«BESh TAShABBUS OLIMPIADASI» IKKINChI MAVSUMIGA START BERILDI

Davlatimiz rahbarining 2022-yil 11-apreldagi “Mahallalarda yoshlarni ommaviy sportga jalb qilishni yangi bosqichga olib chiqish chora-tadbirlari toʻgʻrisida”gi qarorida belgilab berilgan vazifalarning ijrosini taʼminlash maqsadida oʻtgan yili mamlakatimiz boʻylab “Besh tashabbus olimpiadasi” sport musobaqalari oʻtkazila boshlangan edi. Musobaqalarning oʻtgan yilgi mavsumiy bosqichlarida minglab yoshlar ishtirok etib, bor mahorat va iqtidorlarini namoyish etishdilar. Mahallalardagi yoshlarning boʻsh vaqtini mazmunli tashkil etish va ularning madaniyat, sanʼat, sport, kitobxonlik, IT yoʻnalishlari boʻyicha iqtidorlarini kashf etish hamda qoʻllab-quvvatlash maqsadida joriy yilgi “Besh tashabbus olimpiadasi”ning ikkinchi mavsumiga ham start berildi.

9-sentyabr kuni Ixtisoslashtirilgan taʼlim muassasalari agentligi tizimidagi Amudaryo tumani ixtisoslashtirilgan maktabida ham “Besh tashabbus olimpiadasi”ning ikkinchi mavsumiga start berilishi munosabati bilan ochilish marosimi tashkil etildi.

Tadbirda Qoraqalpogʻiston Respublikasi Vazirlar Kengashi raisi oʻrinbosari Bayram Utemuratov, Oʻzbekiston Respublikasi Yoshlar ishlari agentligi markaziy apparati masʼul hodimi Azizbek Turdimurodov, Yoshlar ishlari agentligi Qoraqalpogʻiston Respublikasi boshqarmasi boshligʻi Poʻlat Maxsetbayev, tuman hokimining yoshlar siyosati, ijtimoiy rivojlantirish va maʼnaviy-maʼrifiy ishlar boʻyicha oʻrinbosari Mahmud Shermetovlar ishtirok etdilar.

Tadbirning tantanali ochilish marosimida soʻz olgan Qoraqalpogʻiston Respublikasi Vazirlar Kengashi raisi oʻrinbosari Bayram Utemuratov “Besh tashabbus olimpiadasi” bellashuvlari boshlanishi bilan barchani qutlab, ishtirokchilarga omad tiladi.

Shundan soʻng tuman sport maktabi tarbiyalanuvchilari hamda tumandagi Yangiobod mahallasining yoshlari ishtirokida “Besh tashabbus olimpiadasi” doirasida “Milliy va zamonaviy cholgʻu ijrochiligi” tanlovi, “Zakovat” intellektual oʻyini, “Yosh kitobxon” tanlovi, milliy kurash va voleybol musobaqalari boshlandi.

Amudaryo tuman hokimligi, Yoshlar ishlari agentligi tuman boʻlimi, tuman sport maktabi hamkorligida oʻtkazilgan ushbu tadbirlarda 479 nafardan ortiq sportchi oʻgʻil-qizlar ishtirok etishdi.

“Milliy va zamonaviy cholgʻu ijrochiligi” yoʻnalishida 58 nafar, “Zakovat” intellektual bellashuvida 54 nafar, “Yosh kitobxon” tanlovida 212 nafar, milliy kurash musobaqasida 37 nafar va voleybol musobaqasida 64 nafar, gimnastrada yoʻnalishi boʻyicha esa 24 nafar mahalla yoshlari oʻz bilim va mahoratlarini sinovdan oʻtkazdilar. Bellashuvlarda ishtirok etgan yoshlarning iqtidori hakamlar tomonidan odilona baholab borildi.

Musobaqa natijalariga koʻra, 48 nafar yoshlar sektor bosqichiga yoʻllanmani qoʻlga kiritishdi. Aytish joizki, amudaryolik yoshlar mamlakat boʻylab oʻtkazib kelinayotgan “Besh tashabbus olimpiadasi” musobaqalarining avvalgi mavsumlarida ham munosib ishtirok etib kelishdi. Mazkur musobaqalar tuman yoshlarining intilishlarini, qiziqishlarini, salohiyatini yuzaga chiqarishda muhim maydon boʻlib xizmat qilmoqda.

Boshlanayotgan mavsum ham ular uchun muvaffaqiyatli boʻlishini tilab qolamiz.

Tuman hokimligi Axborot xizmati