Mehnat yarmarkasida 23 nafar fuqaro doimiy, 47 nafar fuqaro haq toʻlanadigan ishlarga joylashtirildi

Joriy yilning 6-fevral sanasida Amudaryo tumani Kambagʻallikni qisqartirish va bandlikka koʻmaklashish boʻlimi tomonidan tuman Prokuraturasi, Majburiy ijro byurosi, tuman IIB bilan hamkorlikda boʻsh ish oʻrinlari mehnat yarmarkasi tashkil qilindi.

Tadbirni Amudaryo tuman Kambagʻallikni qishqartirish va bandlikka koʻmaklashish boʻlimi boshligʻi Rashid Salayev ochdi hamda olib bordi va bugungi kunda mamlakatimizda aholi bandligiga koʻmaklashish, aholini ish bilan taʼminlash, boʻsh ish oʻrinlarini yaratish orqali kambagʻallikni qisqartirish borasida olib borilayotgan keng islohotlar xususida batafsil toʻxtaldi.

Xususan, bandlik dasturi boʻyicha yangi taʼsirchan mexanizmlar joriy etilib, ehtiyojmand aholini mehnat faoliyatiga jalb qilishda qulay shart-sharoitlar yaratilayotgani, joylarda tegishli masʼullar tomonidan “mahallabay” ishlash tizimi asosida ish olib borilib, aholining muammolari, ish bilan band qilish masalalari oʻrganilayotgani yuzasidan maʼlumotlar berdi.

Mehnat yarmarkasida Qoraqalpogʻiston Respublikasi Kambagʻallikni qisqartirish va bandlik vazirligi masʼul xodimi M.Izmuratov qatnashdi va nutq soʻzladi. Shuningdek, tadbirda tuman prokuraturasi, Majburiy ijro byurosi, IIB vakillari soʻzga chiqib, aholi bandligini taʼminlash borasida qator amaliy choralar koʻrilayotgani, ishsiz fuqarolar bandligini taʼminlashga koʻmak berilayotgani, bu kabi amaliy ishlar aholi farovonligi, oilalarning daromadi barqarorligiga xizmat qilayotganini taʼkidladilar.

Yarmarkada tumandagi 43ta korxona va tashkilotlar 202ta boʻsh ish oʻrinlari bilan ishtirok etishdi. Mehnat yarmarkasiga tuman xududida yashovchi va ish izlovchi fuqarolar, nogironligi boʻlgan shaxslar hamda oliy oʻquv yurti bitiruvchilari taklif qilingan boʻlib, 19 nafar yoshlar, 47 nafar ayollar, 6 nafar bitiruvchi, 6 nafar nogironligi boʻlgan fuqaro, 1 nafar jazoni ijro etish muassasasidan kelgan shaxs, jami 84 nafar ishsiz fuqarolar qatnashdilar.

Korxona va tashkilotlar tomonidan  taklif etilgan ish oʻrinlariga  2 nafar yosh, 11 nafar ayol, 3 nafar bitiruvchi, 1 nafar nogironligi boʻlgan shaxs, 1 nafar jazoni ijro etish muassasasidan kelgan fuqaro, 5 nafar boshqa toifadagi ish qidiruvchilar, jami 23 nafar ishsiz fuqarolar doimiy ishga joylashtirildi.

Shuningdek, haq toʻlanadigan jamoat ishlariga 12 nafar yoshlar, 30 nafar ayollar, 5 nafar nogironligi boʻlgan shaxslar jalb qilindi. 5 nafar yoshlarga, 2 nafar bitiruvchi hamda 6 nafar ayollarga mehnat qonunchiligiga oid masalalar boʻyicha zarur maslahatlar berildi.

Mehnat yarmarkasi davomida masʼullar tomonidan ishtirokchilarning mehnat qonunchiligi borasidagi savollariga tegishli javoblar berildi. Shuningdek, ishga joylashish yuzasidan tegishli tavsiyalar taqdim etildi.

Muyassar Xalillayeva.