USTOZ VA MURABBIYLAR UChUN BAYRAM TADBIRI OʻTKAZILDI
Kelajagimiz egalari boʻlmish yosh avlodni bilimli, savodli, maʼnaviy barkamol va jismonan sogʻlom qilib voyaga yetkazishda oʻqituvchi-murabbiylarning hissasi benihoya kattadir. Ular berayotgan puxta bilim va ibratli tarbiya katta hayot ostonasida turgan oʻgʻil-qizlarning vatanparvar, xalqimizga fidoyi va halol xizmat qiladigan insonlar boʻlib yetishishiga zamin boʻlib xizmat qiladi.
Yurtimizda 1-oktyabr Oʻqituvchi va murabbiylar kuni deb belgilanib, umumxalq bayrami sifatida nishonlanishi ustozlarga yuksak eʼtibor va hurmatning yaqqol namunasidir. Amudaryo tumanida ham har yili ushbu sana keng tantana qilinadi, taʼlim fidoyilari, tajribali muallimlar, faxriy ustozlar uchun tadbirlar tashkillashtiriladi.
Anʼanaga muvofiq 30-sentyabr kuni Mangʻit shahrida joylashgan fayzli “Sher” toʻyxonasida “Sizga taʼzim, aziz ustozlar!” deb nomlangan tadbir oʻtkazildi. Tadbirda muhtaram va xalqimiz eʼzozidagi insonlar – ustoz-murabbiylar uchun tuman hokimligi hamda Maktabgacha va maktab taʼlimi boʻlimi tomonidan bayram dasturxoni tashkil qilindi.
Tantanali tadbirda tuman hokimi Sobir Xoʻjametov, sektorlar rahbarlari, yoshlarga taʼlim-tarbiya berib kelayotgan pedagog oʻqituvchilar, ustoz va murabbiylar hamda faxriy oʻqituvchilar ishtirok etishdi.
Oʻqituvchilik masʼuliyatli va mashaqqatli kasb boʻlib, muntazam ravishda davomli mehnatni, sabr-toqat bilan ishlashni talab etadi. Insoniyat kamoloti uchun butun bilimi, iqtidori va hayotini baxsh etgan ustozlarning xizmatlarini hamma zamonlarda ham kishilar hurmatlab, eʼzozlab kelishgan.
Tadbir avvalida tuman hokimi Sobir Xoʻjametov ustoz va murabbiylarni kasb bayramlari 1-oktyabr – Oʻqituvchi va murabbiylar kuni bilan tabriklab, ularning sharafli ishlarida muvaffaqiyatlar tiladi va joriy yilda taʼlim sohasida erishilgan yutuqlarga ham toʻxtalib oʻtdi. Yosh avlod taʼlim-tarbiyasi yoʻlida fidokorona mehnat qilgan bir guruh oʻqituvchi-murabbiylar koʻkrak nishonlari, tashakkurnomalar va esdalik sovgʻalari bilan taqdirlandi. Shuningdek, taʼlim sohasida koʻp yillar samarali mehnat qilgan, jamoat ishlarida faol boʻlgan oʻqituvchilarga va shogirdlari nufuzli musobaqalarda gʻolib boʻlgan murabbiylar ham ragʻbatlantirildi.
Aytish joizki, tumanimizda 85ta umumiy oʻrta taʼlim maktabi mavjud. Joriy yilda maktablarda 38 ming 813 nafar oʻquvchilar mahoratli pedagoglardan taʼlim-tarbiya olmoqda. 2022-2023 oʻquv yilida 2750 nafar oʻquvchilar maktablarni bitkazgan boʻlsa, ularning 1289 nafari oliy taʼlim muassasalariga talabalikka qabul qilindi.
Bayram tadbiri davomida soʻzga chiqqanlar ustoz soʻzi zamirida olam-olam maʼno mujassam ekanligi, mashhur insonlarning yuqori choʻqqilarga erishishlari ham ustozlarning beqiyos zahmati mahsuli ekanini taʼkidlab, yigʻilganlarni kasb bayrami bilan qizgʻin qutladilar.
Chindan-da barcha davrlarda ham oʻqituvchi zimmasiga hayot talablariga toʻla javob beradigan va oʻz zamoniga munosib avlodlarni tarbiyalashdek masʼuliyatli vazifa yuklatilgan. Quyosh oʻz nuri bilan butun tabiat, borliqni jonlantirgani kabi, oʻqituvchi, murabbiy ham bor mahorati, ilmi bilan oʻquvchi-yoshlarning qalbini ilm ziyosi bilan toʻldirishga ahd qilgan buyuk kasb egasidir. Hayotning goʻzalligi, farovonligi, odobligi, qolaversa, davlat va jamiyat ravnaqi muallim mehnati bilandir.
Tuman Madaniyat boʻlimi tomonidan namoyish etilgan katta musiqiy dastur tadbirga yanada fayz kiritdi va barchaga bayram kayfiyatini ulashdi. Oʻqituvchi va murabbiylar kuniga bagʻishlangan bayram tadbiri shoʻx kuy-qoʻshiqlar va dilrabo raqslar bilan davom etdi.
Tuman hokimligi Axborot xizmati
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
