Sportning qoʻl jangi turi boʻyicha hokim sovrini uchun oʻsmirlar oʻrtasida oʻtkazilgan musobaqa raqiblarning murosasiz janglariga boy boʻldi

Mamlakatimizda jismoniy tarbiya va sportni ommalashtirish davlat ijtimoiy siyosatining muhim yoʻnalishlaridan biri etib belgilangan. Chunki sport aholi salomatligini mustahkamlash, yosh avlodni sogʻlom va barkamol etib tarbiyalash orqali jamiyatda sogʻlom turmush tarzini qaror toptirishda muhim ahamiyat kasb etadi. Sport maktablarida yaratilgan zamonaviy sharoitlar va tajribali murabbiylarning oʻziga xos mashgʻulotlari natijasida chempion sportchilarimiz jahon miqyosida oʻtkazilgan musobaqalarda yurtimiz bayrogʻini yuksaklarga koʻtaryapti.

Bugungi kunda amudaryolik yoshlar orasida sportning qoʻl jangi turi bilan shugʻullanuvchi sportchilar koʻp. Belgilangan tartibda doimiy oʻtkazib kelinayotgan musobaqalar esa iqtidorli sportchilarni aniqlash imkonini bermoqda.

Joriy yilning 24-iyun sanasida Amudaryo tumani sport maktabida yoshlar oyligi doirasida sportning qoʻl jangi turi boʻyicha hokim sovrini uchun oʻsmirlar oʻrtasida tuman ochiq birinchiligi musobaqalari oʻtkazildi.

Tadbirda Amudaryo tumani Mudofaa ishlari boʻlimi boshligʻi Sherzod Murodov, tuman Sport maktabi direktori Chorsham Tajimurodov, faxriy ustoz sportchilar, toʻgarak murabbiylari hamda sportchi yoshlar ishtirok etishdi.

Musobaqada 10 yoshdan 15 yoshgacha boʻlgan 100 nafardan ortiq sportchilar oʻz vazn toifasida kuch sinashdilar. Sportchilarning gʻoliblik uchun murosasiz kechgan bellashuvlari bosh hakam Abror Otajonov hamda yordamchi va yon hakamlar Komil Qutlimurodov, Bekzod Otajonov, Salamat Jiyemuratovlar tomonidan nazorat qilinib, adolatli baholab borildi.

Takidlash joizki, Oʻzbekiston Respublikasi Prezidentining tegishli qarorlari bilan qoʻl jangi sport turi aholi, ayniqsa yoshlar, Qurolli Kuchlar harbiy xizmatchilari va huquqni muhofaza qilish organlarining xodimlari oʻrtasida yanada ommalashtirilib, soha uchun moddiy-texnik bazani mustahkamlash hamda malakali kadrlar, trenerlar va hakamlar tayyorlashga boʻlgan eʼtibor yanada kuchaytirildi. Bu sport turi jang sanʼatining bir turi boʻlib, raqiblar qoʻllardan foydalangan holda bir-biriga qarshi kurashadilar. Qoʻl jangi nafaqat jismoniy kuch, balki tezlik, texnika va strategiyani ham talab qiladi.

Maʼlumot oʻrnida, bugungi kunda Amudaryo tumani sport maktabida sportning 18 turi boʻyicha jami 2400 nafar sportchilar mashgʻulotlar bilan shugʻullanib kelishmoqda. Sportning qoʻl jangi turi boʻyicha tumanimiz yoshlari mamlakat miqyosida oʻtkazilayotgan musobaqalarda ham faxrli yutuqlarga erishmoqda. Birgina 2024-yilning olti oyi davomida oʻtkazilgan Oʻzbekiston chempionati va kubogi musobaqalarida sportchilarimiz tomonidan jami 19 ta medal, shundan 6ta oltin, 9ta kumush va 4ta bronza medallari qoʻlga kiritildi. Shuningdek, tumanimizning Qilichboy ovulida tugʻilib oʻsgan Oʻzbekiston chempioni Lobar Jumaboyeva joriy yilda Buxoro viloyatida boʻlib oʻtadigan Jahon chempionati musobaqalarida 58 kg vazn toifasida ishtirok etadi. Bu kabi erishilgan yutuqlar tumanimizda murabbiylar va sportchi yoshlar uchun yaratilgan shart-sharoitlarning amaliy natijasi, desak mubolagʻa boʻlmaydi.

“Hokim sovrini” uchun oʻtkazilgan musobaqaning yakuniy nataijalariga koʻra, 10-11 yosh chegarasida Jahonsher Abdurasulov, Behruzbek Farhodov, Fozilbek Yoʻldoshev hamda Niyozbek Safarniyozovlar oʻz vazn toifalarida 1-oʻrinni qoʻlga kiritishdi. 12-13 yoshli sportchilar oʻrtasida kechgan murosasiz bellashuvlarda Yaxibbay Abatbayev, Javohir Olloyorov, Artur Utegenov hamda Alisher Mambetboyevlar oʻz vazn toifalarida raqiblaridan ustun ekanliklarini isbotlashdi. Musobaqa davomida yigitlar qatorida qizlar ham abjirliklarini namoyon qilishdi. 14-15 yosh chegarasida qizlar oʻrtasida oʻtkazilgan bellashuvlarda Ulzada Utepbergenova hamda Aziza Sotiboldiyevalar oʻz vazn toifasida gʻoliblikka munosib koʻrildi. Shuningdek, musobaqa davomida oʻtkazilgan professional janglarda Mirjalol Yarashbayev hamda Bekniyaz Aytniyazovlar oʻz vazn toifasida 1-oʻrinni yengib olishdi.

Musobaqa soʻngida gʻolib boʻlgan sportchilar tuman hokimligi tomonidan diplom va estalik sovgʻalari bilan taqdirlandi.

Abror Otajonov, Amudaryo tumani sport maktabi qoʻl jangi boʻyicha katta murabbiyi.