48-СОНЛИ МАКТАБНИНГ ЯНГИ БИНОСИ ФОЙДАЛАНИШГА ТОПШИРИЛДИ

Таълим-тарбияга эътибор кучли бўлган жамият аъзолари юксак маънавиятли, шу билан бирга илғор фикрли, илм-у маърифатнинг қадр-қимматини ҳамма нарсадан устун қўйгувчи шахслар сифатида шаклланадилар, ўсиб келаётган ёш авлоднинг чуқур билим олишларини таъминлаш мақсадида фидойилик кўрсатадилар. Мамлакатимизда таълим тизимига қаратилаётган эътибор ва изчиллик билан амалга оширилаётган ислоҳотлар мазмун-моҳиятида ҳам, энг аввало, Янги Ўзбекистоннинг янги авлодларини баркамол ва етук инсонлар қилиб вояга етказиш орқали жамиятимизни янада тараққий эттиришдек эзгу мақсадлар мужассам. Бу таълим-тарбия соҳасини дунё андозаларига мутаносиб равишда ривожлантириш, соҳанинг моддий техник таъминотини яхшилаш, муассасаларни энг сўнгги русумдаги таълим технологиялари билан жиҳозлашга қаратилган амалий чора-тадбирларда ўз ифодасини топмоқда.

Амударё туманида ҳам давлатимиз томонидан қаратилаётган ана шундай эътибор ва рағбат туфайли таълим муассасаларининг моддий-техник таъминоти йил сайин яхшиланиб бормоқда. Хусусан, сўнгги йилларда тумандаги бир нечта умумтаълим мактабларида жорий таъмирлаш ва реконструкция ишлари олиб борилди. Биргина 2024-2025 ўқув йилида 35-, 31- сонли умумтаълим мактаблари учун қўшимча бинолар қуриб берилди, бир нечта мактабларда жорий таъмирлаш ишлари амалга оширилди. Мазкур таълим муассасаларининг янгидан қурилган қўшимча биноларида айни пайтда ўқувчилар замонавий шароитларда билим олишмоқда.

Бундан 50 йил аввал – 1975 йилда, ўша давр талабларидан келиб чиқиб, 190 ўқувчи ўрнига мўлжаллаб бунёд этилган 48-сонли умумтаълим мактабида айни пайтда 423 нафар ўқувчи таълим олишади. Ўқувчиларга замон талаблари даражасида таълим-тарбия бериш учун зарур шароит яратиш мақсадида мазкур таълим муассасасига ҳам қўшимча бино қурилиши давлат дастурига киритилди ва 4 млрд 706 млн. сўм маблағ ажратилди.

“JUMURTOV TEX TAʼMIR SERVISʼ МЧЖ қурувчилари томонидан бунёд этилган мактабнинг 240 ўринли янги қўшимча биносида замонавий спорт анжомлари билан жиҳозланган 12га 24 метр ўлчамдаги спорт зали, тўлиқ компьютер жамланмалари билан таъминланган 1та синфхона, 2та электрон доска, 60 ўринли ошхона мавжуд бўлиб, янги бинонинг барча синф хоналари янги парталар, стол-стуллар доскалар билан жиҳозланган.

Жорий йилнинг 11 февраль санасида Жумуровул маҳалласида қад ростлаган мактабнинг янги қўшимча биносини фойдаланишга топширишга бағишланган маросим бўлиб ўтди. Унда Амударё тумани ҳокимининг биринчи ўринбосари Фахриддин Юсупов, ҳоким ўринбосари Нодирбек Камолов, туман Мактабгача ва мактаб таълими бўлими мудири Ялғаш Шамуратов, шунингдек, мазкур мактаб педагогика жамоаси, овул нуронийлари иштирок этишди.

Мактабнинг янги биносини фойдаланишга топширишга бағишланган тадбирни Амударё тумани ҳокимининг биринчи ўринбосари Фахриддин Юсупов очди ва мактаб педагогика жамоасини ҳамда ўқувчи-ёшларни замонавий талаблар асосида барпо этилган янги ўқув маскани билан табриклади. Шу билан бирга мактаб педагогика жамоасининг давлатимиз ғамхўрлигига муносиб равишда фаолият олиб боришларида муваффақиятлар тилади.

Шунингдек, тадбирда сўзга чиққанлар давлатимиз томонидан таълим тизимига қаратилаётган эътибор ва амалга оширилаётган кенг кўламли ислоҳотлар туфайли бугунги авлод ёшлари орасида билимдон, юксак салоҳиятли ва интилувчан ўқувчилар сафи ошиб бораётганини алоҳида таъкидлаб, 48-сонли мактаб битирувчиларининг ҳам олий ўқув юртларига ўқишга кириш кўрсаткичлари қувонарли эканлигини қайд этдилар ва мактаб қурилишини сифатли амалга оширган бунёдкорларга чин дилдан миннатдорчилик билдирдилар.

Тадбир давомида “JUMURTOV TEX TAʼMIR SERVIS” МЧЖ раҳбари Акбар Таиров мактаб директори Ўктам Қўшназаровга янгидан бунёд этилган мактаб биносининг рамзий калитини топширди.

Шундан сўнг тадбир иштирокчилари ўқув муассасасининг янги биносида яратилган шарт-шароитлар билан яқиндан танишдилар ва қўли гул қурувчилар томонидан барча ишлар сифатли амалга оширилганини алоҳида эътироф этдилар.

Шу куннинг ўзида мактаб ўқувчилари устозлари раҳбарлигида янги бинода дарс машғулотларини бошлаб юбордилар.

РОБИЯ ЙЎЛДОШЕВА.