ZULFIYa QIZLARI IJODIDAN...

Yulduzga

Yuzi oy, koʻzi charos,

Sochi sunbul, kamon qosh.

Shirin soʻz, gulga qiyos,

Mehrda misli quyosh –

Goʻzallikka boy Yulduz,

Koʻnglimga chiroy Yulduz.

Onasiga dastyor qiz,

Hunarlari bisyor qiz.

Barchaga birday yoqar,

Har ishga shay, tayyor qiz.

Pazanda, chevar Yulduz,

Xulqi aʼlo, lobar qiz!

Kumush JUMAMURODOVA,

Amudaryo akademik litseyi oʻquvchisi.

Ustozlarimga

Ilm-u fan xazinasi ustozim,

Bizga bergan ilmingizga tasanno!

To tirikmiz sizga qilamiz taʼzim.

Axir elni Siz qildingiz tarbiya.

Irodangiz koʻrib togʻlar bosh egar,

Soʻzingizdan toʻkilib turadi maʼno.

Hayotda koʻp narsa yoʻqolar, tugar,

Qalblarda mangudir Siz bergan ziyo.

Bolalik daftari mehringiz ichgan,

Orzular gulida qoʻlingiz tafti.

Qarang, bagʻringizdan har tomon uchgan,

Barcha shogirdlarning kulgandir baxti

Osiyo SOBIROVA, Amudaryo akademik litseyi oʻquvchisi

Siz biz uchun

azizsiz hamon

Bilim dargohiga qoʻyibman qadam.

Goʻzal chehrangizda mayin tabassum,

Ilm dargohiga eltuvchi inson –

Ustozim, biz uchun azizsiz hamon.

Qoʻlimga ilk bor qalam tutqazib,

Vatan nomin dildan anglatib.

Doim ezgulikka chorlovchi inson –

Ustozim, biz uchun azizsiz hamon.

Gohida sizlarni ranjitar boʻlsak,

Toza dilingizga yetkazsak ozor,

Kechirib suyuvchi moʻʼtabar inson –

Ustozim, biz uchun azizsiz hamon.

Mohinur Toʻraboyeva, Amudaryo akademik litseyi oʻquvchisi.

Farishta onam

Mening onam yagona,

Farishtaga oʻxshaydi.

Mehri ummon – bir dunyo

Oy, quyoshga oʻxshaydi.

Tongdan avval uygʻonar,

Turaqolgin, qizim, deb.

Ajib dasturxon yozar,

Erkalar yulduzim, deb.

Uygʻonaman shod - xurram,

Onamning ardogʻida

Har kunim misli bayram

Oilamiz bogʻida.

Kelajakda albatta,

Onamdayin boʻlaman.

Oilamga payvasta

Quyosh kabi toʻlaman.

Shahlo YOʻLDOShEVA, Amudaryo akademik litseyi oʻquvchisi.

Ilm izlang!

Inson kelar dunyoga bir bor,

Uning umri boʻlsin bir chinor.

Koʻnglimizga yetmasin ozor,

Ilm oling, aziz tengdoshlar!

Menga nima, oʻqisa demang,

Xatolikka aslo yoʻl qoʻymang.

Va intiling, orqaga qaytmang,

Ilm oling aziz tengdoshlar!

Kelajagi buyuk davlatmiz,

Oʻziga bek oʻzbek millatmiz.

Bobolarim tuygan niyatmiz,

Ilm oling, aziz tengdoshlar!

Elimda bor turli dargohlar,

Ilm berguvchi oliygohlar.

Oʻzbek nomin yoshlar oqlar,

Ilm oling, aziz tengdoshlar!

Ilm-u hunar bizga yarashar,

Kam boʻlmaymiz aslo hech kimdan.

Yurtboshimiz oldinga boshlar,

Qoʻllar bizni mustaqil Vatan!

Dilnavoz ShOMURODOVA, Amudaryo akademik litseyi oʻquvchisi