Choykoʻl ovulida tuman hokimining sayyor qabuli boʻlib oʻtdi

Soʻnggi yillarda mamlakatimizda “Xalq davlat idoralariga emas, davlat idoralari xalqimizga xizmat qilishi kerak” tamoyili asosida keng koʻlamli ishlar amalga oshirilmoqda. Ushbu hayotbaxsh tamoyil asosida olib borilayotgan ishlar natijasida joylarda sayyor qabullar oʻtkazilib, odamlarni qiynab kelayotgan koʻplab muammolarga yechim topilmoqda. Bu esa aholiga qulay yashash sharoitlari yaratish, mahallalar infratuzilmasini yanada yaxshilash imkonini bermoqda. Shu bilan birga aholining davlat idoralariga boʻlgan ishonchi ortib bormoqda.

Joriy yilning 1-fevral sanasida Amudaryo tumani Choykoʻl OFYda joylashgan 22-sonli maktab binosida ham tuman hokimi Sobir Xoʻjametovning sayyor qabuli oʻtkazildi.

Sayyor qabulda 3-sektor rahbari – tuman Ichki ishlar boʻlimi boshligʻi Jamoladdin Yusupov, tuman hokimining yoshlar siyosati, ijtimoiy rivojlantirish va maʼnaviy-maʼrifiy ishlar boʻyicha oʻrinbosari Nodir Kamolov, korxona-tashkilotlar rahbarlari, banklar masʼullari, ovul fuqarolar yigʻini raisi, xotin-qizlar faoli, yoshlar yetakchisi hamda fuqarolar ishtirok etdilar.

Shu oʻrinda qayd etish joizki, hududlarni obodonlashtirish, aholi turmush sharoitini yaxshilash, ularning muammolarini hal etish yuzasidan tashkil etilayotgan sayyor qabullarda aholi tomonidan bildirilgan murojaatlar oʻrganilib, muammo va kamchiliklarni bartaraf etish orqali insonlarning yashash sharoitlari tobora yaxshilanmoqda.

Mazkur sayyor qabul davomida ham fuqarolardan bir qator murojaatlar kelib tushdi. Jumladan, oʻquvchilarning maktabga qatnashlaridagi xavsizligi uchun yoʻl va yoʻlak qurilishi, tabiiy gaz yetishmovchiligi, talaba yoshlarning toʻlov shartnoma pullarini toʻlashdagi qiyinchiliklar, muddatli harbiy xizmat badal pulini toʻlashdagi muammolar, betob farzandini davolatishda yordam, Choykoʻl OFY Madaniyat uyini taʼmirlash va boshqa masalalarda bildirilgan murojaatlar shular jumlasidandir.

Barcha murojaatlar tegishli masʼullarga yoʻnaltirildi hamda ular tomonidan oʻrganilib, hal qilinadigan boʻldi. Shuningdek, sayyor qabul mobaynida fuqarolarning turli masalalar yuzasidan bergan savollariga ham tegishlicha javoblar hamda tushuntirishlar berildi.

Taʼkidlash kerakki, mamlakatimizda barcha sohalarda amalga oshirilayotgan islohotlar, xususan, turli darajadagi davlat hokimiyati va boshqaruv organlari rahbarlarning aholi vakillari bilan muloqotlari odamlarning orzu-istaklari, talab va ehtiyojlarini oʻrganish, ularga imkon qadar koʻmak berish, mavjud muammolar yechimini topishga imkon bermoqda.

Ayniqsa, masʼullar tomonidan odamlarning muammo va tashvishlarini hal etish, ogʻirini yengil qilish yoʻlida tashkil etilayotgan sayyor qabullar yurtdoshlarimizning ertangi kunga boʻlgan ishonchini mustahkamlamoqda.

Shu jihatdan olib qaraganda, Choykoʻl ovulida oʻtkazilgan sayyor qabul ham aholining turli masalalar yuzasidan murojaatlarini tinglash va mazkur murojaatlarda aytilgan kamchiliklarni bartaraf qilib, ovul aholisining turmush sifatini yanada yaxshilashda muhim vosita boʻldi.

Tuman hokimligining Axborot xizmati.