Amudaryo tumanida Qoraqalpogʻiston Respublikasi Vazirlar Kengashi Raisi ishtirokida joriy yil hosili uchun chigit ekish boʻyicha koʻrgazmali seminar boʻlib oʻtdi

Joriy yilning 30-mart sanasida Amudaryo tumanida Qoraqalpogʻiston Respublikasi Vazirlar Kengashi Raisi Farhod Ermonov ishtirokida joriy yil hosili uchun chigit ekish boʻyicha koʻrgazmali seminar boʻlib oʻtdi.

Tumanning Choykoʻl ovulidagi "Choykoʻl Doʻstlik" fermer xoʻjaligida tashkil etilgan koʻrgazmali seminarda respublika hamda tuman miqyosidagi qishloq xoʻjaligi sohasi masʼullari ishtirok etdilar. Seminar mobaynida joriy yilgi paxta hosili rejasini bajarish boʻyicha oldinda turgan ustuvor vazifalar xususida soʻz yuritildi.

Dastlab Qoraqalpogʻiston Respublikasi Vazirlar Kengashi Raisi Farhod Ermonov, tuman hokimi Sobir Xoʻjametov hamda barcha seminar ishtirokchilari ilk chigit urugʻlarini yaxshi niyat bilan fermer xoʻjaligi dalasiga sepdilar. “Yusuf Eshon bobo” jomʼe masjidi imomi Abdurahmon hoji Matsapoyev yurtimiz tinch, osmonimiz musaffo boʻlishi, bu yilgi paxta hosili moʻl boʻlib, kontraktatsiya shartnomalarini ortigʻi bilan bajarishi uchun barcha fermerlarga katta kuch-gʻayrat va hamjihatlik tilab duoga qoʻl ochdi.

Shundan soʻng seminarga yigʻilgan barcha qishloq xoʻjaligi sohasi masʼullari bilan chigitni oʻz vaqtida ekish, zaruriy meniral oʻgʻitlarni belgilangan miqdorda va oʻz vaqtida berish yuzasidan tavsiyalar berildi hamda oldinda turgan vazifalar xususida soʻz yurtitildi.

Xususan, paxtaning eng unumdor navlari bilan bir qatorda chet eldan olib kelinadigan yangi navlarini ekish boʻyicha taklif hamda tavsiyalar berildi. Paxtadan yaxshi hosil olish maqsadida agrotexnik tadbirlarni oʻz vaqtida oʻtkazish, suvni tejovchi texnologiyalardan foydalangan holda qishloq xoʻjaligi mahsulotlarini ekish boʻyicha amalga oshirilishi lozim boʻlgan ishlar haqida maʼlumotlar berildi.

Maʼlumot oʻrnida keltirish joizki, Amudaryo tumanida joriy yilgi paxta hosili uchun jami 352 ta fermer xoʻjaliklaridagi 13 900 gektar maydonga chigit ekish rejalashtirilgan. Ushbu maydonlarda yetishtirilishi kutilayotgan paxta hosilini sotish boʻyicha 6 ta klasterlar bilan shartnomalar imzolangan.

5-apreldan 15-aprelgacha boʻlgan vaqt oraligʻida rejalashtirilgan ekin maydonlarida chigit ekish ishlarini amalga oshirish uchun 112 nafar aʼzolardan iborat 65 ta chigit ekish otryadlari tuzilgan. Mazkur otryadlar tarkibiga otryad rahbari, klasterlar agranomlari, yer tuzuvchilar, agroinspektsiya xodimlari, urugʻlik chigit yetkazib berishga, mineral oʻgʻit yetkazib berishga masʼul xodimlar biriktirilgan. Otryadlarga jami 3209ta texnikalar biriktirilgan boʻlib, shundan jami haydov traktorlari 145tani, jami yer tekislagichlar 346tani, chigit ekish seyalkalari 150 donani tashkil etadi.

Shuningdek, jami ertapishar navlar ekiladigan yer maydonlari 12 ming 802 gektar boʻlib, shundan 8 ming 802 gektar maydoniga “Sulton” navi , 4000 gektar yer maydoniga “Ravnaq-2” navi ekilishi rejalashtirilgan. 500 gektar yer maydoniga yangi navlar, 1598 gektar yer maydoniga esa xorijiy navlar ekilishi belgilangan. Joriy yilgi paxta hosili uchun belgilangan jami urugʻlik chigit 857,5 tonna boʻlib, 6 ta hududda chigit yetkazib berish shoxobchasi tashkil etilgan.

Shundan soʻng Qoraqalpogʻiston Respublikasi Vazirlar Kengashi Raisi Farhod Ermonov hamda barcha seminar ishtirokchilari aholi tomorqalarida amalga oshirilayotgan ishlar, qishloq xoʻjaliginining turli yoʻnalishlari bilan shugʻullanib, oilasiga yaxshi daromad olib kelyotgan xonadonlar bilan yaqindan tanishdilar.

Seminar davomida tumandagi ovul va mahalla fuqarolar yigʻinlarida faoliyat olib borayotgan “yettilik” masʼullariga aholi xonadonlaridagi tomorqalardan unumli foydalanish boʻyicha tizimli ishlarni tashkil etish, qishloq xoʻjaligining dehqonchilik, chorvachilik, parrandachilik, asalarichilik kabi tarmoqlarini yanada rivojlantirish boʻyicha tegishli topshiriqlar berildi.

Charos Arslonova, tuman hokimligining Axborot xizmati rahbari.