QILIChBOYLIK KITOBXON YoShLAR IShTIROKIDA “KITOB OʻQISh SAODATDIR” DEB NOMLANGAN DAVRA SUHBATI OʻTKAZILDI

Kitob insonni bilim va ilmlar xazinasi sari yetaklaydi. Hayotimizni yoritguvchi ushbu kitoblar umrimizga mazmun kiritadi, yoʻllarimizni nurafshon qilib, saodatga eltadi. Yosh avlodning komil insonlar boʻlib voyaga yetishlarida ham kitoblar va kitobxonlikning gʻoyat ahamiyati kattadir. Shu bois yurtimizda kitobxonlar safini kengaytirish, ayniqsa, yoshlarni kitobxonlikka qiziqtirishga alohida eʼtibor qaratilmoqda.

Amudaryo tumanining Qilichboy ovulidagi 83-sonli maktabda oʻqituvchilar bilan hamkorlikda tumandagi “Taraqqiyot koʻzgusi” gazetasi tahririyatining “Bilimli va maʼnaviyatli yoshlar bilan – Uchinchi Renessans sari” nomli grant loyihasi ish rejasiga koʻra oʻtkazilgan “Kitob oʻqish saodatdir” deb nomlangan davra suhbatida aynan shu xususda soʻz yuritilib, kitoblarning inson hayotida tutgan oʻrni eʼtirof etildi.

Tadbirda tahririyat xodimlari, loyiha ijrochilari, tumandagi Axborot-kutubxona markazi xodimlari, maktab oʻqituvchilari, kitobxon yoshlar, ovul kutubxonasida uzoq yillar davomida kitobxonlarga xizmat qilgan va yoshlarni kitobxonlikka qiziqtirib, dunyoqarashi kengayishi, tafakkuri boyishiga, kasbu-korli insonlar boʻlib yetishishiga hissa qoʻshgan, hozirgi kunda keksalik gashtini surayotgan onaxon Odinaxon Musayeva hamda uning shogirdlari qatnashishdi.

Davra suhbatini maktabning ona tili va adabiyot fani oʻqituvchisi Muqaddas Allaberganova olib bordi hamda tadbir boshlanishida ishtirokchilarni yaqindan tanishtirib oʻtdi. Oʻz kasbining fidoyisi, ovulda kitobxonlar safi kengayishiga, ularning ziyoli insonlar boʻlib yetishishiga sababchi boʻlgan ziyokor inson Odinaxon momo Musayevaning xizmatlarini alohida eʼtirof etdi.

Qilichboy ovulidagi fuqarolar yigʻini binosida joylashgan kutubxonada uzoq yillar mehnat qilgan Odinaxon Musayeva 1950-yilda Toshkent viloyatida tugʻilgan. Asli Fargʻonalik boʻlgan ota-onasi taqdir taqozosi bilan urush yillarida Toshkent viloyatiga koʻchib kelishgan. Oilada Odinaxon bilan birga 4 oʻgʻil va 1 qiz ulgʻayishgan. Uni yashab turgan joylariga yaqin boʻlgan qozoq maktabiga oʻqishga berishgan. Shunday boʻlsa-da, zehni oʻtkir qiz maktabni muvaffaqiyatli tugatgan va Toshkent shahridagi Madaniy oqartuv texnikumining kutubxonachilik yoʻnalishida tahsilni davom ettirgan.

Ustozi Mahfuza Alimxojayevaning: “Kutubxonachi hammaga kerakli inson, unga barcha kasb egalari murojaat qiladi, u ham har qanday kasb egasi boʻlishi mumkin” – degan soʻzlaridan ruhlanib, aʼlo baholarga oʻqigan Odinaxon Musayevaga 1968-yilda oʻqishni tugatganidan soʻng, Moskva shahriga yoʻllanma berishdi. Lekin u Oʻzbekistonda qolishga qaror qildi va Toshkent Davlat chet tillar pedagogika instituti kutubxonasining oʻquv zali kutubxonachisi boʻlib ishga joylashdi. Keyinchalik oʻsha paytdagi Nizomiy nomidagi Toshkent Davlat pedagogika institutining kutubxonachilik fakultetiga sirtdan oʻqishga kirib, tahsilni davom ettirdi. Odinaxon Musayeva 1973-yilda qoraqalpogʻistonlik Yangiboy Bobojonov bilan umr yoʻllarini bogʻladi va Qilichboy eliga kelin boʻlib tushdi.

Kitobxonlik tadbirida ishtirok etgan Odinaxon Musayevaning shogirdi Sayyora Abdurahmonova ham onaxonning eng birinchi shogirdlaridan biri ekanligini eʼtirof etib, ovuldagi kutubxonaning fayzli maskanga aylanishida uning mehnatlari katta ekanligini taʼkidladi. Shuningdek, kutubxonada kitoblarni mazmuniga qarab joylashtirishni, kutubxona aʼzolarining roʻyxatini, kataloglarini tartib bilan taxlashni, kitobxonlar bilan muomala qilishni va hatto, shaxsiy hayotida ham ustozining maslahatlariga koʻra toʻgʻri yoʻl tutishni oʻrganganini, ustozga mehri, ehtiromi katta ekanligini faxr bilan soʻzladi. Tumandagi Axborot-kutubxona markazi xodimlari Rohatoy Romanova, Gulruh Avazmetova, Gulasal Qoʻchqorova, ovuldagi 15-sonli maktab oʻqituvchilari Nigora Mirzayeva, Goʻzal Bekmuradovalar ham kitoblarning inson hayotidagi tutgan oʻrni, ahamiyati haqida gapirib, ish jarayonida Odinaxon Musayevaning har bir kitobxon bilan oʻqigan kitoblari toʻgʻrisida soʻzlashishlari, yana yangi kitoblar oʻqishga daʼvat etishlari, oʻzlarining kasb tanlashlarida, bilimli boʻlishlarida, ovul yoshlarining maʼnaviyatli insonlar boʻlib ulgʻayishlarida onaxonning hissasi kattaligini toʻlqinlanib gapirdilar.

Davra suhbati davomida kitobxon yoshlar ishtirokida oʻtkazilgan “Eng faol kitobxon” mashgʻuloti ham juda qiziqarli boʻldi. Kitobxonlarga savollar yozilgan qogʻozlar tarqatib berildi va eng mazmunli deb topilgan javoblarga koʻra gʻoliblar aniqlandi. Maktabning 9-sinf oʻquvchisi Ozoda Rajabboyeva oʻzi oʻqigan kitoblarni toʻliq tavsiflab bera olgani uchun eng faol kitobxon deb topildi. Shuningdek, 5-sinf oʻquvchisi Shaydo Madrasulova, Sadoqat Olimovalar ham faol kitobxonlar safidan joy olishdi. Maktabning 1-sinf oʻquvchisi, barchani kitobxonlikka chorlab kelayotgan onaxon Odinaxon Musayevaning nevarasi Foziljon Yangiboyev Alifbeni kitoblarning eng sarasi deb bilishini, harflar esa uning qahramonlari ekanligini aytganida zukkoligi bilan kitobxonlarning olqishlariga sazovor boʻldi.

Kitobxon yoshlar ragʻbatlantirilganidan soʻng, suhbat davom ettirildi va Qilichboy ovul fuqarolar yigʻini raisi Bahrom Qodirov hududda aholini kitobxonlikka jalb etish, kitobxon yoshlar safini kengaytirish borasida olib borilayotgan ishlar xususida soʻzladi. Kitobning umr yoʻllarini yorituvchi soʻnmas nur, inson hayotiga mazmun kirituvchi, maʼnaviy kamolotini taʼminlovchi kuchli qudratga ega vosita ekanligini aytib, yigʻin binosida ham kutubxona tashkil etilgani, kitoblar soni koʻpaytirilayotgani, yoshlarning sevimli maskaniga aylangani haqida gapirib oʻtdi.

Azal-azaldan maʼrifat peshvolari, ahli donishlarimiz butun insoniyatni kitob oʻqishga, undan ilmu-odob sirlarini oʻrganishga chorlab kelishgan. Zero buyuk bobokalonimiz Alisher Navoiy hazratlari taʼkidlaganlaridek, kitob – beminnat ustoz, bilim va maʼnaviy yuksalishga erishishning eng asosiy manbaidir. Elimizda Odinaxon ona Musayeva kabi barchani kitobxonlikka chorlovchi maʼnaviyatli insonlar koʻp boʻlsa, yoshlarni koʻp kitob oʻqishga undovchi shu kabi tadbirlar koʻplab oʻtkazilsa, dunyoqarashlar kengayadi, hayotga munosabat oʻzgaradi.

Muqaddas Allaberganova, 83-sonli maktab oʻqituvchisi.