“Бизнес асослари” фанини ўқитишда янгича ёндашув: таълим жараёнида инновацион метод ва технологияларнинг аҳамияти
Бугунги кунда таълим тизимида инновацион ёндашув ва замонавий методларни қўллаш муҳим аҳамиятга эга бўлиб, айниқса, бизнес асослари каби амалий фанларни ўқитишда бу янада долзарб масала саналади. Ўқувчиларни бозор иқтисодиётининг тамойиллари, тадбиркорлик кўникмалари ва молиявий саводхонликка ўргатиш учун янги ва самарали педагогик методларни жорий қилиш муҳимдир.
2024-2025 ўқув йилидан бошлаб Ўзбекистон Республикаси Олий таълим, фан ва инновациялар вазирлиги ва Германия жамғарма кассалари фонди (Герман Sparkассенстифтунг) ҳамкорлигида ишлаб чиқилган янги дастур асосида бизнес асослари фани профессионал таълим муассасаларида ўқитилмоқда. Ушбу дастур назарий билимларни бериш билан чекланиб қолмасдан, ўқувчиларда реал бизнес кўникмаларини ҳам шакллантиришга хизмат қилади.
2025 йилнинг 3 январь куни Амударё туманидаги 2-сон политехникумда “Жамғарма ўйини стимуляцияси” модули асосида молиявий саводхонликни оширишга қаратилган кенг қамровли семинар ўтказилди. Ушбу семинар ўқувчиларнинг тадбиркорлик кўникмаларини ривожлантиришга қаратилган бўлиб, унда политехникумнинг ўқитувчилари ва ишлаб чиқариш усталари иштирок этди. Семинар давомида ўқитувчилар кичик гуруҳларда ишлаш, ролли ўйинлар, муҳокамалар орқали интерфаол ёндашув методикасини ўрганишди ва амалиётда синаб кўришди.
Дарсларни стимуляция ўйинлари асосида ташкил этиш ўқувчиларни жараёнга жалб қилиш ва уларнинг қизиқишини ошириш билан бирга ноанъанавий фикрлаш ва муаммоларни ҳал қилиш кўникмаларини ривожлантиришга хизмат қилади. Ўқувчилар ҳаётий ҳолатлар асосида билимларни қўллашни ўрганади ва реал ҳаётга мослашиш учун зарур тажриба ҳосил қилади. Стимуляция ўйинлари жараёнида ўқувчиларнинг жамоавий иш кўникмалари, мулоқот қилиш қобилиятлари ва ўзаро ёрдамни ривожлантиришга алоҳида эътибор қаратилади. Ушбу ёндашув ҳар бир ўқувчининг қобилиятларига мос вазифаларни бажариш имконини яратади ва билим олиш жараёнини янада қизиқарли қилади.
Семинарда иштирокчилар мазкур ўйинни дарс жараёнида самарали қўллаш бўйича амалий тавсияларга ега бўлишди. Ўйин жараёнида ўқувчиларга ёрдам бериш, уларга муаммоларни ҳал қилиш стратегияларини тушунтириш ва натижаларни таҳлил қилиш бўйича батафсил кўрсатмалар берилди. Шу билан бирга, ўйин давомида ўқувчиларнинг билим даражаси ва заиф томонларини аниқлаш имконияти яратилади. Бу ёндашув муваффақиятга эришиш ҳиссини оширади ва таълим жараёнини самарали ҳамда ижодий руҳда ташкил етишга ёрдам беради.
Замонавий технологиялар ва интерфаол методларнинг таълим жараёнига жорий қилиниши ёш авлодни иқтисодий эркинликка, ижодий фикрлашга ва тадбиркорликка рағбатлантиришда муҳим қадам бўлиб хизмат қилади. Шу каби лойиҳалар нафақат ўқувчиларнинг шахсий муваффақиятига, балки жамиятнинг иқтисодий ўсишига ҳам улкан ҳисса қўшади.
Гулара Жуманиязова, Амударё туман 2-сон политехникуми бизнес асослари фани ўқитувчиси
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
