QILIChBOY OVULI AHOLISINING IJODKORLAR BILAN UChRAShUVI BOʻLIB OʻTDI

Mahallalarda, oilalarda ijtimoiy-maʼnaviy muhit barqarorligiga hissa qoʻshish, erta turmush qurish va qarindoshlar oʻrtasidagi nikohlarning oldini olish, yoshlarning dunyoqarashini va maʼnaviyatini yuksaltirish, ularni yot gʻoya va illatlardan himoya qilish maqsadida. amunews.uz veb-sayti tomonidan amalga oshirilayotgan “Sogʻlom muhit – sogʻlom hayot” nomli grant loyihasi doirasida tumanimizning barcha hududlarida turli tadbirlar amalga oshirilmoqda.

Shu yilning 22-dekabrida tumanimizning Qilichboy ovul fuqarolar yigʻini maʼmuriy binosida mazkur grant loyihasi rejasiga muvofiq  oilalarda ijtimoiy-maʼnaviy muhit barqarorligini taʼminlashga hissa qoʻshish maqsadida ovul aholisining tumanimizda yashab ijod qilayotgan shoir, yozuvchilar bilan uchrashuvi oʻtkazildi.

Tadbirda loyiha ijrochilaridan Oygul Rajabova, Oʻzbekiston Yozuvchilar uyushmasi aʼzosi Zulfiya Ollayorova, iqtidorli ijodkor Zuhra Ahmedovalar ishtirok etdilar.

Tadbirni jurnalist, Oʻzbekiston Jurnalistlari ijodiy uyushmasi aʼzosi Oygul RAjabova ochdi va olib bordi. U oʻz soʻzida avval tumanimizda yashab ijod qilayotgan shoir, yozuvchilarning bugungi ijodiy faoliyatlari, nashr etilayotgan yangi kitoblari xususida, adabiy jarayonning tumanimizda ijtimoiy-maʼnaviy muhitni yaxshilashdagi roli haqida maʼruza qildi.

Shuningdek, ovul fuqarolar yigʻini masʼul xodimi Amina Toʻrayeva mavzu yuzasidan oʻz fikrlarini bildirdi va tashrif buyurgan ijodkorlarga minnatdorchilik bildirdi.

Shundan soʻng Zulfiya Ollayorova, Zuhra Ahmedovalar yigʻilganlarga oʻz ijodkorlaridan namunalar oʻqib berdilar.

Sheʼr – koʻngil mulki. Unda inson tafakkuri, xotirasi, orzu-niyatlari, intilishlari, hayotiy qarashlari aks etadi. Sheʼr eng avval inson tasavvurida tugʻiladi va aql tarozisida tortilib, charxlanib, qogʻozga toʻkiladi. Ushbu jarayondagi ijodkorning holatini xuddi yangi farzand dunyoga keltirayotgan onaga qiyoslashadi.

Donishmandning “sheʼr yozilmaydi, tugʻiladi”, degan soʻzlari ham ayni haqiqat. Shu boisdan ham ijodkorning koʻnglidan silqib chiqqan tuygʻular tasviri sheʼrlar, badiiy asarlar hech kimni eʼtiborsiz qoldirmaydi.

Mazkur davrada ham buning isboti yaqqol namoyon boʻldi. Zulfiya Ollayorova, Zuhra Ahmedovalar oʻqib bergan sheʼrlarni yigʻilganlar zavq bilan tingladilar va qarsaklar bilan olqishlab turdilar, oʻzlarini qiziqtirgan savollarni berib, atroflicha javoblar oldilar.

Shuningdek, badiiy ijodga qiziqadigan hududdagi 69-sonli maktab 10-sinf oʻquvchisi Ozoda Rajabboyeva ham oʻzining ozod tafakkur, milliy gʻurur va sohir tuygʻulari aks etgan sheʼrlaridan oʻqib berdi.

Tadbirda ovul faollaridan Amina Toʻrayeva, Bozorboy Yusupovlar soʻzga chiqib, ovul aholisi bilan uchrashuvga kelganliklari uchun ijodkorlarga cheksiz minnatdorchilik bildirdilar.

Ijodiy uchrashuv barcha ishtirokchilarda ulkan taassurotlar qoldirdi.

Sevara Ismoilova.