52-SONLI MAKTABDA "TARAQQIYoT KOʻZGUSI" GAZETASI TAHRIRIYaTI TOMONIDAN “MAʼNAVIYaT KUNI” DOIRASIDA SUHBAT OʻTKAZILDI

Mamlakatimizda yoshlarni har jihatdan barkamol qilib tarbiyalashdek dolzarb vazifani amalga oshirish jarayonida ularni maʼnaviy-ruhiy jihatdan yetuk insonlar qilib tarbiyalashga alohida eʼtibor berilmoqda. Boisi, ota-bobolarimiz “bilagi zoʻr birni, bilimli zoʻr mingni yiqadi”, deb bejizga aytmagan.

Yoshlarni maʼnaviy kamol toptirishda teran ildizlardan suv ichgan azaliy qadriyatlarimizning, urf-odatlarimizning oʻrni alohidadir. Shu bilan bir qatorda bu borada yoshlarning koʻngil koʻzini ochadigan, oʻzligini anglashga chorlaydigan badiiy asarlar oʻqishga jalb etish, maʼnaviyat targʻibotchilari bilan uchrashuvlar tashkil etish ham muhim oʻrin tutadi.

Buningdek xayrli vazifa ijrosiga hissa qoʻshish maqsadida Amudaryo tumanining “Taraqqiyot koʻzgusi” gazetasi tahririyati amalga oshirayotgan “Bilimli va maʼnaviyatli yoshlar bilan – Uchinchi Renessans sari” grant loyihasi doirasida yoshlarning ziyolilar, shoir va yozuvchilar, sanʼatkorlar bilan uchrashuvlari tashkil etilmoqda va ularga maʼnaviy oziq ulashilmoqda.

Yaqinda ana shunday tadbirlardan biri tumandagi 52-sonli maktab oʻqituvchilari, oʻquvchilari ishtirokida oʻtkazildi. Doʻstona, samimiy suhbatda mazkur maktab oʻqituvchilari, oʻquvchilaridan bir guruhi, Oʻzbekiston Yozuvchilar uyushmasi, Jurnalistlar ijodiy uyushmasi aʼzosi, Qoraqalpogʻistonda xizmat koʻrsatgan jurnalist, “Vatan fidoyisi” koʻkrak nishoni sohibasi, 8ta sheʼriy, nasriy asarlar muallifi, “Taraqqiyot koʻzgusi” gazetasi maxsus muxbiri Robiya Yoʻldosheva, tumanimizda ilk bor Oʻzbekiston Yozuvchilar uyushmasi aʼzosi boʻlgan, qator sheʼriy kitoblar muallifi Zulfiya Ollayorova, “Taraqqiyot koʻzgusi” gazetasi maxsus muxbiri, Oʻzbekiston Jurnalistlar ijodiy uyushmasi aʼzosi, ikkinchi darajali “Mehnat faxriysi” koʻkrak nishoni sohibasi Oygul Rajabovalar ishtirok etdilar.

Tadbirda dastlab “Maʼnaviyat kuni” doirasida yurtimizda huquqiy-demokratik davlat, fuqarolik jamiyati qurish, yoshlarga zamonaviy ilm-fanni chuqur singdirish, ular koʻnglida el-yurtga sadoqat va milliy gʻurur tuygʻularini yuksaltirish, yangi Oʻzbekistonda amalga oshirilayotgan hayotbaxsh islohotlarni keng targʻib etish maqsadida suhbat olib borildi.

Ijodkorlarning ijod namunalaridan tinglash uchrashuvga yigʻilganlar uchun yanada zavqli boʻldi. Robiya Yoʻldosheva, Zulfiya Ollayorova, Oygul Rajabova, mazkur maktab oʻqituvchisi, uzoq yillardan beri mazmunan boy sheʼrlari bilan tanilgan Gulmirza Bobojonovlarning sheʼrlarini barcha zoʻr qiziqish bilan tingladilar.

Alloma “Oʻqiganim va bilganim sari oʻqimaganim va bilmaganim qanchalar koʻp ekanligini tushunib, xijolat tortaman”, deganida naqadar haq edi. Ha, biz qancha oʻqisak, tinglasak, shuncha shuurimiz oydinlashadi, maʼnaviyatimiz boyiydi.

Mazkur suhbatda oʻqilgan sheʼrlar ham tinglovchilar tomonidan qizgʻin qarshi olingani bejiz emas. Shuningdek, oʻqituvchilarni, oʻquvchilarni qiziqtirgan savollarga ijodkorlar tomonidan batafsil javoblar berildi.

Suhbat soʻngida maktab direktorining maʼnaviy-maʼrifiy ishlar boʻyicha oʻrinbosari Zarifboy Eshniyozov maktabga uchrashuv uchun tashrif buyurgan ijodkorlarga samimiy minnatdorchilik bildirdi va ijodlariga baraka tiladi.

Davra suhbati taassurotlarga boy boʻldi.

Sevara ISMOILOVA.