“YeRGULOBOD” FERMER XOʻJALIGIDA KUZGI IShLAR JADAL DAVOM ETMOQDA

Kuz faslining oxirgi oylarida dehqonlar hosilni yigʻib-terib olish bilan birga dalalarda kelasi yilgi dehqonchilik ishlariga ham tayyorgarlik koʻrishadi va moʻl hosilga zamin hozirlashadi. Amudaryo tumanining Oʻrtaqalʼa ovuli hududidagi “Yergulobod” fermer xoʻjaligida ham ayni kunlarda ob havoning ochiqligidan unumli foydalanilib, kuzgi ishlar qizgʻin davom ettirilmoqda.

Gulmurod Boboniyozov raislik qilayotgan mazkur fermer xoʻjaligi tasarrufida 88 gektar yer maydoni mavjud boʻlib, joriy yilda 52 gektarida “Sulton” navli paxta, 25 gektarida esa “Antonina” navli bugʻdoy yetishtirildi. Xoʻjalikda 21 nafar ishchi mehnat qilib, tumanimizning qishloq xoʻjaligi rivojiga oʻz hissalarini qoʻshib kelishmoqda. Bu yil paxtadan moʻl hosil toʻplashga erishilib, hosildorlik 34 tsentnerga yetkazildi va reja oshirib bajarilib, xirmonga 188 tonna “oq oltin” topshirildi.

Ish unumini oshirishda xoʻjalikdagi 1ta “Orion” rusumli surum, 2ta “MTZ – 80X” rusumli traktorlari, 1ta kombayn, 1ta ekskavator va LC – 100 lazerli yer tekislovchi texnikalardan foydalanilmoqda. Xoʻjalikda kelgusi yil hosili uchun qishloq xoʻjaligi ekinlaridan boʻshagan yer maydonlarni sifatli shudgorlashga kirishilib, shu paytga qadar 30 gektar yer maydonida surim ishlari yakunlandi. Suriladigan yer maydonlarga fosforli mineral oʻgʻitlarni ajratish, surimdan oldin berish hamda ushbu ishlarni toʻliq konturlarda amalga oshirishni taʼminlash, dala chetlari, simyogʻoch atroflarini shudgorlashga alohida eʼtibor berilmoqda.

Xoʻjalikning tajribali dehqonlari kuzgi shudgor muddatini toʻgʻri belgilash katta ahamiyatga ega boʻlgani sababli, bu ishlarni eng yuqori samara beradigan oktyabr-noyabr oylarda amalga oshirishga harakat qilishmoqda. Chunki, bu muddatlarda haydalgan yer dehqonchilik uchun muhim boʻlgan tuproqdagi nam zahirasini yaxshi saqlashga, yogʻin-sochindan unumli foydalanishga imkon beradi.

Fermer xoʻjalik hududida 25 gektar yer maydoniga ekilgan kuzgi bugʻdoy parvarishi ham eʼtibordan chetda qolayotgani yoʻq. Unib chiqqan bugʻdoy maysalarini oziqlantirish maqsadida gektariga 300 kg.dan mineral oʻgʻit berildi, 2-marta qondirib sugʻorildi. Buning natijasida nihollar rivoji yaxshilandi va kelasi yilgi moʻl hosildan darak berib, sovuq tushishidan oldin bachkilashga ulgurdi.

Xoʻjalikda 4 gektar yerda bogʻ ham barpo etilgan boʻlib, olma, nok, olxoʻri, uzum kabi 800 tupga yaqin mevali daraxtlar ayni paytda hosilga kira boshladi. Ushbu bogʻdagi mevali daraxtlar ham xoʻjalik ishchilari tomonidan parvarishlanib kelinmoqda. Ayni paytda ham ishchilar uyqu davriga kira boshlagan mevali daraxtlarning shoxlarini butab, shakl berishmoqda, tanasidan oʻsib chiqqan bachkilarini olib tashlashmoqda. Noyabr oyida daraxtlarga yaxob suvi berish juda foydali boʻlgani uchun bogʻ qator oralariga suv qaratishmoqda.

“Yergulobod” fermer xoʻjaligida “Yashil makon” umummilliy loyihasi doirasida bogʻ yaratish, obodonlashtirish ishlariga alohida eʼtibor qaratilmoqda. Hozirgi kunda oqava suv kelishini yaxshilash maqsadida hududdagi ariqlar yovvoyi oʻt-oʻlanlardan tozalanmoqda. Ariqlar chetlariga tut koʻchatlari oʻtqazilmoqda. Shu paytga qadar 600 tupga yaqin tut koʻchatlari ekildi. Shuningdek, yana qoʻshimcha 1 gektar yer maydoni ajratilib, yangidan mevali daraxtlar koʻchatlari koʻchirilmoqda. Dala chetlariga shu paytga qadar oʻtqazilgan uzum koʻchatlari esa 150 tupdan oshdi. Bogʻ qator oralaridan 0,50 sotix yerga ekilgan toʻqsonbosti ekinlaridan piyoz va sarimsoq piyoz ham unib chiqa boshladi.

Xoʻjalik raisi Gulmurod Boboniyozov xoʻjalik ishchilari, tajribali dehqonlar bilan hamjihatlikda kelgusi dehqonchilik yilida paxta hosildorligini 50 tsentnerga, gʻallani esa 80 tsentnerga yetkazishni rejalashtirishgan. Shuningdek, bogʻdan ham moʻl hosil yetishtirib, oʻz xonadonlari va el dasturxonini toʻldirishni niyat qilishgan.

Dalalarda sifatli oʻtkazilgan kuzgi ishlar kelgusi yil hosiliga puxta zamin hozirlaydi. Buni tajribada koʻrgan “Yergulobod” fermer xoʻjaligi ishchilari ochiq ob-havoli kunlarni gʻanimat bilib, bor kuch-gʻayratini kuzgi ishlarni yakunlashga qaratishmoqda.

O.Xudoyberganova.