ДЕПУТАТ ХОНИМЖОН РАЖАБОВА НОГИРОНЛИГИ БЎЛГАН ФУҚАРОЛАР БИЛАН УЧРАШДИ

3 декабрь – Халқаро ногиронлар куни Бирлашган миллатлар ташкилоти томонидан 1992 йилда белгиланган ва бутун дунёда кенг нишонланиб келинмоқда. Унинг мақсади – жамият ҳаётининг барча соҳаларида ногиронлар ижтимоий фаоллигини ошириш, уларнинг ҳуқуқларини ҳимоя қилиш, шунингдек, ногиронлар муаммоларига кенг жамоатчилик эътиборини жалб қилиш орқали ногиронлиги бўлган шахсларнинг ҳар қандай соғлом одамдан кам эмаслигини амалда намоён этишдир. Мамлакатимизда, шу жумладан Амударё туманида ҳам ушбу тадбирни нишонлаш анъанага айланган. Нафақат сана муносабати билан, балки йил давомида, турли байрамларда ҳам туманнинг турли ҳудудларида истиқомат қилувчи ногиронлиги бўлган шахсларга ҳурмат-эҳтиром кўрсатилади.

“Бир мискин кўнгилни шод этиш – Каъбатуллоҳни зиёрат қилиш билан баробар”, дейди доно халқимиз. Ҳақиқатан ҳам салгина меҳр ва эътибордан қалблари бир олам шодликка тўлувчи ногиронлиги бўлган инсонларнинг қувончларига шерик бўлиш, орзу-интилишларини рағбатлантириш, уларнинг муаммоларини ҳал этишга кўмаклашиш, ҳақ-ҳуқуқларини ҳимоя қилиш ҳар бир соғлом инсоннинг бурчидир.

Халқ депутатлари Амударё туман Кенгаши депутати Хонимжон Ражабова Халқаро ногиронлар куни арафасида Манғит шаҳрининг Бойовул маҳалласида истиқомат қилувчи ногиронлиги бўлган фуқаролар билан учрашди ва ўзининг депутатлик ваколати доирасида уларнинг муаммоларини ўрганиб, орзу-интилишларини рағбатлантириш мақсадида дилдан суҳбат ўтказди.

Депутат маҳаллада яшовчи 1992 йилда туғилган II гуруҳ ногирони Инобат Каримова, Баҳор кўчасида истиқомат қилувчи, 1977 йилда туғилган I гуруҳ ногирони Саломат Казакова, Қиличбой кўчасида яшовчи, II гуруҳ ногиронлари, 1988 йилда туғилган Равшан Атабаев ва 1992 йилда туғилган Шоира Ерлапасова ҳамда 1996 йилда туғилган Юлдуз Габдулхабировалар билан учрашиб, уларга байрам муносабати билан шахсий совғаларини топширди.

Ногиронлиги бўлган фуқаролар орасида шундай инсонлар ҳам борки, соғлом одамларга нисбатан уларнинг имкониятлари чекланган бўлсалар-да. алоҳида қобилиятлари билан ажралиб туришади. Бойовул маҳалласида ҳам бундай иқтидор эгалари талайгина. Улардан бири – I гуруҳ ногирони Саломат Казакова шеърият, адабиёт шайдоси. У “мен ногиронман”, деб ўзининг кўнглини ўзи чўктирмади. Ўз устида тинимсиз ишлаб, бири-биридан дилбар шеърлар, ҳаётий ҳикоялар ёзди. Ёзганлари туман ва республика миқёсидаги газеталарда ёритилиб, даврий нашрлар орқали кенг оммага тарқатилганида, уни ҳар доим ижод қилишга ундаган устозлари – “Тараққиёт кўзгуси” газетаси таҳририяти ижодкорларининг ишончини оқлашга интилди. Саломатнинг турли даврий нашрларда чоп этилган ижод намуналари мўъжаз бир китоб бўлгулик.

Хонимжон Ражабова Бойовул маҳалласида истиқомат қилувчи ногиронлиги бўлган фуқаролар билан учрашувида дилдан, самимий мулоқот қилиш орқали уларнинг ҳар бирига маънавий куч ва байрамона кайфият бағишлади.

Робия Йўлдошева.