TEXNIKALAR KELGUSI MAVSUMGA PUXTA TAʼMIRLANMOQDA

Dehqon uchun yilning barcha faslida ham dolzarb yumushlar bor. Asosiy qishloq xoʻjalik ekini – paxta yigʻim-terimi tugashi bilan yerlarni shudgorlash, dalalar chetlarini yovvoyi oʻtlardan tozalash, suv yoʻllarini tayyorlash kabi ishlar bilan bir qatorda texnikalarni taʼmirlashga ham kirishiladi.

Xalqimiz “Texnika ­– dehqonning qoʻl-qanoti” deb bejizga aytmagan. Qishloq xoʻjaligi texnikalarini qishda koʻklamga ekishga puxta tayyorlash yangi mavsum ishlarining oʻz vaqtida va samarali ado etilishiga zamin boʻladi.

Shu boisdan ayni kunlarda Amudaryo tumanida ham kelgusi yilgi mavsum davomida ishlatiladigan texnikalar sifatli taʼmirlanib, mavsumga shay qilinmoqda. Mavjud qishloq xoʻjaligi texnikalari 18ta ustaxonalarga yigʻilib, taʼmirlanayotir.

Oʻzbekiston Respublikasi Qishloq xoʻjaligi vazirligi huzuridagi Agrosanoat majmui ustidan nazorat qilish inspektsiyasining Amudaryo tuman boʻlimi masʼul xodimlari tumandagi qishloq xoʻjalik texnikalarining belgilangan ustaxonalarga yigʻilishi, taʼmirlash ishlarining borishi bilan tanishib chiqmoqdalar.

Oʻrganishlar davomida Bobur nomli ovulda faoliyat yuritayotgan “Haytakov Ulugʻbek” fermer xoʻjaligida lazerli tekislagich yordamida ekindan boʻshagan yerlarning tekislanishi koʻzdan kechirildi. Mazkur xoʻjalikning 37 gektar paxta ekilgan maydoni lazerli tekislagich yordamida tekislanib, bahorgi sugʻorishga tayyorlanmoqda. Bu mazkur maydonlarda kelgusi yilda ekilgan qishloq xoʻjaligi ekinlaridan moʻl hosil olish imkonini beradi. Boisi, lazerli tekislagich yordamida yer sifatli tekislanib, yerning qonib suv ichishiga, ekilgan urugʻning bir tekis unib chiqishiga imkon yaratiladi.

Masʼullar tumanning Oq oltin ovulida kelgusi yil koʻklamida ekish ishlarida qatnashadigan texnikalarning taʼmirlanishini ham koʻzdan kechirdilar.

Mazkur muqobil mashina traktor parki ustaxonasiga 9 dona chigit ekish seyalkasi, 15 dona kultivator, 130 dona tishli tirma, 14 dona temir mola yigʻilib, kelgusi mavsum ishlarida sifatli ishlashi uchun taʼmirlash ishlari boshlab yuborilgan.

Qish fasli – ish fasli. Ushbu faslda texnikalar ustaxonalarga yigʻilib, sifatli taʼmirlansa, koʻklamda ish surʼati yuqori boʻladi.

Shuni hisobga olgan holda barcha texnikalarni ustaxonalarga yigʻish va sifatli taʼmirdan chiqarish uchun harakat boshlab yuborilgan.

Aytish joizki, kelgusi yil koʻklamgi ekish mavsumida va gʻoʻza tarbiyasida ishlatiladigan 150ta seyalka, 350ta kultivator, 1700 dona tishli boronalar, 295 dona temir mola 18ta nuqtada taʼmirlanishi belgilangan.

Taʼmirlash ishlarining borishi va barcha texnikalarning belgilangan ustaxonalarga yigʻnalishi Oʻzbekiston Respublikasi Qishloq xoʻjaligi vazirligi huzuridagi Agrosanoat majmui ustidan nazorat qilish inspektsiyasining tuman boʻlimi tomonidan muntazam nazorat qilib boriladi. Boisi, qishloq xoʻjaligi ekinlarini ekishdan tortib, hosilini yigʻishtirib olishgacha boʻlgan jarayonlarni texnikalar yordamisiz tasavvur etish qiyin.

Oygul RAJABOVA.