Рингда фақатгина кучлилар ва чидамлиларгина ғалаба қозонади

“Бокс – ҳаётдек: баъзида қаттиқ зарбалар қабул қилишга тўғри келади, лекин олдинга интилиш керак”, деган эди замондош спортчилардан бири. Дарҳақиқат, спортда нафақат бокс, балки бошқа спорт турларининг ҳам ўзига яраша мураккаблиги бор. Боиси, ғалаба ўз-ўзидан содир бўлмайди. Муваффақият сени излаб келмайди, уни сен ўзинг излаб боришинг керак. Тинимсиз машғулот, ҳаракат, иштиёқ ва муваффақиятсизликлардан кейин ҳам ортга чекинмаслик спортчини тоблайди.

Сўнгги йилларда юртимизда спортга қаратилаётган эътибор туфайли Амударё элида ҳам ана шундай курашувчан, тиришқоқ, арслонюрак спортчилар етишиб чиқмоқда. Шулардан бири – Сардор Шомуродовдир. Қаҳрамонимиз 2002 йил Амударё туманининг Тўлқин овулида дунёга келади. Болалигидан кучли спортчиларга ҳавас қилиб улғайган бу йигит келажагини айнан спорт соҳасида кўрар эди.

Сардор Шомуродов 12-13 ёшларида Тўлқинда жойлашган бокс залида Азим Мухторов қўл остида бокс билан шуғуллана бошлади. Кейинчалик эса 14 ёшида Нукус Олимпия захиралари спорт коллеж-интернатига ўқишга киради. Ёш боксчининг тинимсиз саъй-ҳаракатлари, ўз устида ишлаши натижасида 2017-2018 йилларда икки карра Ўзбекистон чемпиони ва бир неча Халқаро турнирлар ғолиби бўлди. Шунингдек, 2019 йилда ўқишни муваффақиятли тамомлаб, Андижон шаҳрида ёшлар ўртасида бўлиб ўтган Ўзбекистон чемпионатида фахрли 3-ўринни эгаллаб, Давлат жисмоний тарбия ва спорт университетига имтиёзли равишда ўқишга қабул қилинди.

Сардор 2017-2018 йиллари Ўзбекистон ўсмирлар терма жамоаси аъзоси, 2019-2020 йилларда эса Ўзбекистон ёшлар терма жамоаси аъзоси, ҳозирги кунда Ўзбекистон катталар миллий терма жамоаси аъзоси ҳисобланади. 2019 йилдан бошлаб, Амударё тумани спорт мактаби тренери Жасур Нуримбетов қўл остида мунтазам равишда бокс сир асрорларини ўрганиб, шуғулланиб келмоқда.

Сардор Шомуродовни чинакам омадли спортчилардан бири, дейиш мумкин. Ёш бўлишига қарамасдан, унинг шу пайтга қадар эришган ютуқлари талайгина. Қаҳрамонимиз 2019-2020 йилларда ёшлар ва катталар ўртасида Ўзбекистон чемпионати совриндори, Қозоғистоннинг Олмаота шаҳрида бокс бўйича бўлиб ўтган Халқаро турнир совриндори, Олмалиқ шаҳрида бўлиб ўтган Халқаро турнир финалчиси бўлди ва Ўзбекистон спорт устаси нормативини бажарди. Шунингдек, 2021 йил Сирдарё вилоятида профессионал бокс бўйича ўтказилган жангда 76 кг вазн тоифасида ғалаба қозонди. 2022 йилда олий таълим муассасасини битириб, ҳозирги кунда Амударё туман спорт мактабида бокс бўйича мураббийлик қилиб келмоқда. Айни дамда ёш спортчимиз Жасур Нуримбетов каби қобилиятли устозига шогирд сифатида кўпгина мусобақаларда ғалаба қозониб келмоқда. Ўз навбатида у ҳам кўпгина шогирдларга устоздир.

Сардор Шомуродов учун ўтган йил ҳам, бу йил ҳам омадли келди. 2024 йилда катталар ўртасида ўтказилган Ўзбекистон чемпионатида фахрли 3-ўринни эгаллаб, Ўзбекистон Миллий терма жамоасига қабул қилинди ҳамда апрель ойида Қирғизистонинг Бишкек шаҳрида бўлиб ўтган Халқаро турнирда фахрли 3-ўринни эгаллади. Бу билан чекланиб қолмасдан, шу йили Қозоғистон Республикасининг Ақтау шаҳрида бўлиб ўтган Халқаро турнирда фахрли 2-ўринни эгаллаб, ушбу мусобақанинг “Энг яхши боксчиси” дея эътироф этилди ва тақдирланди. Шунингдек, 2024 йилнинг декабрь ойида Ўзбекистон Бокс федерацияси Қорақалпоғистон Республикаси бўлими томонидан “Йилнинг энг яхши боксчиси” деб топилди.

Ҳа, интилганга толе ёр, дея шуни айтишса керак. Бир муваффақият бошқа бир муваффақиятни етаклаб келади, дегани бежизга эмас. Бу йил ҳам спортчимиз учун омадли бошланди. Яқиндагина Нукус шаҳрида спортчи ёшлар ва спорт федерацияларини тақдирлаш маросимида Сардор Шомуродов “Йилнинг энг яхши спортчиси” деб топилиб, Қорақалпоғистон Республикаси Спорт вазирлиги томонидан муносиб тақдирланди.

У ҳозирги кунда Ўзбекистон Миллий терма жамоаси аъзоси, ҳар ойда Ангрен шаҳар Янгиобод спорт базасида олимпиада чемпионлари бўлмиш Баҳодир Жалолов, Ҳасанбой Дўсматов каби спортчилар билан биргаликда ўқув-йиғин машғулотларида иштирок этиб келмоқда. Айни дамларда спортчи ҳаваскор бокс билан профессионал боксни уйғунлаштиришни режалаштирмоқда. Шунингдек, ҳозирда устози билан бирга май ойида Остонада бўлиб ўтадиган жаҳон чемпионатига қатнашиб, ғолиб бўлишни мақсад қилиб, бу мақсад йўлида қизғин тайёргарлик кўрмоқда.

Биз эса, фахримиз бўлган Сардорбекка режалаштираётган эзгу ишларида толе ёр бўлишини тилаймиз.

Азиза Мадраҳимова