44-sonli maktab — maʼnaviy-maʼrifiy ishlar yaxshi yoʻlga qoʻyilgan taʼlim maskanlaridan biri

Maktabda maʼnaviy-axloqiy tarbiya ishlarini tashkil qilish, tarbiyaviy ishlar rejasini ishlab chiqib, ijrosini nazorat qilish, muassasa oʻquvchilari, pedagoglari ishtirokidagi maʼnaviy-maʼrifiy tadbirlarning sifatini oshirish maktablar direktorlarining maʼnaviy-maʼrifiy ishlar boʻyicha oʻrinbosarlarining zimmasidagi asosiy vazifalardir. Shuningdek, milliy anʼana va qadriyatlar, xalqimizning boy maʼnaviy merosi asosida oʻquvchilarni vatanparvarlik ruhida tarbiyalash ishlarini tashkil etish, sinf rahbarlarining sinfdan va maktabdan tashqari tarbiyaviy faoliyatiga rahbarlik qilish, ota-onalar bilan yaqin hamkorlik qilish ham ularning vakolat doirasidagi masalalardir.

Qaysiki taʼlim muassasasida bu vazifalar masʼuliyat bilan ado etilayotgan boʻlsa, shu jamoada erishilayotgan yutuqlar ham salmoqli boʻladi.

Amudaryo telekanali tahrariyati tomonidan amalga oshirilayotgan “Yuksak maʼnaviyatli va axloqli yoshlar – kelajak poydevori” nomli grant loyihasi ish rejasiga muvofiq tumandagi 44-sonli maktab faoliyati bilan tanishish borasida bunga yana bir bor amin boʻldik.

Maktab maʼmuriyatining avvalo oʻqituvchi kadrlarni joy-joyiga qoʻyib, darslar samaradorligini qatʼiy nazorat qilib borayotgani, oʻz ustida ishlaydigan, taʼlimdagi innovatsion pedtexnologiyalarni puxta egallab, oʻz faoliyatida qoʻllay oladigan ilgʻor oʻqituvchilarni ragʻbatlantirib borayotgani oʻzining ijobiy samaralarini berayotir. Ayniqsa, maktab direktorining maʼnaviy-maʼrifiy ishlar boʻyicha oʻrinbosari Rufat Doʻsimbetov bu borada yoshlik gʻayrat-shijoati bilan ishlab, oʻqituvchilar, oʻquvchilar orasida hurmatga sazovor boʻlayotir.

U 1989-yilda tumanimizning Bobur nomli ovulida dunyoga keldi. Maktabni tamomlab, Qoraqalpoq davlat universitetining geografiya fakultetiga oʻqishga kirdi. Oʻqituvchilik faoliyatini 2011-yilda 44-sonli maktabda geografiya fani oʻqituvchisi boʻlib ishlashdan boshladi.

2015-2016-yillarda mazkur maktab “Kamolot” yetakchisi, 2018-yilda Yoshlar yetakchisi boʻlib ishladi. 2019-yil sentyabrdan boshlab, maktabning maʼnaviy-maʼrifiy ishlar boʻyicha direktor oʻrinbosari boʻlib ishlab kelmoqda.

U mazkur lavozimda ish boshlagan davridan boshlab, jamoasida sogʻlom maʼnaviy muhit barqaror boʻlishiga intildi. Yaxshi natijalarga erishayotgan muallimlarni ragʻbatlantirib, oʻquvchilarni ham dars mashgʻulotlarini puxta egallashga unday oldi, turli tanlovlar, bilimlar sinovlarida yuqori natijalarga erishgan oʻquvchilarni oʻrnak qilib koʻrsatish, orqali barcha oʻquvchilarni bilim asoslarini puxta egallashga undadi.

Joriy yilgi “Yosh kitobxon” koʻrik-tanlovining tuman bosqichida maktabning 11-sinf oʻquvchisi Rayhona Nazarboyeva ikkinchi oʻrinni egalladi, 8-sinf oʻquvchisi Rayhona Shomurodova shaxmat boʻyicha Qoraqalpogʻiston, Oʻzbekiston chempionati, nufuzli xalqaro musobaqalar gʻolibi, sovrindori, Farzona Tursunboyeva, Diyora Kenjaboyeva, Sevinchoy Gulimbetovalar sportning badiiy gimnastika turi boʻyicha oʻtkazilayotgan koʻpgina musobaqalarda muvaffaqiyatli qatnashmoqda.

“Besh tashabbus olimpiadasi” musobaqalarining joriy mavsumida oʻgʻil bolalar jamoasi voleybol boʻyicha tumanda ikkinchi oʻrinni egalladi. Yakunlangan oʻquv yilida muassasani 40 nafar oʻquvchilar tugatishgan boʻlsa, ularning 12 nafari turli oliygohlar talabalari boʻldilar.

Maktabning jismoniy tarbiya fani oʻqituvchisi Aʼzamjon Nurullayev tumanda eng yaxshi sport murabbiysi sifatida tan olingan, besh nafar oʻqituvchilar xalqaro va milliy sertifikatlarga ega.

Rufat Doʻsimbetov ularning safi kengayishi, oʻquvchilarning bilim asoslarini chuqur egallashlari uchun doimo izlanishda, intilishda.

Oygul RAJABOVA.