ISTEʼMOLChILARNI IChIMLIK SUVI BILAN TAʼMINLAShDA MUAMMO BOʻLMAYDI

Amudaryo tumani aholisining maʼlum qismi, yaʼni 81,8 ming kishi markazlashgan ichimlik suvi bilan taʼminlangan. Tumanda jami 337,2 km. uzunlikda suv tarmoqlari mavjud boʻlib, 6436 xonadonga maxsus avtotransportlar orqali ichimlik suvi tashib berish yoʻlga qoʻyilgan.

2021-yilda “Obod qishloq” va “Obod mahalla” davlat dasturi doirasida Xitoy ovuli hududida 2ta, Jumurtov shaharchasi hududida 2ta hamda Yuqori qishloq mahallasi hududida 1tadan  suv tozalash shoxobchasi qurilib, aholining ichimlik suv taʼminoti yaxshilanishiga sharoit yaratildi.

Bundan tashqari, Amir Temur nomli ovul hududida yangidan suv tarqatish inshooti va 11,2 km. suv tarmogʻi qurildi. Natijada Amir Temur nomli hamda Oq oltin ovullari hududidagi suv tarqatish inshootlari rekonstruktsiya qilinib, 7,9 km. uzunlikdagi yangidan suv tarmogʻini qurish ishlari bajarildi.

Prezidentimizning 2020-yil 11-noyabrdagi tegishli Qaroriga asosan 2022-yilda 35-sonli suv tarqatish inshooti rekonstruktsiya qilinib, 17,3 km. suv tarmogʻi qurildi, natijada Oq oltin ovuli hududidagi yana 559ta xonadonni markazlashgan ichimlik suvi bilan taʼminlanish imkoni yaratildi.

“Obod qishloq” Davlat dasturi asosida Toʻlqin ovulida 4ta, Ayoqchi mahal-lasida 2ta yuqori quvvatga ega suvni chuchuklantiruvchi stantsiyalar yangidan qurildi hamda 550ta xonadon toza ichimlik suvi bilan taʼminlandi.

Joriy yilda Namuna MFY hududida yangidan 1ta suvni chuchuklantiruvchi stantsiya qurilishi hamda 8,2 km. suv tarmoqlari tortilishi rejalashtirilgan boʻlib, bu boradagi ishlar nihoyasiga yetkazilmoqda. Mazkur inshootlar qurib, bitkazilgach, 236ta xonadonning ichimlik suvi taʼminoti yaxshilanadi.

Shuningdek, Qum yop mahallasi hududida ham yangidan 1ta suvni chuchuklantiruvchi stantsiya qurilishi hamda 10,5 km. suv tarmoqlari tortilishi rejalashtirilgan boʻlib, jami 332ta xonadon ichimlik suv bilan taʼminlanishi kutilmoqda.

Prezidentimizning 2023-yil 30-mart kungi Qoraqalpogʻiston Respublikasiga tashrifi doirasida belgilangan rejaga koʻra, ichimlik suvi taʼminotini yaxshilash maqsadida ayni paytda Besh tom mahallasi hududida yangidan 11,4 km. ichimlik suvi tarmogʻi tortish ishlari olib borilmoqda. Mazkur inshootlar ishga tushirilgach, 364ta xonadon markazlashgan ichimlik suvi bilan taʼminlanadi.

Bundan tashqari, tumanda ichimlik suvi taʼminotini yaxshilash maqsadida Osiyo taraqqiyot banki mablagʻlari hisobidan 2023-2026-yillarga moʻljallangan qurilish ishlari, xususan, Qipchoq ovuli hududida kuniga 40000 kubometr suv tozalash quvvatiga ega inshoot, Kuyuk koʻpir ovuli hududida yangidan suv taqsimlash inshooti qurilishi, Oʻrta qalʼa ovuli hududida RU-1 suv taqsimlash inshootini rekonstruktsiya qilish, Ayoqchi, Xizr eli mahallalari va Qilichboy ovullar hududlarida yangidan ichimlik suv tarmogʻi tortish, Qilichboy suv taqsimlash inshootini rekonstruktsiya qilish, shuningdek, tuman hududida 54,3 km. magistral suv tarmogʻi, 236,5 km. koʻcha suv tarmoqlarini qurish ishlari uchun loyiha-smeta hujjatlari tayyorlanib, tender savdolariga eʼlon berilishi kutilmoqda.

Joriy yil kuz-qish mavsumida aholini uzluksiz ichimlik suvi bilan taʼminlash maqsadida 3ta elektronasos, 2ta transformatorlarda, tuman hududidagi mavjud ichimlik suvi tarmoqlarida joriy taʼmirlash ishlari olib borildi.

Ichimlik suvi tarmoqlarida yuzaga kelishi mumkin boʻlgan nosozliklarni bartaraf qilish uchun ekskavator va kerakli asbob-uskunalar hamda zarur ehtiyot qismlar shay holatga keltirildi.

Hozirgi kunda ichimlik suvi isrof qilinishining oldini olish maqsadida aholi xonadonlari, korxona va tashkilotlar binolariga oʻrnatilgan suv oʻlchagich uskunalari koʻzdan kechirilib, yangidan ichimlik suvi tarmogʻiga ulanayotgan aholi xonadonlari, korxona va tashkilotlar binolariga ichimlik suvini oʻlchash uskunalarini oʻrnatish va ichimlik suvidan oqilona foydalanish hamda isrofgarchilikning oldini olish boʻyicha targʻibot va tashviqot ishlari olib borilmoqda.

Xurshidbek JUMANIYoZOV,

“Qoraqalpoq suv taʼminoti” MChJ Amudaryo tumani filiali boshligʻi.