AMUDARYoDA BIR GURUH QIShLOQ XOʻJALIGI SOHASI XODIMLARI TAQDIRLANDI

Amudaryo tumanida joriy yilgi qishloq hoʻjaligi sohasida bir qancha yutuqlarga erishildi. Yil davomida gʻalla, paxta, sabzavot va poliz ekinlarini yetishtirish, bogʻdorchilik, chorva, baliqchilik va parrandachilik yoʻnalishlarini rivojlantirish borasida samarali ishlar olib borilib, yuqori natijalarga erishildi.

28-dekabr kuni “Beshgujum” toʻyxonasida ochiq va toʻkin dasturxon atrofida soha xodimlari uchun bayram tadbiri tashkil etildi. Tadbirda Qoraqalpogʻiston Respublikasi Vazirlar Kengashi, Qishloq xoʻjaligi vazirligidan bir guruh masʼullar, Amudaryo tumani hokimi Sobir Xoʻjametov, sektorlar rahbarlari, hokim oʻrinbosarlari hamda tumandagi qishloq xoʻjaligi sohasi mutasaddilari, xodimlari ishtirok etishdi.

Bayram tadbirida soʻzga chiqqan Qoraqalpogʻiston Respublikasi Vazirlar Kengashi, Qishloq xoʻjaligi vazirligidan tashrif buyurgan bir guruh masʼullar hamda Amudaryo tumani hokimi Sobir Xoʻjametov qishloq xoʻjaligi sohasida fidokorona mehnat qilayotgan xodimlarning yil davomidagi mehnatini eʼtirof etib oʻtishdi. Mamlakatimizning qishloq xoʻjaligi sohasiga qoʻshayotgan hissasi va mehnati uchun tumandagi barcha fermer hoʻjaliklari rahbarlari, soha mutasaddilariga minnatdorchilik bildirishdi. Shuningdek, barchasini kirib kelayotgan yangi 2024-yil bilan qutlab, kelgusi yilda yangi yutuq va zafarlar tilashdi.

Undan tashqari, tadbir davomida qishloq xoʻjaligi yilida yuqori koʻrsatkichlarga erishgan 37 nafar ilgʻor fermer va dehqonlar, tomorqachilarga Oʻzbekiston fermer, dehqon va tomorqa yer egalari Kengashi tomonidan berilgan “Ilgʻor fermer”, “Mehnatkash dehqon”, “Namunali tomorqachi” nomli koʻkrak nishonlari topshirildi. Joriy yil davomida fidoyilik koʻrsatgan 87 nafar qishloq xoʻjaligi xodimlariga tuman hokimligining tashakkurnomalari, esdalik sovgʻalari berildi.

Taʼkidlanganidek, tumanimiz hududida jami 102 ming 119 gektar yer maydoni boʻlib, shundan, 32 ming 506 gektari sugʻoriladigan ekin yerlar, 38 ming gektari boʻz yerlar, 450 gektari bogʻlar, 39 gektari uzumzorlar, 887 gektari tutzorlarni tashkil qiladi. Jami sugʻoriladigan qishloq xoʻjalik yerlari 32 ming 920 gektarni tashkil qiladi. Hozirgi kunda tumanimiz hududida jami 45 ming 740 gektar maydonda 608 nafar fermer va qishloq xoʻjalik korxonalari faoliyat koʻrsatmoqda.

2023-yilgi dehqonchilik yilida tumandagi 361 ta fermer xoʻjaliklarining jami 7000 gektar yer maydoniga gʻalla urugʻlari ekilgan edi. Ushbu maydonlardan rejadagidan ham moʻl hosil yetishtirildi. Ekin maydonlarining 13 ming 900 gektariga koʻklamda chigit ekilgan edi. Yil boshidan beri dehqonlarning ulkan marralarni koʻzlab qilgan fidoyi mehnatlari, gʻoʻza parvarishi davrida agrotexnik tadbirlarning oʻz vaqtida sifatli ado etilgani paxta maydonlarida moʻl hosil toʻplanishini taʼminladi va 47 ming tonna paxta xom ashyosi yetishtirildi.

Aholining oziq-ovqat mahsulotlariga boʻlgan talabini qondirishda gʻallachilikning oʻrni alohidadir. Shular inobatga olingan holda 2024-yilgi hosil uchun 5 ming 630 gektar maydonga gʻalla ekildi va toʻliq nihol undirib olishga erishildi. Shuningdek, xalqimizning ertaki sabzavot mahsulotlariga boʻlgan talabini toʻliq qondirish maqsadida hosildan boʻshagan maydonlarning 1777 gektariga sovuqqa chidamli piyoz va sarimsoqpiyoz kabi ekinlar toʻqsonbosti usulida ekildi.

Qishloq xoʻjaligi xodimlarini taqdirlash munosabati bilan Yangi yil bayrami arafasida oʻtkazilgan mazkur tadbirda tuman Madaniyat boʻlimi xodimlari tomonidan kuy-qoʻshiqlar namoyish etilib, barchaga koʻtarinki ruh baxsh etildi.

O.Xudoyberganova.