36-SONLI MAKTABDA BOBOKALONLAR TAVALLUDIGA BAGʻIShLAB “IKKI BUYuK SIYMO” DEB NOMLANGAN TADBIR TAShKIL ETILDI

Mamlakatimizda ulugʻ ajdodlarimiz Alisher Navoiy va Zahiriddin Muhammad Boburlarning tavallud kuni keng nishonlanadi va ushbu sanalar munosabati bilan turli tadbirlar, maʼnaviy-maʼrifiy, adabiy-badiiy kechalar oʻtkaziladi. Tadbirlarda oʻsib kelayotgan yosh avlod buyuk bobokalonlarga faxru-iftixorini yaqqol namoyon etib, oʻz ehtiromini koʻrsatishga harakat qiladi.

9-fevral kuni Amudaryo tumanidagi 36-sonli maktabda ham “Ikki buyuk siymo” deb nomlangan tadbir tashkil etildi. Maktabning boshlangʻich sinf oʻqituvchisi Nasiba Bobojonova hamda uning rahbarligidagi 2-“A”sinf oʻquvchilari tomonidan tayyorlangan ushbu tadbirni maktab direktorining maʼnaviy-maʼrifiy masalalar boʻyicha oʻrinbosari Vahobjon Davletov ochib berdi. U oʻz soʻzida buyuk bobokalonlarimiz hayoti va ijodiga keng toʻxtalib oʻtdi. Ikki buyuk siymo – soʻz mulkining sultoni Mir Alisher Navoiy, ulugʻ shoir va davlat arbobi Zahiriddin Muhammad Bobur hayoti va ijodi, ular qoldirgan ulkan adabiy merosning yoshlar tafakkurini oʻstirishdagi, dunyoqarashini boyitishdagi beqiyos ahamiyati xususida soʻz yuritdi.

Shundan soʻng, sinf rahbari Nasiba Bobojonova hamda oʻquvchilar Alisher Navoiy va Bobur ijodiga mansub gʻazal va ruboiylardan yod aytishdi. Ifodali tarzda aytilgan gʻazal va ruboyilar tomoshabinlarga nihoyatda manzur boʻldi. Ayniqsa, jajji oʻquvchilar ijrosidagi sahna koʻrinishlari, ular gavdalantirgan Alisher Navoiyning yoshligi, Zahiriddin Muhammad Boburning qalbidagi Vatanga muhabbat va sogʻinch hislarini aks ettirishga harakat qilishlari barchani nihoyatda taʼsirlantirdi. Qizlar esa dilrabo raqs va qoʻshiqlari bilan kechaga yanada fayz kiritdilar.

Tadbirda oʻquvchilar ikki buyuk siymo haqida olgan bilimlarini savol-javob tarzida sinab koʻrishdi. Navoiy va Bobur hayoti, ijodi haqidagi savollarga toʻliq javob berishga xarakat qilgan oʻquvchilar Bobur merosini chuqur oʻrganishgani barchani quvontirdi.

Tadbir davomida har ikki ijodkor dunyo adabiyoti tarixida juda katta oʻrin tutishi, xalqparvar davlat arbobi sifatida jamiyatda tutgan yuksak mavqei jihatidan ham, ilm-fan, madaniyat va sanʼat, adabiyot ahliga koʻrsatgan homiyligi jihatidan ham oʻxshashi yoʻq siymo ekanligi, ular bugun oʻzbek xalqining milliy iftixoriga, adabiy, maʼnaviy kamolot timsoliga aylangani taʼkidlandi.

Navoiy ham, Bobur ham buyuk davlat arbobi boʻlishgani, Bobur mohir sarkarda sifatida aql-zakovati va shijoati bilan Hindistonda Boburiylar sulolasiga asos solgani, oʻzbek tilida yozilgan “Boburnoma”, “Mubayyin”, “Xatti Boburiy”, “Harb ishi”, Musiqa sirlari”, “Qofiya ilmi” kabi asarlari bilan jahonning mashhur tarixnavis olimlari qatoridan joy olgani toʻgʻrisidagi fikrlar bildirildi.

Shundan soʻng, oʻquvchilar oʻrtasida Navoiy va Bobur bobokalonlarimiz hayoti toʻgʻrisida diktantlar tanlovi oʻtkazildi. Zukko oʻquvchilardan Dilfuza Yoʻldosheva, Laziz Tursunboyev, Charosoy Soliyeva, Asliddin Yusupov, Javohir Madatov, Umrbek Bashirov, Shirinoy Baxtiyorovalar ushbu tanlovda faol ishtirok etib, zehnli, bilimli ekanligini, iqtidorini koʻrsatishdi.

Xalqimiz maʼnaviy dunyosining yuksalishiga ulkan hissa qoʻshgan ikki buyuk shaxs – Alisher Navoiy va Zahiriddin Muhammad Bobur tavalludi munosabati bilan tashkil etilgan tadbir barchaga manzur boʻldi. Oʻquvchilar ham ikki ijodkorning hayoti, faoliyati, ijodiy merosi haqidagi bilimlarini yanada mustahkamlab oldilar.

O.Xudoyberganova.