1-сонли мактабда Янги йил муносабати билан тадбир бўлиб ўтди
Янги йил – қалбларга ўзгача қувонч ва ҳаяжон улашувчи, катталарни ҳам бир зумга болаликка қайтарадиган ажиб мўъжизавий байрам! Ушбу байрам шукуҳи кезиб юрган паллаларда хонадонларимиз гўзаликка бурканади. Уйимиз тўридан жой олган арчанинг шохларига турли безакларни илиб, кичкинтойларга қўшилиб, биз ҳам суюнамиз. Ҳа, Янги йил кайфияти юртдошларимизни анча вақтгача тарк этмайди. Уйимиздаги меҳр ила безатилган зарлар эса, то қиш тугамагунча олиб ташланмайди. Албатта, бу одамларнинг нақадар Янги йилни севишидан далолат. Унинг бошқа байрамлардан фарқи ҳам шунда.
Шу билан бирга, Янги йил юртимиздаги барча муассаса ва ташкилотларда, таълим масканларида кўтаринки руҳда нишонланади. Жойларда байрам муносабати билан ўтказилаётган тадбирларнинг бири иккинчисини такрорламайди. Ҳар бир байрам тадбирининг ўзига хос томони бор. Масалан, яқиндагина Амударё туманидаги 1-сонли умумтаълим мактабида ўтказилган “Мўъжизавий янги йил” мавзуси остида ташкил қилинган байрам тадбирини бошловчилар ўзбек тилидан ташқари, рус ва инглиз тилларида ҳам олиб боришди. Бу эса, байрам кечасининг нафақат ўзгача ўтишини таъминлади, балки байрамда қатнашаётган бошқа ўқувчиларнинг ҳам чет тиллари бўйича саводхонлигининг ортишига ҳисса қўшди.
Байрам саҳнаси ранг-баранг декорациялар ва қишки манзаралар туширилган расмлар, юлдузчалар билан безатилди. Бу эса, йиғилганларнинг кўнгилларига байрамона руҳ олиб кирди.
Байрам тадбирини мактаб директори Дилрабо Шербоева очиб берди ҳамда ўқитувчиларни ва ўқувчиларни байрам билан табриклаб, уларнинг ўқиш ва ишларида зафарлар тилади.
Шундан сўнг байрам тадбирининг бадиий қисмига навбат берилди. Саҳнада турли ёшдаги ўқувчилар жозибали рақсларга тушиб, йиғилганларга байрамона кайфият улашди. Кейин эса, базмга Қорбобо ва Қорқиз ташриф буюриб, болажонларга байрам совғаларини тақдим этдилар. Улар билан биргаликда қиш фаслининг таровати, гўзалликлари ҳақида суҳбатлашдилар. Бошланғич синф ўқувчилари саҳнага чиқиб, ўзларининг қиш ва янги йил ҳақидаги шеър ва қўшиқларини айтиб беришди. Айниқса, 6-синф ўқувчиларининг “Jingle Bells” қўшиғига рақсга тушиши даврага ўзгача файз бағишлади.
Шунингдек, болажонларнинг севимли эртакларидан бири бўлган “Оппоғой ва етти гном” эртаги асосида саҳналаштирилган байрам эртаги томошаси йиғилганларни бир зумга эртаклар оламига олиб киргандай бўлди. Шу тариқа байрам кечаси бир-биридан ажойиб байрам қўшиқлари ижроси билан давом этди.
Айниқса, ўқувчилар ижросида янграган “Буратино”, “Калинка”, “Тень тень над водой”, “Снег идёт” каби қўшиқлар ва рақслар байрам қатнашчиларининг олқишларига сабаб бўлди. Тадбир ўқувчиларда олам-олам таассурот қолдирди.
Албатта, бу каби тадбирлар ўқувчиларда ижодий қобилиятларини шакллантиргани, бир-бирлари билан ўзаро ҳамжиҳатликда ишлашиш кўникмаларини ўстириши, жамоа бўлиб, ўз истеъдодларини ривожлантириши, шунингдек, дарсдан ташқари бўш вақтини мазмунли ўтказгани билан аҳамиятлидир.
Сўзимиз аввалида Янги йил катталарни ҳам бир зумга болаликка қайтаради, деб айтган эдик. Ҳа, чиндан ҳам шундай. Сабаби, Янги йилда ҳар бир инсон қачонлардир Қорбободан совға кутган. Деразадан мўралаб, Қорбобо келишини интиқлик билан соғинган. Улғайгач эса, кўпчилик Янги йил арафасида яқинларидан байрам табриклари, байрам совғалари қабул қилишади. Кимдир фарзандидан, кимдир эса қўшнисидан, қариндошидан.
Сўзимиз сўнгида ана шу совғаларга қўшалоқ тарзда, кириб келган янги 2025 йил инсонларга кутилмаган ҳадялар ва кутилмаган хушхабарларни тортиқ қилсин, деймиз.
Азиза Мадраҳимова
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
