Tuman hokimi tadbirkorlar murojaatlarini tingladi

Oʻzbekiston Respublikasi Prezidentining tadbirkorlar bilan ochiq muloqoti oldidan masʼullar ishbilarmonlar bilan uchrashib, ularning muammolarini tinglamoqda va takliflarini oʻrganmoqda. Amudaryo tumanida ham tadbirkorlarning murojaat va takliflarini jamlash hamda tahlil qilish maqsadida mutasaddilarning shaxsiy qabullari uyushtirilmoqda. Masʼul xodimlar tomonidan tumandagi tadbirkorlar bilan har kuni manzilli uchrashuvlar oʻtkazilib, tadbirkorlarning muammolari va takliflari oʻrganilmoqda.

Amudaryo tumani hokimligining majlislar zalida tuman hokimi Sobir Xoʻjametovning tadbirkorlar muammolarini oʻrganish, hal etish, ularni har tomonlama qoʻllab-quvvatlash maqsadida tadbirkorlar bilan uchrashuvi tashkil etilib, unda muammoli masalalar yuzasidan murojaatlar qabul qilindi. Qabul jarayonida tuman hokimi oʻrinbosarlari, hokimlik masʼul xodimlari, boʻlimlar boshliqlari, tijorat banklari masʼullari, ovul va mahallalardagi hokim yordamchilari hamda tadbirkorlar ishtirok etdilar.

Maʼlumki, butun respublikamiz boʻylab, muhtaram Prezidentimizning tadbirkorlar bilan Qoraqalpogʻiston Respublikasida boʻlib oʻtadigan ochiq muloqoti doirasida tuman va shahar hokimliklarida tadbirkorlik subʼektlarining murojaatlari va takliflarini oʻrganish boʻyicha sayyor qabullar, uchrashuvlar tashkil etilmoqda. Amudaryo tumanida boʻlib oʻtgan qabul jarayonini tuman hokimi Sobir Xoʻjametov tadbirkorlarga yaratilayotgan imkoniyatlar, ularga boʻlgan eʼtibor va gʻamxoʻrlik, olib borilayotgan tub isohotlar haqida kirish soʻzi bilan ochib berdi.

Taʼkidlanganidek, mamlakatimizda ishbilarmonlik muhitini yanada yaxshilash, tadbirkorlikka keng imkoniyatlar yaratish borasida bir qator ishlar amalga oshirilmoqda. Muhtaram Prezidentimizning Qoraqalpogʻiston Respublikasidagi tadbirkorlarni qoʻllab-quvvatlash borasida imzolagan qaror hamda farmonlari bu borada muhim dasturulamal boʻlib xizmat qilmoqda.

Xususan, “Qoraqalpogʻiston Respublikasida tadbirkorlik, innovatsion texnologiyalar va infratuzilmalarni jadal surʼatlarda rivojlantirish orqali aholi farovonligini oshirishning qoʻshimcha chora-tadbirlari toʻgʻrisida”gi hamda “Qoraqalpogʻiston Respublikasida tadbirkorlarga qulay sharoitlar yaratishga oid qoʻshimcha chora-tadbirlar toʻgʻrisida”gi Prezident farmonlari, shuningdek, “Oʻzbekiston Respublikasi Prezidentining tadbirkorlar bilan 2023-yildagi ochiq muloqotida belgilangan vazifalarni amalga oshirish chora-tadbirlari toʻgʻrisida”gi hamda “Hududlarda tadbirkorlik loyihalarini moliyalashtirish mexanizmlarini yanada kengaytirish chora-tadbirlari toʻgʻrisida” Prezident qarorlari asosida tadbirkorlik rivoji yangi bosqichga koʻtarilmoqda.

Amudaryo tumanida oʻtkazilgan qabul jarayonida tadbirkorlar turli masalalar yuzasidan tuman hokimiga murojaat qildilar. Xususan, maishiy xizmat koʻrsatish boʻyicha tadbirkorlik faoliyatini yanada kengaytirish uchun kredit mablagʻlari olishda amaliy yordam berish, oilaviy bogʻcha ochish uchun kredit olishdagi muammolarini hal etishda, baliqchilik faoliyatini yanada kengaytirish, doʻkon qurish uchun yer olishda, qoʻshimcha bino ajratilishida, koʻchma doʻkon uchun yer olishda amaliy yordam soʻrab qilingan jami 20ga yaqin murojaatlar tegishli masʼullar ishtirokida chuqur tahlil qilindi hamda ularni ijobiy hal etish boʻyicha topshiriqlar berildi.

Maʼlumot oʻrnida aytish joizki, tadbirkorlarning muammo va takliflarini bevosita oʻrganish, tadbirkorlikni kelgusida ribvojlantirishning asosiy yoʻnalishlarini belgilab olish boʻyicha har yili oʻtkaziladigan Oʻzbekiston Respublikasi Prezidentining tadbirkorlar bilan ochiq muloqotini yuqori saviyada oʻtkazish maqsadida “Oʻzbekiston Respublikasi prezidentining tadbirkorlar bilan ochiq muloqotini tashkil qilish chora-tadbirlari toʻgʻrisida”gi Prezident qarori imzolangan.

Qarorga asosan, Prezidentning tadbirkorlar bilan ochiq muloqotini tashkil qilish boʻyicha respublika komissiyasi, shuningdek, hududlarda tadbirkorlar muammolarini oʻrganish va hal qilish boʻyicha ishchi guruhlar tuzildi.

15-iyundan ochiq muloqot oʻtkazilgunga qadar maxsus elektron platformalar, Savdo-sanoat palatasi huzuridagi Call-markaz xizmati, ijtimoiy tarmoqlar va sayyor qabullar orqali tadbirkorlar murojaatlarini tun-u kun qabul qilish tizimi yoʻlga qoʻyildi. Shuningdek, qarorda Qoraqalpogʻiston Respublikasida 2024-yilning avgustida xalqaro biznes forum ham oʻtkazilishi belgilangan. Ayni payda respublikada ochiq muloqot va biznes forumga tayyorgarlik jarayonlari qizgʻin pallaga kirgan.

Charos Arslonova, tuman hokimligining Axborot xizmati rahbari.