Harbiy xizmat yoshlarni jismonan kuchli va maʼnan yetuk qilib tarbiyalaydi

Bugun jahon siyosiy maydonida axborot urushlari, tinchlikka raxna soluvchi turli tahdidlar soni koʻpayar ekan, ularga qarshi sobit tura oladigan, maʼnan va jismonan yetuk Vatan himoyachilarini tarbiyalash, mamlakat mudofaa salohiyatiga eʼtibor berish muhim vazifalardan biri hisoblanadi. Shu maqsadda har yili mamlakatimizda harbiy xizmat chaqiruviga tayyorgarlik koʻrish yuzasidan tanlov tadbirlari tashkil etiladi.

Amudaryo tumanida ham 2025-yilgi muddatli harbiy xizmat chaqiruviga tayyorgarlik koʻrish maqsadida tanlov tadbirlari boʻlib oʻtmoqda. Oʻzbekiston Respublikasining “Umumiy harbiy majburiyat va harbiy xizmat toʻgʻrisida”gi Qonuni, Vazirlar Mahkamasining 2019-yil 9-aprel kungi “Chaqiriluvchilarni tanlab olish toʻgʻrisida”gi tegishli qarori asosida tuman hokimi qarori bilan tayinlangan Tanlov kengashi tomonidan Mudofaa ishlari boʻlimi bilan hamkorlikda tashkil etilgan ushbu tanlov tadbirlarida 18 yoshdan 27 yoshgacha boʻlgan, yaʼni 1998-2007-yillar oraligʻida tugʻilgan va ilgari harbiy xizmatni oʻtamagan yigitlar qatnashishmoqda.

Hozirgi kunda chaqiriluvchi yoshlar tuman Mudofaa ishlari boʻlimida boʻlib oʻtayotgan muddatli harbiy xizmatga tanlov tadbirlarida faol ishtirok etib, oʻz salohiyatlarini sinovdan oʻtkazishmoqda. Chaqiriluvchilarning jismoniy tayyorgarlik darajasini aniqlash uchun turnikda tortilish, 100 metrlik hamda 3000 metrli masofaga yugurish boʻyicha sinovlar oʻtkazilmoqda. Ushbu sinovlarda muvaffaqiyatli qatnashgan, belgilangan shartlarni oʻz vaqtida epchillik bilan bajargan yigitlar suhbatga qatnashish imkoniyatiga ega boʻlishmoqda.

Maʼlumot oʻrnida, Amudaryo tumanida muddatli harbiy xizmatga tanlov tadbirlari joriy yilning 12-avgust kunidan boshlangan boʻlib, 2025-yilning 10-fevral kuniga qadar davom etadi. Ushbu tanlov tadbirlarida qoʻyilgan sinovlardan muvaffaqiyatli ravishda oʻtgan yigitlar muddatli harbiy xizmatga joʻnatiladi.

Tanlovda umumjismoniy tayyorgarlik darajasi yuqori baholangan chaqiriluvchilarga yakka tartibdagi suhbatga kirishga ruxsat beriladi. Umumjismoniy tayyorgarlikda yigitlarning turnikda tortilish, 100 metrga va 3000 metrga yugurish darajasi sinovdan oʻtkaziladi. Yakka tartibdagi suhbatda esa chaqiriluvchilarning dunyoqarashi, oilaviy ahvoli, bilim salohiyati oʻrganiladi hamda tarix fanidan savol-javob oʻtkazilib, intellektual darajalari aniqlanadi. Shunga koʻra chaqiriluvchini muddatli harbiy xizmatga joʻnatishga yoki joʻnatmaslikka tavsiyalar beriladi.

Yakka tartibdagi suhbatdan muvaffaqiyatli oʻtgan chaqiriluvchilar tibbiy komissiyadan hamda butlash komissiyasi tomonidan suhbatdan oʻtkazilib, yakuniy qaror qabul qilish uchun Mudofaa ishlari boshqarmalaridagi harbiy tibbiy komissiya va rahbariyat kengashiga yuboriladi. Chaqiriluvchilar harbiy tibbiy komissiyasi xulosasiga koʻra, sogʻlom deb topilganda rahbariyat kengashi tomonidan ushbu chaqiriluvchilar qoʻshin turiga tayinlanadi hamda chaqiriluvchiga qaysi hududga va qachon ketishi aytiladi. Muddatli harbiy, yaʼni bir yillik xizmatni oʻtashga yaroqli deb topilmagan hamda chaqirilish muddatini kechiktirish va chaqirilishdan ozod etilish huquqiga ega boʻlmagan, biroq Qurolli Kuchlar safiga navbatdagi muddatga chaqirilmagan fuqarolar bir oylik safarbarlik chaqiruvi rezervi safiga olinadi.

Tuman Mudofaa ishlari boʻlimi xodimlari tomonidan ovul va mahallalarda oʻtkazilgan targʻibot tadbirlarida Qurolli Kuchlarimiz saflarida xizmat qilish nafaqat konstitutsiyaviy burch, balki qatʼiy maqsad, yuksak maʼnodagi shon-sharaf ekanligi taʼkidlanib, yoshlar qalbidagi vatanparvarlik tuygʻulari kuchaytirilmoqda. Shu bilan birga harbiy xizmatdan boʻyin tovlash jiddiy javobgarlikka sabab boʻlishi ham keng tushuntirilib borildi.

Oʻzbekiston Respublikasi Konstitutsiyasining 64-moddasida “Oʻzbekiston Respublikasini himoya qilish – Oʻzbekiston Respublikasi har bir fuqarosining burchidir. Fuqarolar qonunda belgilangan tartibda harbiy xizmatni oʻtashga majburdirlar” deb koʻrsatilgan. Zero, Oʻzbekiston Respublikasi Qurolli Kuchlari tarkibini jismonan baquvvat va maʼnan yetuk askarlar bilan butlash va Vatanimizning ravnaqi yoʻlida xizmat qilishga daʼvat etish vazifasini aʼlo darajada bajarish barchamizning burchimiz va majburiyatimizdir.

Fursatdan foydalanib, tumanimizning 18 yoshdan 27 yoshgacha boʻlgan barcha yigitlarini tanlov tadbirlarida qatnashishlari uchun haftaning dushanba kunidan shanba kuniga qadar Mudofaa ishlari tuman boʻlimi maʼmuriy binosiga kelishlarini soʻrab qolamiz!

 Qahramon Ahmedov, tuman Mudofaa ishlari boʻlimi chaqiruv boʻlinmasi boshligʻi