Olim boʻlsang olam seniki, kitob oʻqisang...

Aslida har kimning oʻz dunyosi bor, har bir insonning oʻz haqiqati bor. Ana shu haqiqatni anglab yetishda, hayotda nima toʻgʻri-yu, nima notoʻgʻri ekanligini tushunib yetishda esa bizga kitoblar yordamga keladi.

Nigoh tashlasangiz, kitob oʻqiydigan inson bilan kitob oʻqimaydigan insonning jisman farqi yoʻq. Biroq, ikkisi oʻrtasidagi falak bilan yerchalik farq ruhiyatda, maʼnaviyatda. Chindanda, baʼzida adabiy va maʼnaviy olami boy boʻlgan odam bilan suhbatingiz soz, davra fayzli, koʻngillar obodday tuyuladi goʻyo. Haqiqatan shunday. Koʻngil mulki badavlat, kitoblar dunyosiga oshno inson har doim qadrli va ibratli boʻladi.

Demak, kitob insonni ulugʻlaydi!

“Taraqqiyot koʻzgusi” gazetasi tahririyatining “Bilimli va maʼnaviyatli yoshlar bilan – Uchinchi Renessans sari” grant loyihasining maqsadi esa jamiyatdagi ana shunday maʼnaviyati boy oʻquvchi yoshlarni izlab topish, ularning kitoblarga doʻst tutinishi va yuksak salohiyatli, komil insonlar boʻlib yetishishiga zamin yaratishdir.

Yaqinda ushbu grant loyihasi doirasida Amudaryo tumanining 3-sektori hududidagi Kuyuk koʻpir ovulida joylashgan 14-sonli maktabga tashrif buyurdik.

Gazeta tahririyati va Amudaryo televideniyesi tahririyati bilan hamkorlikda oʻquvchi yoshlarni kitobxonlikka jalb qilish maqsadida tashkil qilingan “Kitobxon yoshlar” tadbirida “Taraqqiyot koʻzgusi” gazetasi fotomuxbiri Mahmudjon Shomurodov, 14-sonli maktab direktorining maʼnaviy-maʼrifiy ishlar boʻyicha oʻrinbosari Jasur Sidabullayev, shu maktabning qozoq tili va adabiyoti fani oʻqituvchisi Mayra Umirbayeva, Amudaryo televideniyesi muxbiri Aziza Madrahimova hamda maktabning bir guruh kitobxon yoshlari ishtirok etdi.

Tadbirni maktab direktorining maʼnaviy-maʼrifiy ishlar boʻyicha oʻrinbosari Jasur Sidabullayev ochib berdi. U oʻz soʻzida bugungi globallashuv jarayonida yoshlar kitobga emas, balki, koʻproq telefonga bogʻlanib qolayotganini taʼkidlab, oʻquvchining shaxs sifatida kamol topishida avvalo kitob eng yaxshi va ishonchli doʻst ekanligini urgʻuladi.

Gazeta muxbiri Mahmudjon Shomurodov esa ijodga qiziqadigan, kitobxon oʻquvchilar uchun “Jayhun ilhomlari” NNT qoshidagi kutubxona eshiklari har doim ochiq ekanligini aytib, kitobxonlikning ahamiyati haqida gapirdi.

Shundan soʻng, Amudaryo televideniyesi muxbiri Aziza Madrahimova inson kamolotida badiiy kitoblarning oʻrni haqida gapirib, maʼnaviyatli inson boʻlishning kaliti – kitob oʻqish va uni uqish ekanligini sodda va samimiy yoʻsinda tushuntirdi.

Darhaqiqat, oʻquvchilarni kitobxonlikka jalb qilishda, ayrim yoshlarning telefon sabab “virtual” boʻlib qolgan hayotiga maʼrifat ziyosini olib kirishda aynan adabiyot fani oʻqituvchilarining oʻrni beqiyosdir. 14-sonli maktabning qozoq tili va adabiyoti fani oʻqituvchisi Mayra Umirbayeva ana shunday ziyoli oʻqituvchilardan. Tadbir davomida u oʻquvchilarga oʻzi oʻqigan badiiy kitoblardagi hikmatli soʻzlarning magʻzini uqtirib, inson hayotida ikkita nur borligini: biri – quyosh nuri boʻlsa, ikkinchisi – kitoblardan olinajak maʼrifat nuri ekanligini taʼkidlab oʻtdi.

Tadbir oʻquvchilarning qozoq va oʻzbek adabiyoti namoyondalarining durdona sheʼrlaridan parchalar oʻqishi bilan davom etdi. Larisa Pirjanova, Guljayna Toʻxtasinova kabi oʻquvchilar qardosh qozoq xalqining mashhur shoiri Abay ijodidan namunalar oʻqidi.

Ha, har narsa tilda aytilishi oson. Biroq, amalda bajarilmasa foydasi yoʻq. Demoqchimizki, uyda yoki shaxsiy kutubxonangizda kitob koʻp boʻlsa-yu, lekin ularni oʻqimasangiz, uqmasangiz, kitoblarni chang, shuuringizni “mogʻor” bosadi. Bunday boʻlmasligi uchun harakatni, mutolaani ayni zamon boshlang, aziz kitobxon! Shu kabi ezgu fikrlar ila taʼlim maskaniga tashrifimizni yakunladik.

Aziza Madrahimova