Xalq deputatlari Amudaryo tuman kengashining navbatdagi 79-sessiyasi toʻgʻrisida axborot

Amudaryo tumani hokimligining majlislar zalida Xalq deputatlari Amudaryo tuman Kengashining navbatdagi 79-sessiyasi boʻlib oʻtdi. Sessiya majlisida Xalq deputatlari tuman kengashi deputatlari, tuman saylov komissiyasi aʼzolari, siyosiy partiyalarning tuman kengashlari rahbarlari hamda ommaviy axborot vositalari vakillari ishtirok etdilar.

Sessiyani 13-Qilichboy saylov okrugidan deputat Bahrom Qadirov ochdi va olib bordi.

Sessiya majlisida tumanni ijtimoiy-iqtisodiy rivojlantirish va aholi turmush farovonligini yanada yaxshilashga oid qator masalalar yuzasidan tegishli masʼullarning hisobotlari hamda axborotlari tinglandi.

Xususan, kun tartibidagi dastlabki – 2024-yilning 7 oy davomida huquqbuzarliklar profilaktikasi va jinoyatchilikka qarshi kurashish boʻyicha amalga oshirilgan ishlar toʻgʻrisidagi masala yuzasidan tuman Ichki ishlar boʻlimi boshligʻi Muxammetali Xojamuratovning hisoboti tinglandi.

Hisobotda keltirilishicha, joriy yilning 7 oyi davomida tuman hududida jamoat xavfsizligini taʼminlash, huquqbuzarlik va jinoyatlarning barvaqt oldini olish borasida bir qator ishlar amalga oshirilgan. Xususan, “Profilaktika kuni” tadbirlari davomida 108ta jinoyatlar muhokama qilingan, 38 ming 76ta xonadon oʻrganilib, huquqbuzarlik sodir etish yoki undan jabrlanish ehtimoli yuqori boʻlgan 1 ming 419 nafar shaxslar bilan ijtimoiy profilaktik tadbirlarni amalga oshirish boʻyicha “Mahalla yettiliklari”ga xulosalar taqdim etilgan. Mahalla faollari tomonidan 1 ming 207 nafar ijtimoiy profilaktika obʼekti boʻlgan shaxslarning muammolarini ijobiy hal etish choralari koʻrilgan.

Shundan soʻng sessiya kun tartibidagi navbatdagi masala – mahalliy byudjetning 2024-yil 1-choragi holatiga elektron savdo maydonchasida yer uchastkalariga boʻlgan huquqlarni sotishdan tushadigan mablagʻlari hisobidan mablagʻ ajratish toʻgʻrisidagi masala yuzasidan tuman hokimligining bosh mutaxassisi Jahongir Yoʻldoshov hisobot berdi.

Sessiya kun tartibidagi navbatdagi masala yuzasidan tuman hokimligi bosh mutaxassisi Jahongir Haydarov hisobot berib, Oʻzbekiston Respublikasi Prezidentining 2023-yil 1-iyundagi “Pillachilik sohasida kasanachilikni qoʻllab-quvvatlash hamda pilla yetishtirish uchun ozuqa bazasini yanada kengaytirishning qoʻshimcha chora-tadbirlari toʻgʻrisida”gi farmoni hamda Qoraqalpogʻiston Respublikasi Vazirlar Kengashining 2024-yil 12-avgust kungi 22-sonli qarori ijrosini taʼminlash maqsadida tuman hokimligi zaxira yer fondi hisobidan umumiy maydoni 42,2 gektar yer maydonlarini ochiq elektron tanlovga qoʻyish taklifini bildirdi.

Shundan soʻng Kengashning Sud-huquq masalalari va korruptsiyaga qarshi kurashish boʻyicha doimiy komissiyasi raisi Muzaffar Yeshchanovning “Oʻzbekiston Respublikasi Oliy Majlisi Qonunchilik palatasi, Qoraqalpogʻiston Respublikasi Joʻqorgʻi Kengesi va xalq deputatlari Amudaryo tuman Kengashi deputatligiga saylov oʻtkazuvchi uchastka saylov komissiyalari aʼzoligiga nomzodlarni tavsiya etish toʻgʻrisida”gi masala yuzasidan axboroti tinglandi.

Axborotda tumandagi uchastka saylov komissiyalari aʼzoligiga taklif etilgan nomzodlar Xalq deputatlari Amudaryo tumani Kengashining Sud-huquq masalalari va korruptsiyaga qarshi kurashish boʻyicha doimiy komissiyasi yigʻilishida dastlabki tarzda koʻrib chiqilgani hamda 64ta uchastkaning har biriga 11-13 nafardan jami 754 nafar nomzodlar koʻrsatilgani taʼkidlandi.

Deputatlar kun tartibidagi barcha masalalar boʻyicha axborot va hisobotlarni tinglab, fikr-mulohazalarini bildirdilar. Faol muhokamalardan keyin sessiya kun tartibidagi barcha masalalar yuzasidan tegishli qarorlar qabul qilindi.

Charos Arslonova, tuman hokimligining Axborot xizmati rahbari.