Sayyor qabullar – murojaatlar yechimiga xizmat qilmoqda

Inson manfaatlarini taʼminlash uchun avvalo, odamlar bilan, xalq bilan muloqot qilish, ularning hayotiy muammo va ehtiyojlarini oʻrganish alohida ahamiyat kasb etadi.

Mamlakatimizda  mutasaddi rahbarlarning aholini qiynab kelayotgan muammolar bilan ishlashda murojaatlardagi masalalarni joylarga chiqib oʻrganishi hamda ularni ijobiy hal etishi borasidagi  amaliy ishlari yangi bosqichga koʻtarildi.

Butun mamalakatimiz boʻylab joylarda turli darajadagi rahbarlarning aholi bilan ochiq muloqotlari, sayyor qabullari tashkil etilib, fuqarolarning muammolari oʻrganilmoqda hamda ularni bartaraf qilish choralari koʻrilmoqda.

Xalq davlat idoralariga emas, davlat  idoralari xalqimizga xizmat qilishi kerak. Bugun bu fikr shunchaki balandparvoz gap emas, davlat organlari oldiga qoʻyilgan eng asosiy talablardan biri desak, adashmagan boʻlamiz.

2023-yil 29-dekabr kuni Qoraqalpogʻiston Respublikasi Vazirlar Kengashi Raisi Farhod Ermanov, Qoraqalpogʻiston Respublikasi Vazirlar Kengashi raisi oʻrinbosari Maryam Ahmedovalarning tumanimizning Oybek mahallasidagi 55-sonli maktabda sayyor qabuli oʻtkazildi.

Mazkur sayyor qabulda sektorlar rahbarlari, tuman hokimi oʻrinbosarlari, tegishli korxona, tashkilot rahbarlari hamda oʻz muammolari bilan tumanning turli hududlaridan kelgan aholi ishtirok etishdi.

Qabulda 30ga yaqin fuqarolar oʻzlarini qiynab kelayotgan muammo va takliflari bilan murojaat qildilar.

Murojaatlar asosan, kredit olish, sogʻligini tiklash uchun mablagʻ soʻrash, yoʻllarni taʼmirlash, ichimlik suvi tarmogʻini tortish, bandlik masalalarida amaliy yordam berilishi  va boshqa masalalarda boʻldi.

Sayyor qabulda yurtimizda amalga oshirilayotgan keng koʻlamdagi bunyodkorlik ishlari, yangidan ishga tushirilayotgan tadbirkorlik subʼektlari, ishlab chiqarish va xizmat koʻrsatish korxonlari faqatgina xalq manfaatini taʼminlash, ularning yashash sharoitni yaxshilash maqsadida amalga oshirilayotganligi taʼkidlandi.

Sayyor qabulda murojaatlarning hech biri eʼtibordan chetda qolmasligi va har bir murojaat imkon qadar ijobiy yechim topishi taʼkidlandi.

Sayyor qabul davomida Oybek mahallasida istiqomat qiluvchi fuqaro Nurbek Tajimuratov bandlik masalasi boʻyicha murojaat qildi.

Shuningdek, Oq oltin ovulidan Oʻrinboy Shomuratov uy-joyini taʼmirlash hamda moddiy yordam masalasi boʻyicha murojaat qildi.

Sayyor qabulda elektr energiyasi, ichimlik suv taʼminoti, bolalar nafaqasi, kredit olish va boshqa qator masalalar bilan bogʻliq murojaatlarning aksariyati joyida hal etildi.  Maʼlum vaqt hamda atroflicha oʻrganishni talab etadigan murojaatlarni hal etish boʻyicha mutasaddi rahbarlarga tegishli topshiriqlar, murojaat qiluvchilarga zarur tushuncha va tavsiyalar berildi, ijrosi nazoratga olindi.

Bu kabi tadbirlarning oʻtkazilib, xalq bilan faol va ochiq muloqotlar olib borilishida, avvalo inson huquq hamda manfaatlarini taʼminlash orqali xalqimizning farovon, baxtli hayot kechirishi uchun munosib shart-sharoit yaratish maqsad qilingan.

Ha, inson shaʼni, qadri ulugʻ tutilayotgan mamlakatimizda amalga oshirilayotgan barcha islohotlardan koʻzlangan maqsad ham  aholining oʻz hayotlaridan rozi boʻlib yashashiga erishishdir.

Tuman hokimligi Axborot xizmati