Mangʻit shahridagi zamonaviy umumiy ovqatlanish shoxobchalari soni yana bittaga koʻpaydi

Mamlakatimizda amalga oshirilayotgan ijtimoiy-iqtisodiy islohotlarning pirovard natijasi aholi bandligini taʼminlash, tadbirkorlikni rivojlantirish, xususan xizmatlar koʻrsatish sifatini oshirishga qaratilgan. Bugungi kunda umumiy ovqatlanish shoxobchalari – restoran va kafelar mamlakatimizda iqtisodiyotning asosiy tarmoqlaridan biriga aylangan.

Amudaryo tumanida infratuzilmani rivojlantirish, aholiga, ayniqsa, tumanimizga tashrif buyuruvchi mehmonlar va turistlarga sifatli xizmat koʻrsatuvchi mehmonxonalar va restaronlarni tashkil etish uchun bir qator sharoitlar yaratilmoqda. Shu oʻrinda mahalliy tadbirkorlar tomonidan soha rivoji yoʻlida koʻplab yangi koʻngilochar maskanlar, umumiy ovqatlanish shoxobchalari barpo etilmoqda. Tumanimizning Olmazor mahallasida yaqinda ish faoliyatini boshlagan “Diamond” restorani ham shular jumlasidandir.

Muassasaning tantanali ochilish marosimida Amudaryo tumani hokimi Sobir Xoʻjametov, hokim oʻrinbosarlari, sektor rahbarlari, tadbirkorlar, nuroniylar va aholi vakillari ishtirok etishdi.

Tadbirni tuman hokimi Sobir Xoʻjametov tabrik soʻzi bilan ochib, muassasa rahbariyatini samimiy takrikladi va tadbirkorlarning kelgusi faoliyatidagi muvaffaqiyatlarga tilakdosh boʻldi.

Darhaqiqat, Amudaryo tumani oʻziga xos pazandachilik maktabiga ega boʻlib, bir-biridan betakror taomlari va taom tayyorlash anʼanalarining turli-tumanligi bilan ajralib turadi. Shuningdek, tumanimizga tashrif buyurgan mehmonlar orasida Amudaryo baliqlari va baliq taomlari mashhur.

Mamlakatimizda umumiy ovqatlanish sohasini rivojlantirish uchun zarur tashkiliy-huquqiy shart-sharoitlar yaratilgan. Umumiy ovqatlanish yoʻnalishida faoliyat yuritayotgan tadbirkorlarni qoʻllab-quvvatlash, yuqori malakali oshpazlar va mutaxassislar tayyorlashga ham katta eʼtibor berilmoqda. Bularning barchasi milliy pazandachilikning nufuzining yanada oshishiga, uni keng miqyosda ommalashtirishga zamin yaratadi.

Tadbirda ishtirok etgan nuroniy hoji otaxonlar yurtimizga tinchlik, qut-baraka, tadbirkorlarimizning ishlarida rivoj tilab, duo qilishdi.

Shundan keyin mehmonlar marosim uchun maxsus tayyorlangan ramziy tasmani kesib, restoranga tashrif buyurishdi.

Maʼlumot oʻrnida, “Diamond” umumiy ovqatlanish majmuasi “Rasulov Oybek taomlari” oilaviy korxonasi tomonidan tashkil etilgan. Mazkur oilaviy korxona 2011-yildan buyon umumiy ovqatlanish sohasida samarali faoliyat yuritadi. Ayniqsa, korxona tarkibidagi “Olmos” kafesi yaratilgan sharoitlar, oʻziga xos taomlari va xizmat koʻrsatish sifati bilan aholi orasida alohida eʼtirof etilgan.

“Diamond” restoranining birinchi qavati milliy anʼanalar asosida jihozlangan boʻlib, bir vaqtning oʻzida 120 nafar mijozga xizmat koʻrsatadi. Ayniqsa, nuroniylar uchun moslangan milliy supalar mehmonlar eʼtiborini oʻziga jalb qiladi. Ikkinchi qavat esa zamonaviy-meʼmoriy andozalar asosida ishlov berilgan zaldan iborat boʻlib, bu oʻrinda har xil ziyofatlar oʻtkazish imkoniyati mavjud. Restoran taomnomasidan milliy taomlar, turk va yevropacha taomlar joy olgan.

Taʼkidlash joizki, “Diamond” restorani “Rasulov Oybek taomlari” oilaviy korxonasining oʻz mablagʻlari hamda “Hamkorbank” aktsiyadorlik tijorat bankidan 7-yil muddatga olingan 2 mlrd soʻm kredit mablagʻlari hisobidan barpo etildi. Mazkur restoranda 30 nafar fuqaroning har xil vazifalarda bandligi taʼminlangan.

Mamlakatimizda xizmat koʻrsatish sohasida oilaviy tadbirkorlikni rivojlantirishga eʼtibor qaratilishi va bu faoliyatni qoʻllab-quvvatlash natijasida hududlarda mana shunday restoran, kafe, mehmonxona va koʻngilochar maskanlar soni koʻpaymoqda. Bu kabi zamonaviy sharoitlarga ega boʻlgan xizmat koʻrsatish muassasalari barcha amudaryoliklar, tumanimizga tashrif buyurgan mehmonlar va xorijliklarning dam olib, hordiq chiqarishlari uchun ayni muddaodir.

Shohzod Qurbonboyev