MTTLARDA SOGʻLOM VA XAVFSIZ OVQATLANTIRIShNI TAShKIL ETISh MAVZUSIDA SEMINAR-TRENING OʻTKAZILDI

Maktabgacha taʼlim tashkilotlarida sogʻlom va xavfsiz ovqatlantirishni tashkil etish boʻyicha chora-tadbirlarni amalga oshirishga doir masalalar yuzasidan seminar-trening tashkil etildi.

Seminarda Oʻzbekiston Respublikasi Oliy Majlis Qonunchilik palatasi Fan, taʼlim, madaniyat va sport masalalari Komitetining 2023-yil 5-iyundagi tegishli qarorida belgilangan vazifalarning bajarilishini taʼminlash va “Maktabgacha taʼlim tashkilotlarida sogʻlom va xavfsiz ovqatlantirishni tashkil etish” boʻyicha chora-tadbirlarni amalga oshirish masalalari yuzasidan soʻz yuritildi. Shuningdek, Oʻzbekiston Respublikasi Vazirlar Mahkamasining 2019-yil 25-iyuldagi “Davlat maktabgacha taʼlim muassasalarida sogʻlom ovqatlantirish tizimini yanada takomillashtirish toʻgʻrisida”gi tegishli qarori va 2021-yil 30-iyundagi “Davlat maktabgacha taʼlim tashkilotlarida sogʻlom ovqatlantirish tizimini takomillashtirishning qoʻshimcha chora-tadbirlari toʻgʻrisida”gi qarorlari asosida MTTlarda sogʻlom ovqatlantirishni tashkil etish, tarbiyalanuvchilarning sogʻlom va barkamol oʻsishini taʼminlash, oshxonalarda sifatli taomlar tayyorlash uchun gigiyenik talablarga muvofiq sharoitlar yaratishga alohida eʼtibor qaratish kerakligi taʼkidlandi.

Seminarda tuman SEO va JSBning sanitariya-gigiyena boʻlimi mudirasi N.Yeshimova kun tartibidagi masala yuzasidan maʼruza qildi va tarbiyalanuvchilarga sarflanadigan oziq-ovqat mahsulotlarining kunlik miqdori sanitariya normalari, qoidalari va gigiyena normativlari asosida belgilanishi talab etilishini, tarbiyalanuvchilar uchun taomlar sanitariya-gigiyena meʼyorlari va normativlari hamda ovqatlanish texnologiyasi qoidalariga amal qilgan holda tayyorlash, saqlash tartibi toʻgʻrisida gapirib oʻtdi.

Seminar davomida savol-javoblar oʻtkazilib, qatnashuvchilar tomonidan bildirilgan fikr-mulohazalar tinglandi va tegishli qarorlar qabul qilindi.

S.Patullayeva, MMTB metodisti.