EKINLARNI BIOLOGIK USULDA HIMOYa QILISh AFZALLIKLARIGA BAGʻIShLANGAN SEMINAR BOʻLIB OʻTDI

Birlashgan millatlar tashkiloti maʼlumotlariga koʻra hozirgi kunda jahon aholisining 815 million nafardan ortigʻi ochlik azobini tortayapti. Toʻyib ovqatlanish imkoniga ega boʻlmagan qatlam ham mavjud.

Shunday sharoitda mamlakatimiz qishloq xoʻjaligida oziq-ovqat mahsulotlari yetishtirishni koʻpaytirish, ekin maydonlardan unumli foydalanish borasida amalga oshirilayotgan keng koʻlamli ishlar tufayli xalqimiz dasturxoni toʻkin, turmushi obod. Bu boradagi ishlarning samaradorligini yanada oshirish maqsadida qishloq xoʻjaligida chuqur islohotlar amalga oshirilmoqda. Xususan, sohada bozor munosabatlarini keng joriy etish, qayta ishlash va eksport infratuzilmasini rivojlantirish, shu asosda fermer va dehqonlarning daromadini oshirish yuzasidan aniq chora-tadbirlar koʻrilayotir.

Qishloq xoʻjaligi mahsulotlari yetishtirishni koʻpaytirishda ekinlarni karantindagi va boshqa iqtisodiy xavfi yuqori boʻlgan zararkunandalardan himoya qilish ham muhim oʻrin tutadi. Zararkunandalar koʻpayishining oldini olishda ekin maydonlarida kuzgi tadbirlarni sifatli oʻtkazish, dala chetlaridagi ariq-zovurlarni sifatli tozalashning ahamiyati katta. Qolaversa, maydonlardagi, issiqxonalardagi yetishtirilayotgan ekinlarni zararkunandalardan himoya qilishda biologik usul muhim oʻrin tutadi.

Amudaryo tumanining Toshyop ovulida faoliyat yuritayotgan “Mangʻit invest plyus” masʼuliyati cheklangan jamiyatiga qarashli issiqxonada ekinlarni zararkunandalardan himoya qilishda biologik usulning ahamiyati, feromon tutqichlardan foydalanish usullariga bagʻishlangan seminar ham aynan shu maqsadda oʻtkazildi.

Tadbirga Oʻsimliklar karantini va himoyasi agentligi Amudaryo tumani boʻlimi xodimlari, tuman qishloq xoʻjaligi sohasi masʼullari, qishloq xoʻjaligida faoliyat yurituvchi tadbirkorlar ishtirok etdilar.

Seminarda Qoraqalpogʻiston Respublikasi Oʻsimliklar karantini va himoyasi agentligi Amudaryo tuman boʻlimi xodimlari NodirbekOʻrozov, Anvar Rahimov, Murot Ibragimov, Ulugʻbek Xudoyberganovlar ekinlarni biologik himoya qilishning afzalliklari xususida, shuningdek, bu borada Respublika Oʻsimliklar karantini va himoyasi agentligi tomonidan ishlab chiqilgan “Agro ko’makchi” mobil ilovasidan foydalanish borasida maʼlumotlar berdilar.

“Agro ko’makchi” maxsus ilovasi orqali fermerlar, tomorqa yer egalari zararli organizmlar, begona oʻtlar haqida batafsil maʼlumotga ega boʻlib, ularga qarshi kurashish boʻyicha tavsiyalar olishi mumkin. Shuningdek, ilovada sinov va roʻyxatdan oʻtgan oʻsimliklarni himoya qilish vositalari va mineral oʻgʻitlar, eksport uchun ochilgan bozorlar, hududlarda faoliyat yuritayotgan biolaboratoriyalar, oʻsimliklar klinikalari, qadoqlovchi korxonalar xususida foydali maʼlumotlar jamlangan.

Mamlakatimiz aholisining taxminan 40 foizi qishloq xoʻjaligi mahsulotlari yetishtirish bilan shugʻullanadi. Bunday katta qatlamni zaruriy maʼlumotlar bilan taʼminlash, oʻsimliklarni zararli organizmlardan toʻgʻri himoya qilish yuqori hosildorlik garovidir. Buning uchun “Agro ko’makchi” mobil ilovasidan foydalanishning oʻzi yetarlidir.

Seminarda bu haqda batafsil soʻz yuritildi. Mutaxassislar ishtirokchilarni qiziqtirgan savollarga batafsil javoblar berdilar.

Oygul RAJABOVA.