oʻtkazishmoqda.

“Oʻqituvchi va murabbiylar oyligi” aktsiyasi doirasidagi tibbiy koʻriklar davom etmoqda.

Yurtimizning barcha hududlarida boʻlgani kabi tumanimizda ham ushbu tadbir barcha maktab va maktabgacha taʼlim muassasalarida faoliyat yurituvchi oʻqituvchilar va murabbiylarning salomatligini muhofaza qilish maqsadida tashkillashtirilgan tadbir 12-iyuldan 10-avgustga qadar davom ettiriladi.

Mazkur aktsiya doirasida tibbiy koʻrik tuman Tibbiyot birlashmasi, koʻp tarmoqli markaziy poliklinikasidan tashqari qishloq oilaviy poliklinikalarida ham oʻtkazilmoqda. Tibbiy koʻrik davomida aktsiya doirasida antropometrik oʻlchovlar, skrining, diagnostika va instrumental tekshiruvlar, zamonaviy laboratoriya tahlillari tizim xodimlari uchun bepul amalga oshirilmoqda.

Yosh avlodga taʼlim-tarbiya berishdek mashaqqatli kasb egalari boʻlgan oʻqituvchilar har yili yangi oʻquv yili boshlanishi oldidan tibbiy koʻrikdan oʻtishi lozim edi. Bu hol baʼzan ayrimlar uchun noqulaylik keltirib chiqarar edi. Boisi tibbiy koʻrik uchun avval bank orqali pul toʻlanishi lozim edi.

Oʻzbekiston Respublikasi Sogʻliqni saqlash vazirligi tashabbusi bilan joriy oʻquv yili oldidan tashkil etilgan aktsiya ustoz-murabbiylar hurmat va ehtirom ramzi boʻldi desak, adashmagan boʻlamiz.

Hozir huvillab yotgan muhtasham maktablar bagʻri hademay yana bolajonlar bilan gavjum boʻladi. Ustoz-murabbiylar uchun esa taʼtil poyoniga yetay deb qoldi. Ular oʻzlariga koʻrsatilayotgan eʼtibordan mamnun holda sevimli kasbini xushnudlik bilan boshlaydilar.

Faxriddin ABDULLAYeV, tuman Tibbiyot birlashmasi boshligʻi.