Mehnat yarmarkasida 13 nafar ishsiz fuqarolar doimiy ishga joylashtirildi

Mamlakatimizda aholi bandligini taʼminlash, daromadlarini oshirishga har tomonlama koʻmaklashish, ishsizlar, ayniqsa, yoshlar va xotin-qizlar, mehnat bozoriga ilk bor kirib kelayotgan bitiruvchilar bandligini taʼminlashga ustuvor ahamiyat qaratib kelinmoqda. Bu borada qator meʼyoriy-huquqiy hujjatlar, dasturlar ishlab chiqilib, amaliyotga tatbiq qilinmoqda.

Amudaryo tumani Kambagʻallikni qishqartirish va bandlikka koʻmaklashish boʻlimida tashkil etilgan mehnat yarmarkasi ham bandlikni taʼminlash yoʻlidagi chora-tadbirlardan biridir.

Joriy yilning 26-yanvar kuni oʻtkazilgan mehnat yarmarkasi tuman Kambagʻallikni qisqartirish va bandlikka koʻmaklashish boʻlimi, tuman Majburiy ijro byurosi, tuman Prokuraturasi hamkorligida tashkil qilindi.

Tadbirni tuman Kambagʻallikni qishqartirish va bandlikka koʻmaklashish boʻlimi boshligʻi Rashid Salayev ochdi hamda olib bordi. Rashid Salayev oʻz soʻzida bugungi kunda mamlakatimizda aholi bandligiga koʻmaklashish, aholini ish bilan taʼminlash, boʻsh ish oʻrinlarini yaratish borasida olib borilayotgan keng islohotlar xususida toʻxtaldi.

Xususan, bandlik boʻyicha yangi taʼsirchan mexanizmlar joriy etilayotgani, ehtiyojmand aholini mehnat faoliyatiga jalb qilishda qulay shart-sharoitlar yaratilayotgani, joylarda tegishli masʼullar tomonidan “mahallabay”, “fuqarobay” ishlash tizimi asosida ish olib borilib, aholining muammolari, ish bilan band qilish masalalari oʻrganilayotgani alohida qayd etildi.

Shuningdek, tuman Majburiy ijro byurosi boshligʻi Aziz Tajiyev hamda tuman prokurori katta yordamchisi Ravoj Temirbayevlar soʻzga chiqib, aholi bandligini taʼminlash borasida qator amaliy choralar koʻrilayotgani, ishsiz fuqarolar bandligini taʼminlashga koʻmak berilayotgani, bu kabi amaliy ishlar aholi farovonligi, oilalarning daromadi barqarorligiga xizmat qilayotganini taʼkidladilar.

Mehnat yarmarkasida tumandagi qator tijorat banklari hamda 41 ta korxona va tashkilotlar 115 ta boʻsh ish oʻrinlari bilan ishtirok etdi. Tadbir mobaynida 14 nafar yoshlar, 19 nafar ayollar, 3 nafar maktab bitiruvchilari, 1 nafardan nogironligi boʻlgan, jazoni ijro etish muassasasidan kelgan va aliment toʻlovchi fuqarolar, shuningdek, 3 nafardan harbiy xizmatdan va mehnat migratsiyasidan kelgan fuqarolar,  jami 45 nafar ishsiz fuqarolar ishtirok etdilar.

Yarmarka davomida 4 nafar yoshlar, 8 nafar ayollar, 1 nafar maktab bitiruvchisi, jami 13 nafar ishsiz fuqarolar doimiy ishga joylashtirildi. 3 nafar yoshlar va 2 nafar ayollar kasbga oʻqitish, qayta oʻqish kurslariga yuborildi. 5 nafar yoshlar, 7 nafar ayollar esa haq toʻlanadigan jamoat ishlariga jalb qilindi.

Mehnat yarmarkasi mobaynida masʼullar tomonidan ishtirokchilarning mehnat qonunchiligi borasidagi barcha savollariga tegishli javoblar berildi. Shuningdek, ishga joylashish yuzasidan tegishli tavsiyalar berildi.

Charos Arslonova,  tuman hokimligining Axborot xizmati rahbari