36-SONLI MAKTABDA ZUKKO QIZLAR OʻRTASIDA BELLAShUV TAShKIL ETILDI

Oʻlkamizga fasllar kelinchagi boʻlmish bahor kirib kelishi bilan bayramlar ham boshlanadi. Tabiatdagi oʻzgarishlarga hamohang tarzda barcha hududlarda, ovul va mahallalarda, korxona-tashkilotlarda va umumtaʼlim muassasalarida boshlangan bayramlar, turli tadbirlar barchaga yanada koʻtarinki ruh baxsh etadi.

4-mart kuni 36-sonli maktabda ham 8-“A” sinf oʻquvchilari oʻrtasida 8-mart – Xalqaro xotin-qizlar bayrami munosabati bilan “Qizlarjonlar” tadbiri oʻtkazildi. Sinf rahbari Dilnura Boboniyozova tomonidan tashkil etilgan ushbu bayram tadbirida oʻquvchi qizlarning hammasi faol qatnashishdi. Tadbirni maktab direktorining maʼnaviy-maʼrifiy ishlar boʻyicha oʻrinbosari Bahrom Xoʻjamurodov ochib berdi va oʻqituvchi ayollar, oʻquvchi qizlarni yaqinlashib kelayotgan 8-mart – Xalqaro xotin-qizlar bayrami bilan qizgʻin qutladi.

Shuningdek, soʻnggi yillarda yurtimizda ayol-qizlarni har tomonlama qoʻllab-quvvatlash, manfaatlarini himoya qilish, ijtimoiy-siyosiy faolligini oshirish davlatimiz siyosatining muhim yoʻnalishiga aylanganini taʼkidlab oʻtdi. Prezidentimiz ilgari surgan beshta muhim tashabbus doirasida yoshlarimiz, shu jumladan, xotin-qizlarning boʻsh vaqtini mazmunli va maqsadli tashkil etish, ularni madaniyat, sanʼat, jismoniy tarbiya va sport, axborot texnologiyalari, kitobxonlik, kasb-hunarga oʻrgatish orqali bandligini taʼminlash boʻyicha keng koʻlamli ishlar amalga oshirilayotganini, bu esa, oʻz navbatida, “Yangi Oʻzbekistonni, albatta, yoshlar bilan birga quramiz!” degan ezgu tamoyilni roʻyobga chiqarib, yoshlarning orzu-havasi, iqtidor va salohiyatshini toʻla namoyon etishiga xizmat qilayotganini alohida eʼtirof etdi.

 Shundan soʻng, tadbirning asosiy qismi boshlandi va sinf qizlari 4 guruhga boʻlinib belgilangan shartlar asosida bellashishdi. Sahnaga “Bahor”, “Boychechak”, “Lolalar” va “Oqqushlar” guruhlari chiqib, 6 ta oʻzlarini tanishtirish, salat tayyorlash, sardorlar bellashuvi, soʻzdan soʻz yasash, erkin mavzu, onamga sovgʻa kabi shartlar asosida oʻz iqtidorlari, chaqqonliklari va mohirliklarini namoyish etishdi.

Tanlovning tanishuv shartida jamoa aʼzolari oʻzlari taʼlim olayotgan 36-sonli maktab hayoti, taʼlim berayotgan ustozlari, oʻzlarining orzu-maqsadlari haqida ham soʻzlab oʻtdilar. Ikkinchi va uchinchi shartlarda qizlarning pazandaligi sinovdan oʻtkazildi. Qizlar shu yerning oʻzida turli sabzavotlar va mevalardan xushtaʼm, vitaminlarga boy salatlar tayyorlab, hakamlarga taqdim etishdi. Soʻzdan soʻz yasash shartida esa qizlar intellektual salohiyati, maʼnaviy dunyoqarashi va zukkoligini koʻrsatishga harakat qilishdi.

Erkin mavzu sharti esa qiziqarli chiqishlarga boy oʻtdi. Sahnada atlas koʻylak kiygan qizchalar bahoriy qoʻshiqlarga xirom aylab, dillarni xushnud etdilar. Shuningdek, bahor, gullab yashnayotgan yurt va onalar haqidagi sheʼrlari bilan bayramona kayfiyat ulashishdi. Ayniqsa, onalarga sovgʻa deb nomlangan oxirgi shart davomida turli rangli qogʻozlardan chiroyli bahoriy guldastalar yasab, onalariga bir-biridan chiroyli sovgʻalar tayyorlashdi.

Ularning chiqishlarini maktab oʻqituvchilaridan tashkil etilgan hakamlardan Umida Jumaniyozova, Nilufar Allaniyazova, Muhayyo Karimovalar odilona baholab bordilar. Nihoyatda qiziqarli oʻtgan bellashuv ishtirokchilari belgilangan shartlar asosida oʻzlarining bilimdon, orasta va faol ekanliklarini namoyish etdilar. Yakuniy natijalarga koʻra, 1-oʻringa eng koʻp ball toʻplashga erishgan “Oq qushlar” guruhi munosib deb topildi.

Tadbir yakunida gʻoliblarga va sinfdagi barcha qizlarga bayram sovgʻalari topshirildi.

O.Xudoyberganova.