Qoraqalpoq tili bayrami kuni munosabati bilan bayram tadbiri oʻtkazildi

Til – har bir millatning ulkan boyligi, benazir qadriyati va bebaho mulki hisoblanadi. Har bir xalq, har bir elat, oʻzi hurmat va ehtirom qiladigan tilga ega. Tilda ana shu tilning ijodkori boʻlgan xalq, elatning tarixi va madaniyati aks etadi. Ayni zamonda, til ijtimoiy taraqqiyotda ulugʻvor ahamiyat kasb etadi. Til – har bir millat oʻzligining ajralmas belgisidir.

1989-yil 1-dekabr — Qoraqalpogʻiston Respublikasi tarixidagi muhim sanalardan biridir. Shu kuni qoraqalpoq tiliga davlat tili maqomi berilgan. Har yili bu sana keng nishonlanib kelinadi.

Ushbu sana munosabati bilan 1-dekabr kuni Amudaryo tumani Madaniyat boʻlimida “Marteben balent bolsin, ana tilim” deb nomlangan tadbir boʻlib oʻtdi.

Tadbirda tuman hokimining oʻrinbosari – investitsiyalar va tashqi savdo boʻlimi boshligʻi Faxriddin Yusupov, Davlat tili toʻgʻrisidagi qonun hujjatlariga rioya etilishini taʼminlash masalalari boʻyicha tuman hokimi maslahatchisi Ashirboy Qoʻshayev, tumandagi umumtaʼlim maktablarning bir guruh qoraqalpoq tili va adabiyoti fani oʻqituvchilari hamda oʻquvchilar ishtirok etdilar.

Tadbir boshida Oʻzbekiston va Qoraqalpogʻiston Respublikalarining davlat madhiyalari yangradi. Soʻngra tuman hokimining oʻrinbosari – investitsiyalar va tashqi savdo boʻlimi boshligʻi Faxriddin Yusupov soʻzga chiqib, bayram tadbirini ochib berdi hamda yigʻilgan tadbir ishtirokchilarini qoraqalpoq tiliga davlat tili maqomi berilgan kun bilan tabrikladi.

Taʼkidlanganidek, til – bu xalqning tarixini, madaniy merosini, turmush tarzini, urf-odat va anʼanalarini oʻzida mujassam etgan bebaho xazinadir. Shu bois ham soʻnggi yillarda yurtimizda qoraqalpoq tilini asrab-avaylashga, uni yanada boyitishga davlat siyosati darajasida eʼtibor qaratilmoqda.

Xususan, qator ilmiy hamda badiiy kitoblarning qoraqalpoq tilidagi tarjimalari nashr etilgani, qoraqalpoq tilining tozaligini saqlashda muhim oʻrin tutadigan lotin imlosidagi “Qoraqalpoq tilining orfografik lugʻati” chop etilgani qoraqalpoq tiliga boʻlgan yuksak eʼtibor va gʻamxoʻrlik ifodasidir.

Qoraqalpoq tiliga davlat tili maqomi berilgan kun munosabati bilan tuman boʻylab taʼlim muassasalari, ovul va mahallalarda bayram tadbirlari, uchrashuvlar, adabiy kechalar va turli koʻrik-tanlovlar oʻtkazilayotgani ham yuksak ehtiromning yorin namunasidir.

Bayram tadbiri davomida koʻp yillik tajribaga ega qoraqalpoq tili oʻqituvchilari ham soʻzga chiqib, qoraqalpoq tilini asrab-avaylash, uning nufuzini oshirish, rivojlantirish mamlakat taraqqiyotining muhim omili hisoblanishini, shu jihatdan qoraqalpoq tilining davlat tili sifatidagi maqomini mustahkamlash yoʻlida keng koʻlamli ishlar amalga oshirilayotgani haqida aytib oʻtdilar.

Qoraqalpoq xalqining atoqli adiblari, yozuvchi va shoirlari nomidagi ijod maktablarida bugun yoshlar bebaho boylik sanalmish qoraqalpoq tili va milliy adabiyotning sir-asrorlarini oʻrganmoqda. Bularning barchasi qoraqalpoq xalqining maʼnaviy boyligi boʻlgan ona tili taraqqiyotiga yuksak eʼtibor samarasidir.

Tadbirda maktab oʻquvchilari qoraqalpoq adabiyoti namunalaridan sheʼrlarni ifodali oʻqib, yigʻilganlarning olqishlariga sazovor boʻldilar. Qoraqalpoq xalqining milliy urf-odat va anʼanalarini oʻzida mujassam etgan sahna koʻrinishlari namoyish etilib, milliy kuy-qoʻshiqlar yangradi.

Tuman Madaniyat boʻlimi tomonidan tayyorlangan kontsert dasturi davomida qoraqalpoq xalqining tarixini, milliy qadriyatlarini, urf-odat va dasturlarini oʻzida mujassam etgan raqslar bilan bayram tadbiri koʻtarinki ruhda davom etdi.

Sevara Ismoilova