SAYYoR QABULLAR – AHOLI MUROJAATLARI BILAN IShLAShDA SAMARALI USUL

Aholi murojaatlari bilan ishlash, fuqarolarni qiynab kelayotgan muammolarni aniqlash va tezkor yechim topishda respublikamizning barcha hududlarida oʻtkazilayotgan sayyor qabullarning ahamiyati katta. Ushbu samarali usulning yoʻlga qoʻyilgani, davlatimiz rahbari tashabbusi bilan xalq davlat idoralariga emas, davlat idoralari xalqimizga xizmat qilayotgani aholining ertagi kunga ishonchini mustahkamlamoqda.

Amudaryo tumanida ham Prezident Qabulxonasi, sektorlar rahbarlari ishtirokida reja asosida barcha hududlarda sayyor qabullar tashkil etilib, aholi bilan yuzma-yuz muloqotlar oʻtkazilayotir.

10-sentyabr kuni Mangʻit shahridagi Olmazor, Gulzor, Oybek nomli mahallalar aholisi hayoti bilan tanishish, ularni qiynayotgan muammolarga yechim topish maqsadida 1-sektor masʼullari va tumandagi Prezident qabulxonasi mudiri Erkin Rajabovning sayyor qabuli boʻlib oʻtdi.

Tadbirda tuman hokimi oʻrinbosari, Oila va xotin-qizlar boʻlimi boshligʻi Goʻzal Soburova, tumandagi Xalq qabulxonasi mudiri Erkin Rajabov, Olmazor, Gulzor, Oybek nomli mahallalar fuqarolar yigʻinlari raislari, hokim yordamchilari, xotin-qizlar faollari, yoshlar yetakchilari, profilaktika inspektorlari, tumandagi korxonalar, tashkilotlar rahbarlari, banklar boshqaruvchilari va mahallalardan 30 nafardan ziyod fuqarolar ishtirok etdilar.

Tadbirda dastlab mahallalarda hokim yordamchilari, yoshlar yetakchisi, xotin-qizlar faoli lavozimlari joriy etilganligi aholi bilan ishlash, mavjud muammolarni aniqlashda va bartaraf etishda juda muhim ahamiyat kasb etayotgani taʼkidlandi.

Joriy yilning oʻzida yangi ish oʻrinlarini yaratish, aholini tadbirkorlikka jalb qilish va doimiy daromadga ega boʻlishlari uchun mazkur mahallalarda ham oʻndan ziyod tadbirkorlik subʼektlari tashkil etildi, kam taʼminlangan ehtiyojmand oilalar qoʻllab-quvvatlandi, ayrim ishsiz yoshlar tadbirkorlikka, kasb-hunarga oʻqitilib, faoliyatini boshlashlari uchun kreditlar ajratildi.

Shu kuni sayyor qabul davomida 10 nafar fuqarolar turli muammolar yuzasidan murojaat qildilar. 10ta murojaatning 2tasi yaʼni Oybek nomli mahallada istiqomat qiluvchi fuqaroning yashash hovlisi oldidagi elektr liniyasi oʻtgan yogʻoch ustun chirib, atrofdagilarga xavf solayotgani xususidagi, Gulzor mahallada yashovchi fuqaroning hovlisi oldidagi yashil hududga ekilgan daraxtlar elektr simiga tegib, xavfli vaziyat yuzaga kelgani xususidagi murojaatlari boʻyicha soha masʼullariga muammolarni hal etish topshirildi.

Qolgan 8ta – bankdan kredit olish, koʻchalarning ichki yoʻllarini taʼmirlash va bolalar maydonchasi qurish kabi murojaatlar ham hal etish uchun nazoratga olindi. Shuningdek, masʼullar tomonidan aholini qiziqtirgan savollarga ham batafsil javoblar berildi.

Oygul RAJABOVA.