Qoraqalpogʻiston Respublikasi Konstitutsiyaci qabul qilingan kun munosabati bilan tantanali bayram tadbiri oʻtkazildi

9-aprel kuni Amudaryo tumani markaziy Madaniyat uyida Qoraqalpogʻiston Respublikasi Konstitutsiyaci qabul qilingan kun munosabati bilan tantanali bayram tadbiri oʻtkazildi. Tadbirda tuman hokimi, sektorlar rahbarlari, deputatlar, hokimlik masʼullari, muassasa, korxona va tashkilotlar rahbarlari, fuqarolar yigʻinlari raislari, taʼlim muassasalari xodimlari, keng jamoatchilik vakillari ishtirok etdi.

Tadbir avvalida Oʻzbekiston va Qoraqalpogʻiston Respublikalarining davlat madhiyalari yangradi.

Bayram tadbirida tuman hokimi Sobir Xoʻjametov va ichki ishlar tizimi faxriysi Erkin Rajabovlar soʻzga chiqib, yurtdoshlarimizni Qoraqalpogʻiston Respublikasi Konstitutsiyasi qabul qilinganining 31-yilligi bilan samimiy muborakbod qilib, xalqimiz hayotini yanada obod va farovon qilish, yurtimizda yashayotgan millati, tili va dinidan qatʼiy nazar, har bir insonga eʼtibor va gʻamxoʻrlik koʻrsatish – Konstitutsiyamizning bosh maqsadi eʼkanligini alohida eʼtirof etishdi. Shuningdek, Konstitutsiyani chuqur oʻrganish, anglash, hayotga joriy etish va unga soʻzsiz amal qilish – barchaning sharafli burchi ekanligi taʼkidlandi.

Qoraqalpogʻiston Respublikasi Konstitutsiyaci 1993-yil 9-aprel kuni XII chaqiriq Qoraqalpogʻiston Respublikasi Oliy Kengashining XII sessiyasida qabul qilingan. Qoraqalpogʻiston Respublikasi xalqi inson huquqlariga va davlat suvereniteti gʻoyalariga sodiqligini tantanali ravishda eʼlon qilib, hozirgi va kelajak avlodlar oldidagi yuksak masʼuliyatni anglagan holda, Qoraqalpogʻiston davlatchiligi rivojining tarixiy tajribasiga tayanib, demokratiya va ijtimoiy adolatga sadoqatini namoyon qilib, xalqaro huquqning umum eʼtirof etilgan qoidalari ustunligini tan olgan holda, respublika fuqarolarining munosib hayot kechirishlarini taʼminlashga intilib, insonparvar demokratik huquqiy davlat barpo etishni koʻzlab hamda fuqarolar tinchligi va milliy totuvligini taʼminlash maqsadida oʻzining muxtor vakillari siymosida mazkur Qoraqalpogʻiston Respublikasining Konstitutsiyasini qabul qilganiga bu yil 31-yil toʻldi. Amudaryo tumanida ushbu sana har yili ham yuqori saviyada va koʻtarinki ruhda nishonlanadi.

Madaniyat markazi binosidagi sahnaga oʻrnatilgan ekranda mamlakatimizda, xususan Qoraqalpogʻistonda turli sohalarda erishilayotgan yutuqlar aks etgan roliklar namoyish etildi. Videoroliklarda muhtaram Prezidentimiz tashabbusi bilan Qoraqalpogʻistonda aholi turmush sharoitini yanada yaxshilash, ijtimoiy infratuzilmani rivojlantirish, shahar va qishloqlarni obod qilish, tadbirkorlikni rivojlantirish maqsadida qabul qilinayotgan farmon va qarorlarning, amaliy ishlarning natijasi hayotiy misollar orqali namoyish qilindi.

Bayram tadbirida tumanning taniqli va xushovoz sanʼantkorlari ijrosida ona Vatan, tinchlik va doʻstlik tarannum etilgan goʻzal kuy-qoʻshiqlar yangradi. Oʻzbek va qoraqalpoq xalqlarining azaliy doʻstligi, tinch-totuv yashab kelayotgani, xalqimiz turmushining farovonligi, mamlakatimiz qudrati goʻzal kuy-qoʻshiqlar va raqslar orqali tarannum etildi. Baxtimiz qomusi boʻlgan Konstitutsiyamizda ham millati, tili va ijtimoiy mavqeidan qatʼiy nazar barcha yurtdoshimizning teng huquqli etib belgilab qoʻyilgani yurtimizning buyuk kelajagi va xalqimiz farovon turmushining huquqiy asosi boʻlib xizmat qiladi.

Gʻ.Yeshniyozov