Gʻalla oʻrim-yigʻimiga bagʻishlangan respublika miqyosidagi seminar boʻlib oʻtdi

9-iyun kuni Amudaryo tumanida gʻalla oʻrim-yigʻimiga bagʻishlangan respublika miqyosidagi koʻrgazmali seminar boʻlib oʻtdi. Seminarda Qoraqalpogʻiston Respublikasi Joʻqorgʻi Kengesi Raisi Amanbay Orinbayev, Vazirlar Kengashi Raisi Farhod Ermanov, tumanlar hokimlari, qishloq xoʻjaligi soha mutasaddilari hamda fermerlar ishtirok etdi.

Dastlab seminar ishtirokchilari Choykoʻl ovuli hududidagi “Choykoʻl-Doʻstlik” fermer xoʻjalidagi bugʻdoy dalalarida joriy yilgi oʻrim-yigʻim mavsumiga tayyorgarlik koʻrish boʻyicha amalga oshirilgan ishlar bilan tanishdilar. Masʼullar joriy yilgi hosilni nest-nobud qilmasdan oʻrib-yigʻib olish, gʻalladan boʻshagan yerlarga takroriy ekin ekish va kelgusi yil hosili uchun bugʻdoy ekish hamda uni parvarishlash jarayonida suv tejovchi texnologiyalardan samarali foydalanish boʻyicha tavsiyalar berdi.

Taʼkidlanganidek, suvga boʻlgan talab oshib borar ekan, suv tejovchi texnologiyalarni joriy qilish tobora muhim ahamiyat kasb etib bormoqda. Soʻnggi yillarda mamlakatimizda suv resurslaridan foydalanish tizimi tubdan isloh qilinmoqda. Suvdan oqilona va samarali foydalanish, sugʻoriladigan yerlarning meliorativ holatini yaxshilash qishloq xoʻjaligining eng muhim masalalaridan biri sifatida qaralmoqda. Suv tejovchi texnologiyalardan oqilona foydalanish nafaqat qishloq xoʻjaligi sohasi, balki iqtisodiyotimiz uchun ham muhim ahamiyatga ega. Bizning iqtisodiyotimiz qishloq xoʻjaligiga asoslangan. Aholining katta qismi agrar soha bilan band. Qishloq xoʻjaligida suv isteʼmolini kamaytirish millionlab tonna suvni tejab qolish va uni aholi ehtiyojlariga yoʻnaltirish imkonini yaratadi.

Seminar ishtirokchilarining navbatdagi manzili Oʻrtaqalʼa ovuli  hududidagi “Yusufxoʻja” fermer xoʻjaligining gʻalla dalasi boʻldi. Dala boshida Qurʼon tilovat qilinib, nuroniylar dehqonlarimizning oldida turgan mashaqqatli va masʼuliyatli ishlariga kuch-quvvat, yurtimizga farovonlik, xalqimiz dasturxoni toʻkis boʻlishi tilab, duo qilishdi.
Seminarda soʻzga chiqqanlar oʻrim-yigʻim mavsumida amalga oshirilishi kerak boʻlgan ishlar, joriy yilgi gʻalla yetishtirish boʻyicha kontraktatsiya shartnomalarini toʻliq hajmda bajarish, yuksak gʻalla xirmonini yaratishdagi ustuvor vazifalar xususida soʻz yuritdilar.

Aytish joizki, dehqonlarimiz gʻallachilikda hosildorlikni oshirish, el-yurtimiz dasturxoni toʻkinligini taʼminlashga doimiy eʼtibor qaratib kelishadi. Ayniqsa, amudaryolik gʻallakorlar har yili moʻl hosil olib, yuksak xirmonlari bilan mamlakatimizda peshqadamlar safida kelmoqda.

Joriy yil ham tumanimiz fermerlari tomonidan moʻl gʻalla yetishtirish maqsadida bugʻdoy urugʻi yerga qadalganidan tortib, hosil pishib yetilguniga qadar barcha agrotexnik tadbirlar oʻz vaqtida va sifatli amalga oshirildi. Yetishtirilgan hosilni qisqa fursatlarda nest-nobud qilmay oʻrib-yigʻib olish maqsadida barcha harakatlar izchillik bilan amalga oshirilmoqda.

Shu oʻrinda maʼlumot tariqasida aytish joizki, tumanda 2024-yil hosili uchun 313 ta fermer xoʻjaliklari hamda qishloq xoʻjaligi korxonalari tomonidan 4800 gektar maydonga bugʻdoy ekilgan edi. Ushbu dalalardan 14 ming 400 tonnadan ortiq gʻalla hosili olish reja qilingan.

Gʻalla hosilini oʻrish uchun tumanda 22 ta otryadlar tashkil qilinib, ushbu otryadlarga yuqori unumli 22 ta kombaynlar, 47 nafar IIB, FVB va Milliy gvardiya xodimlari, 66 ta yuk mashinalari biriktirildi va 14-iyun sanasidan 1-iyulgacha, 21 kunda gʻalla hosilini nest-nobud qilmasdan oʻrib olish boʻyicha chora-tadbirlar rejasi hamda oʻrim grafiklari ishlab chiqilgan.

Seminar yakunida bugʻdoy oʻrim-yigʻimi davrida yongʻin xavfsizligiga amal qilish, hosilning nobud boʻlishiga yoʻl quymaslik boʻyicha fermer xoʻjaliklarining rahbarlariga, gʻallakor va mexanizatorlariga tushuntirishlar va tavsiyalar berildi.

Charos Arslonova, tuman hokimligining Axborot xizmati rahbari.