Qishloq xoʻjaligiga moʻljallangan yerlardan samarali foydalanish boʻyicha tushuntirish-targʻibot ishlari oʻtkazilmoqda

Keyingi yillarda qishloq xoʻjaligiga moʻljallangan yerlardan va suv resurslaridan samarali foydalanish, qishloq xoʻjaligi mahsulotlari yetishtiruvchilarni har tomonlama qoʻllab-quvvatlash boʻyicha tizimli chora-tadbirlar amalga oshirilmoqda.

Shu bilan birga yetishtirilayotgan qishloq xoʻjaligi mahsulotlarining hajmlarini oshirish, qishloq xoʻjaligiga moʻljallangan yer uchastkalarini ikkilamchi ijaraga berish imkoniyatlarini kengaytirish, pillachilik va tutchilikka ixtisoslashgan fermer xoʻjaliklariga, agrosanoat klasterlariga va boshqa yuridik shaxslarga ajratilgan yer maydonlaridan samarali foydalanish muhim masalalardan hisoblanadi.

Shu maqsadda qabul qilingan tegishli hujjatlar bilan qishloq xoʻjaligiga moʻljallangan yer uchastkalarining dala chetlaridagi kanallar, sugʻorish va kollektor-drenaj tarmoqlari atrofidagi maydonlarida hamda bogʻlar va tokzorlarning qator oralariga maqbul ekinlar ekilishi yoki tut koʻchatlari oʻtqazilishi yoʻlga qoʻyilmoqda.

Soha masʼullari tomonidan tumanimizdagi ovul va mahallalarda fermer xoʻjaliklari raislari bilan oʻtkazilayotgan uchrashuvlarda qishloq xoʻjaligiga moʻljallangan yer maydonlaridan unumli foydalanishga doir muhim tavsiyalar berilmoqda. Oq oltin ovulida tashkil qilingan tadbirda fermer xoʻjaliklari raislariga shu kabi masalalar bilan bir qatorda soha qonunchiligiga doir yangiliklar haqida ham axborot berildi.

Mazkur tadbirda Agrosanoat majmui ustidan nazorat qilish inspektsiyasi Amudaryo tumani boʻlimi boshligʻi Sarvar Matyoqubov, inspektsiyaning tuman boʻlimi bosh mutaxassisi Akrom Erdashev, Oq oltin ovuli qishloq xoʻjaligi agronomi Anvar Xalimbetov va fermer xoʻjaliklari raislari ishtirok etishdi.

Dastlab inspektsiyaning Amudaryo tumani boʻlimi boshligʻi Sarvar Matyoqubov soʻzga chiqib, qishloq xoʻjaligiga moʻljallangan yer uchastkalari, kanallar, sugʻorish va kollektor-drenaj tarmoqlari atrofidagi maydonlarida maqbul ekinlar ekilishi yoki tut koʻchatlari oʻtqazilishining ahamiyati toʻgʻrisida fikr-mulohazalarini bildirdi. Shuningdek, endilikda fermer xoʻjaliklari ushbu vazifalarni bajarmasdan, belgilangan oʻrinlarni oʻz holiga tashlab qoʻygan taqdirda taqdimnomalar kiritilib, yer ijara shartnomalari bir taraflama bekor qilinishi maʼlum qilindi.

Taʼkidlanganidek, Oʻzbekiston Respublikasi Yer Kodeksiga kiritilgan qoʻshimchaga koʻra, pillachilik va tutchilikka ixtisoslashgan fermer xoʻjaliklari, agrosanoat klasterlariga va boshqa yuridik shaxslarga maydoni 10 gektargacha boʻlgan yer uchastkalari ajratilishi mumkin.

Maʼlumot oʻrnida, Oʻzbekiston Respublikasi Yer Kodeksining 40-moddasi hamda “Fermer xoʻjaligi toʻgʻrisida”gi Oʻzbekiston Respublikasi Qonunining 17-moddasiga koʻra, yerdan belgilangan maqsadga muvofiq oqilona foydalanish, qishloq xoʻjaligiga moʻljallangan yer uchastkalarining dala chetlaridagi kanallar, sugʻorish va kollektor-drenaj tarmoqlari atrofidagi maydonlarida maqbul ekinlar ekilishini yoki tut koʻchatlari oʻtqazilishini taʼminlash, asosiy ekinlarning rivojlanishiga salbiy taʼsiri boʻlmagan hollarda bogʻlar va tokzorlarning qator oralariga daromad keltirishi mumkin boʻlgan maqbul ekinlar ekilishini taʼminlash yerdan foydalanuvchilar va ijarachilarga alohida majburiyat qilib belgilangan. Ushbu vazifalarni bajarish fermer xoʻjaliklarining asosiy majburiyatlaridan hisoblanadi.

Bundan tashqari, tadbir davomida fermer xoʻjaliklari raislariga ushbu yer maydonlariga belgilangan ekinlarni ekish boʻyicha yuridik va jismoniy shaxslarga ikkilamchi ijara sifatida 10-yilgacha ijaraga berish huquqi mavjudligi ham tushuntirildi.

Tadbir yakunida ishtirokchilarning mazkur masalalar boʻyicha murojaatlariga mutaxassislar tomonidan javob va tavsiyalar berildi.

Sarvar Matyoqubov, Agrosanoat majmui ustidan nazorat qilish inspektsiyasining Amudaryo tumani boʻlimi boshligʻi.