Ichki ishlar organlari xodimlari kuni keng nishonlandi

Keyingi yillarda barcha sohalar singari ichki ishlar tizimida ham keng koʻlamli va puxta oʻylangan islohotlar amalga oshirilmoqda. Ayniqsa, jamiyatda qonun ustuvorligini taʼminlash, ichki ishlar organlarini el-yurt manfaatiga xizmat qiladigan chinakam xalqchil tizimga aylantirish yoʻlida katta ishlar olib borilmoqda.

Har yili mamlakatimizda 25-oktyabr Ichki ishlar organlari xodimlari kuni sifatida keng nishonlanib kelinadi. Bu yil Oʻzbekiston Respublikasi Ichki ishlar vazirligi tashkil etilganiga 32-yil toʻldi.

Sana munosabati bilan 26-oktyabr kuni Amudaryo tumanidagi “Bek” toʻyxonasida bayram tadbiri boʻlib oʻtdi.

Tadbirda tuman hokimi Sobir Xoʻjametov, sektorlar rahbarlari, tuman Ichki ishlar boʻlimi shaxsiy tarkibi, nafaqadagi faxriylar hamda jamoatchilik vakillari ishtirok etishdi.

Tadbirda tuman hokimi Sobir Xoʻjametov soʻnggi yillarda davlatimiz rahbari tomonidan ichki ishlar organlariga juda katta eʼtibor qaratilib, sohani chinakam xalqchil tuzilmaga aylantirish, aholi uchun barcha shahar va qishloqlarda, hatto eng chekka joylarda ham xavfsiz yashash va mehnat sharoitini yaratish maqsadida keng koʻlamli islohotlar amalga oshirilayotgani haqida toʻxtalib oʻtdi hamda jamiyatimizda qonun ustuvorligini taʼminlashdek sharafli va masʼuliyatli ishga bor kuch va salohiyatini bagʻishlab kelayotgan soha xodimlarini, tinglovchi-kursantlarni hamda faxriylarni bayram bilan samimiy muborakbod etdi.

Tadbirda tuman Ichki ishlar boʻlimi boshligʻi Jamaladdin Yusupov barcha hamkasblarini bayram bilan samimiy tabriklab, tizimda erishilgan yutuqlar va kelgusidagi vazifalar haqida toʻxtalib oʻtdi. Shuningdek, Amudaryo tumani Ichki ishlar boʻlimining shaxsiy tarkibi ikkita eng ustuvor masalaga – jamiyatimizda tinchlik va osoyishtalikni saqlash hamda aholi sogʻligʻini muhofaza qilishga doimiy ravishda alohida eʼtibor qaratib kelayotganligini taʼkidladi.

Tadbirda oʻz xizmat vazifasini namunali bajarib, xalqimizning tinchligi va osoyishtaligini saqlash yoʻlida bor kuch-gʻayratini safarbar etib kelayotgan safdor Sanjar Sobirov, Sardor Allamberganov, Anvar Shomurotovlarga leytenant unvoni berildi.

Shuningdek, Qoraqalpogʻiston Respublikasi Joʻqori Kengesi Prezidiumining 2023-yil 24-oktyabr kungi Qaroriga muvofiq, tuman IIB jinoyat qidiruv boʻlinmasi katta tezkor vakili kapitan Ulugʻbek Poʻlatov “Umit ushqini” koʻkrak nishoni bilan, tuman IIB xotin-qizlar masalalari boʻyicha katta inspektori leytenant Inobat Urazmatova Qoraqalpogʻiston Respublikasi Oila va xotin-qizlar qoʻmitasining tashakkurnomasi bilan taqdirlandi. Bundan tashqari, bir guruh faol va tashabbuskor soha xodimlari esdalik sovgʻalari bilan taqdirlandi.

Tadbir tuman Madaniyat boʻlimi tomonidan tayyorlangan kontsert dasturi bilan davom etdi. Tumanimizning taniqli sanʼatkorlari tomonidan ona Vatan, tinchlik, doʻstlik va muhabbatni tarannum etuvchi goʻzal-kuy qoʻshiqlar yangradi.

Ichki ishlar tizimida faoliyat yuritayotgan har bir xodim Vatanimizning asl oʻgʻlonlari sifatida zamonaviy bilimlarni egallagan, maʼnaviy va maʼrifiy dunyosi boy, har qanday xavf-xatarga qarshi matonat bilan kurashishga tayyor xalqimizning chin maʼnodagi himoyachilaridir. Fursatdan foydalanib, tinchligimiz posbonlarini yana bir bora kasb bayramlari bilan tabriklab, kelgusi ishlarida zafarlar tilaymiz!

Tuman hokimligi Axborot xizmati.