BILIMLI VA HUNARLI YoShLAR – YuRT TAYaNChI

Kasb-hunar taʼlimi tizimi iqtisodiyot rivojining muhim komponenti hisoblanadi. Ushbu taʼlimda yuqori malakali ishchi, kasb egalari, iqtisodiyotning oʻrta boʻgʻini mutaxassislari tayyorlanadi. Amudaryo tumanida ham yoshlarning kasb-hunar sirlarini mukammal oʻrganishlarini taʼminlash maqsadida 1- va 2-sonli kasb-hunar maktablari tashkil etilgan boʻlib, bugungi kunda ularda yoshlar kasb-hunar sirlarini puxta oʻrganishmoqda.

Qipchoq ovulidagi 1-sonli kasb-hunar maktabida 2022-2023-oʻquv yili davomida jami 304 nafar oʻquvchiga 28 nafar oʻqituvchi va 10 nafar ishlab chiqarish taʼlimi ustalari taʼlim-tarbiya berib, kasb va hunar sirlarini oʻrgatishdi. Yil davomida oʻquvchilar bu dargohda kasb-hunar sirlarini oʻrganish bilan birga oliy oʻquv muassasalariga chuqur tayyorgarlik koʻrib, talabalar safiga qoʻshilishga muyassar boʻlishdi. Shuningdek, 4 nafar oʻquvchi ingliz tili fanidan xalqaro va milliy sertifikatlarga ega boʻlishdi. Mazkur oʻquv yilida kasb-hunar maktabini 160 nafar oʻquvchi bitirgan boʻlsa, shundan 36 nafari oliy taʼlim muassasalariga qabul qilindi.

Soʻlim tabiatli, koʻkalamzor hududda joylashgan ushbu taʼlim muassasasida 240-oʻrinli oʻquv ustaxonasi, 120-oʻrinli oshxona va 100-oʻrinlik oʻquvchilar turar joyi mavjud. Oʻquv muassasasida taʼlim olayotgan yoshlarning kasb va hunar sirlarini puxta oʻrganishlarini taʼminlash maqsadida tumandagi korxona, tashkilot va muassalar bilan oʻquv va ishlab chiqarish amaliyotlarini oʻtashlari uchun 12 ta hamkorlik shartnomalari tuzilgan. Hozirgi kunda mazkur shartnomalarga koʻra belgilangan korxona-tashkilotlarda oʻquv jadvaliga asosan ishlab chiqarish va diplom oldi amaliyotlarini oʻtkazish yoʻlga qoʻyilgan.

Kasb-hunar maktabida 2023-2024 oʻquv yili oldidan ham qizgʻin tayyorgarlik koʻrilib, oʻquvchi-yoshlarning sifatli taʼlim olishlari uchun barcha shart-sharoitlarni yaratishga alohida eʼtibor qaratildi. Bu yilgi oʻquv yilida 1-bosqichga 8 ta yoʻnalish boʻyicha 205 nafar oʻquvchi qabul qilinib, hozirgi kunda taʼlim-tarbiya ishlari boshlab yuborildi. Oʻquvchi-yoshlarga 28 nafar oʻqituvchi va 9 nafar ishlab chiqarish ustalari taʼlim-tarbiya berishmoqda.

Hozirgi kunda kasb-hunar maktabida oʻquvchilar avtomobil dvigatellarini tashxislash va taʼmirlash, avtomobil elektr va elektron jihozlariga xizmat koʻrsatish, axborot vositalari mashinalari va kompyuter tarmoqlari operatori, tikuvchi, oʻt oʻchiruvchi, traktorchi-mashinist, raqamli axborotlarni qayta ishlash ustasi, elektrik kabi yoʻnalishlar boʻyicha kasb-hunarga oʻrgatilmoqda. Ularga bilimdon oʻqituvchilar tomonidan umumtaʼlim fanlardan toʻliq bilimlar berish bilan birga, tajribali ishlab chiqarish ustalari kasb va hunar sirlarini mukammal oʻrgatishga harakat qilishmoqda. Shuningdek, maktabda tikuvchi va payvandlovchi yoʻnalishlari oʻquvchilari oʻrtasida turli tadbirlar, tanlovlar oʻtkazilib, yoshlarning tanlagan kasbiga boʻlgan qiziqishlari yanada oshirilmoqda.

Ushbu dargohda oʻquvchilarni kitobxonlikka jalb etishga ham alohida eʼtibor qaratilib kelinmoqda. Muassasadagi kutubxonada 24 mingdan ortiq turli xil mazmundagi adabiyotlar mavjud boʻlib, turli xildagi yangi adabiyotlar, elektron darsliklar keltirilgan. Oʻquvchilar kutubxonaga tashrif buyurib, bu yerdagi kitoblarni mutolaa qilishadi va bilimlarini oshirib, dunyoqarashlarini kengaytirib borishmoqda.

Ayni davrda iqtisodiyotning barcha tarmoqlari barobarida tadbirkorlik, kichik biznes, oilaviy biznes, tomorqa biznesi, qurilish, xizmat koʻrsatish, chorvachilik, parrandachilik, asalarichilik, baliqchilik kabi tez surʼatlarda ravnaq topayotgan sohalar uchun ishchi kasblar boʻyicha malakali kadrlar zarur. Shu sababli kasb-hunar maktabida oʻquvchi-yoshlarning har tomonlama yetuk, zamonaviy bilimlarga ega, jamiyatda oʻz oʻrniga ega insonlar boʻlib yetishishi uchun barcha imkoniyatlar yaratilgan.

Kasb va hunar insonga umri davomida hamroh boʻladi. Toʻkis, baxtli hayot kechirish uchun kasb ham, hunar ham oʻrganish kerak. Oʻz kasbining ustasi, hunarli kishilarning rizqi butun, turmushi farovon boʻladi.

Shu oʻrinda yoshlarga kasb-hunar sirlarini puxta oʻrgatayotgan, mamlakat iqtisodiyoti rivoji va xalq farovonligiga hissa qoʻshuvchi yetuk mutaxassislarni tayyorlash yoʻlida oʻzlarining bor bilimi va tajribasini safarbar qilayotgan oʻqituvchilar va oʻquvchilar, ishlab chiqarish taʼlimi ustalarini kasb bayrami – Oʻqituvchi va murabbiylar kuni bilan tabriklaymiz! Hamisha kasbingizdan kamol topib, mashaqqatli mehnatlaringizning rohatini koʻrib yashang, aziz ustozlar!

O.Xudoyberganova