AMUDARYo DARYoSIDAGI ZAMONAVIY TEMIR YOʻL VA AVTOMOBIL YOʻLI QOʻShMA KOʻPRIGI QURILIShI NIHOYaSIGA YeTMOQDA

Barchamizga maʼlumki, Prezidentimizning topshirigʻiga koʻra boshlangan tumanimizdagi Amudaryo daryosi ustidan oʻtadigan temir yoʻl va avtomobil yoʻli qoʻshma koʻprigi qurilishi jadal surʼatlarda olib borilmoqda. Ayni paytda mazkur koʻprik qurilishining yakuniy bosqich ishlari amalga oshirilmoqda.

Ushbu zamonaviy temir-beton konstruktsiyali koʻprik ishga tushirilishi natijasida Qoraqalpogʻiston Respublikasi va Xorazm viloyati aholisi uchun savdo-iqtisodiy, ijtimoiy va maishiy aloqalarning yanada rivojlanishi kutilmoqda.

Oʻtgan davr mobaynida amalga oshirilgan katta hajmdagi qurilish ishlari davomida hududda temir yoʻl izlari yotqiziladigan yoʻlda tuproq koʻtarish ishlari texnik talablar asosida bajarildi. Kerakli joylarga avtomobillar oʻtishi uchun qulayliklar yaratilib, tonnellar ham qurildi. Qurilish-bunyodkorlik ishlari davomida tuman hududida 2 ta temir yoʻl stantsiyasi ham barpo etilib, ayni kunlarda vokzal binolari qad rostladi.

Daryoboʻyi mahallasi hududida, Amudaryo ustida olib borilayotgan qurilish ishlari “Oʻzbekiston temir yoʻllari” aktsiyadorlik jamiyatining buyurtmasiga koʻra, “Boshtransloyiha” aktsiyadorlik jamiyati tomonidan loyihalashtirilgan. “Oʻzbekiston temir yoʻllari” aktsiyadorlik jamiyatining “Koʻprik qurilish tresti” unitar korxonasi ishchilari tomonidan 400 mln. dollarlik loyiha asosida qurilayotgan yangi koʻprikning uzunligi 412,7 metr, balandligi 11,5 metr, kengligi 8,5 metrni tashkil qiladi.

Shu bilan bir qatorda boshlangan 79 km. uzunlikdagi “Shovot-Gurlan-Jumurtov-Qoraoʻzak” temir yoʻl liniyasini qurish ishlari ham jadal surʼatlarda davom etmoqda. Hozirgi paytda tuman hududidan oʻtuvchi mazkur temir yoʻl liniyasida shagʻal toshlar va poʻlat izlarni yotqizish, elektrlashtirish ishlari amalga oshirilmoqda. Yangi temir yoʻl liniyasi ishga tushirilganidan soʻng, Rossiya va Qozogʻiston Respublikasidan yuklarni tashish masofasini 240 km.ga, vaqtini esa 6 soatga qisqartirishga erishilishi koʻzda tutilmoqda.

Hozirgi paytda aholi foydalanib kelayotgan Amudaryo ustidagi ponton koʻprigi ancha eskirib qolgan boʻlib, 1982-yilda ishga tushirilgan. Yuk koʻtarish qobiliyati 10 tonna boʻlgan ushbu koʻprikdan yiliga 600 ming tonnaga yaqin yuk olib oʻtiladi. Shuningdek, 3 milliondan ortiq aholi, 1 millionga yaqin avtotransport vositalari ham mazkur koʻprikdan foydalanadi.

Endilikda yangi va zamonaviy koʻprik ishga tushirilsa, yuk tashish hajmi koʻpayib, yiliga 25 mln. tonnani tashkil etadi. Mintaqalarning rivoji natijasida iqtisodiy samaradorlik yiliga 100 mlrd. soʻmga oshadi. Bundan tashqari, Qoraqalpogʻistondan Xorazmga qurilish materiallari va boshqa turdagi mahsulotlarni yetkazib berish xarajatlari kamayadi, bu esa yangi ijtimoiy obʼektlar va infratuzilmalarni qurishga sarflanadigan mablagʻlar tejalishini taʼminlaydi.

Qoraqalpogʻiston Respublikasi va Xorazm viloyatini bogʻlovchi Amudaryo daryosi ustiga qurilayotgan avtomobil va temir yoʻl qoʻshma koʻprigi ishga tushirilganidan soʻng, barchamiz uchun qulayliklar yaratiladi va eski koʻprikda sodir boʻlayotgan har xil favqulodda holatlarning oldi olinadi. Shu bilan birga Qoraqalpogʻiston Respublikasi va Xorazm viloyati aholisi va tadbirkorlariga yangi temir yoʻl liniyasi orqali qatnovlardagi muammolar hal etiladi, tadbirkorlik faoliyatiga keng imkoniyatlar yaratiladi.

Zamonaviy texnologiyaga asoslangan yangi turdagi qurilish konstruktsiyasi asosida barpo etilayotgan mazkur koʻprik uzoq yillar mobaynida ezgu maqsadlar yoʻlida xalqimizga xizmat qiladi. Mazkur koʻprikning ishga tushirilishi natijasida hududlar farovonlashib, aholining turmush darajasi yanada yaxshilanadi. Temir yoʻl orqali yurtimizning boshqa hududlar bilan bogʻlanishi tufayli esa nafaqat Amudaryoda, balki butun Qoraqalpogʻistonda ijtimoiy-iqtisodiy taraqqiyotga keng yoʻl ochiladi.

O.Xudoyberganova