AMUDARYo TUMANI “YoZGI BIATLON” BOʻYIChA QORAQALPOGʻISTON ChEMPIONATIGA MEZBONLIK QILDI

Amudaryo tumanida qoraqalpogʻistonlik yoshlar oʻrtasida yozgi biatlon boʻyicha Qoraqalpogʻiston chempionati musobaqalari boʻlib oʻtdi.

15-sentyabr kuni Oʻzbekiston Respublikasi Mudofaasiga koʻmaklashuvchi “Vatanparvar” tashkiloti Qoraqalpogʻiston Respublikasi Kengashining tegishli buyrugʻiga asosan oʻtkazilgan ushbu musobaqalarda respublika hududidagi tumanlardan 8 ta jamoa ishtirok etdi.

Tashkilotning Amudaryo tumani Kengashi oʻquv-sport texnika klubi oʻquv-mashq maydonchasida tashkil etilgan musobaqa ertalabdan tantanali ravishda boshlandi. Yoshlar oʻrtasida sportning texnik va amaliy turlarini yanada kengroq targʻib etish maqsadida oʻtkazilgan ushbu tadbirda tuman hokimligi, mudofaaga koʻmaklashuvchi “Vatanparvar” tashkiloti tuman Kengashi, Yoshlar ishlari Agentligi tuman boʻlimi, Sport maktabi hamda boshqa hamkor tashkilotlar masʼullari ham ishtirok etishdi.

Tadbirni “Vatanparvar” tashkiloti Qoraqalpogʻiston Respublikasi Kengashi raisi Quvvat Razbekov ochib berdi va sportchilarga omad tiladi. Shuningdek, u yozgi biatlon sport turida yengil atletikaning kross va miltiqdan nishonni poylash elementlari mujassamligini, biatlonchining asosiy maqsadi, belgilangan masofani maksimal tezlikda yugurib oʻtib, nishonni aniq moʻljalga olish ekanligini taʼkidladi. Musobaqalar davomida sportchilar nishonni poylashda bexato harakat qilishi, kuchlarini masofaning barchasiga bir xil taqsimlay olishi kerakligini, shunisi bilan ushbu sport boshqa turlardan farq qilishini aytib oʻtdi.

Amudaryo tumani Oʻquv-sport texnika klubi boshligʻi Azizbek Ismoilov ham mazkur musobaqa respublikamiz yoshlari oʻrtasida sportning texnik va amaliy turlaridan biri sanalgan yozgi biatlonni yanada rivojlantirish, uni oʻgʻil-qizlar orasida ommalashtirish va iqtidorli sportchilarni aniqlab olish maqsadida tashkil etilgani, gʻoliblar Oʻzbekiston chempionatida ishtirok etish imkoniga ega boʻlishini eʼtirof etdi.

Musobaqalarda respublikamizning turli hududlaridan kelgan mahoratli sportchilar oʻz shijoatini, chaqqonligini namoyish etishga muvaffaq boʻlishdi. Musobaqa shartiga koʻra jamoalarning har bir aʼzosi 3000 metrga yugurish va oraliqda bir marta tik turgan holatda, keyingi aylanani yugurib oʻtib, yotgan holatda havo miltigʻidan nishonlarga oʻq otish kabilarni bajarishdi. Agarda berilgan 5 ta oʻqdan nishonlarga kam tegsa, shuncha marta yugurib, belgilangan jarima aylanasini qoʻshimcha ravishda yugurib oʻtdilar.

Musobaqalar shu tarzda kurashlarga boy va qizgʻin oʻtdi. Barcha jamoalar gʻolib chiqish uchun harakat qildilar. Musobaqa davomida yaxshi natijalar koʻrsatgan jamoalar gʻolib va sovrindorlar qatoridan oʻrin oldilar.

Murosasiz va qiziqarli oʻtgan bellashuvlarning yakuniy natijalariga koʻra, yozgi biatlon boʻyicha Qoraqalpogʻiston chempionatida 1-oʻrinni Beruniy tumani Oʻquv-sport texnika klubi jamoasi, 2-oʻrinni Amudaryo tumani Oʻquv-sport texnika klubi, 3-oʻrinni Toʻrtkoʻl tumani Oʻquv-sport texnika klubi jamoasi egallashdi. Yozgi biatlon boʻyicha qoraqalpogʻistonlik yoshlar oʻrtasida boʻlib oʻtgan musobaqalarda gʻolib boʻlgan yosh iqtidor egalari chempionatning Oʻzbekiston bosqichiga yoʻllanmani qoʻlga kiritishdi.

Musobaqa yakunida gʻolib jamoa va shaxsiy birinchilikka erishgan sportchilarga “Vatanparvar” tashkiloti tomonidan diplomlar va esdalik sovgʻalari topshirildi.

O.Xudoyberganova