МТТЛАРДА ФАОЛИЯТ ЮРИТАЁТГАН ПЕДАГОГЛАРНИ ЯНГИ ДАСТУР БИЛАН ИШЛАШГА ЎРГАТИШ БЎЙИЧА СЕМИНАР-ЎҚУВ МАШҒУЛОТЛАРИ ОЛИБ БОРИЛМОҚДА

Боланинг билим, малака ва қадриятлари ҳаётий вазиятларда катталар ва тенгдошлари билан мулоқотда ахлоқ қоидалари ва меъёрларига риоя қилган ҳолда ўзини тутиш маҳорати орқали ривожланиб боради. Бунда мактабгача таълим ташкилотларида амалга ошириладиган таълимий ва тарбиявий дастурларнинг аҳамияти катта. Айниқса, 6-7 ёшдаги боланинг мулоқот воситаларидан турли вазиятларда фойдаланиш кўникмасини шакллантириб боришда турли ўйин-машғулотлари, самимий мулоқот қилиш усуллари, атроф муҳитни онгли равишда идрок қилиш ва уни амалда қўллаш   кўникмалари, шунингдек, жисмоний, ижтимоий-ҳиссий, нутқ, мулоқот, ўқиш, ёзиш малакалари, ўз ёшига мутаносиб равишда соғлом турмуш тарзи  меъёрларига мослашиши уни ўз ҳаракатларини  ҳиссиёт ва сезги органлари  ёрдамида бошқаришга, шахсий гигиена қоидаларига амал қилишга ўргатади.  Шу жиҳатдан олиб қараганда мактабгача таълим ташкилоти педагоглари ўз билим ва малакаларини доимий равишда ошириб боришлари, бола дунёқарашини боғча ёшиданоқ тўғри шакллантиришда инновацион  усулларни қўллаш малакасига эга бўлишлари  зарур. Бу борада Амударё туман Мактабгача ва мактаб таълими бўлими томонидан тизимли ишлар амалга оширилмоқда.

Хусусан, Ўзбекистон Республикаси мактабгача ва мактаб таълими вазирлигининг 2025 йил 17 июндаги "Мактабгача таълим ташкилотларида фаолият юритаётган педагогларни янги дастур билан ишлашга ўргатиш бўйича қисқа муддатли  ўқув қурси ташкил этиш ҳақида" ги 200-сонли буйруғига асосан мактабгача таълим ташкилотларида педагог кадрларни янги дастурлар билан ишлашга ўргатиш бўйича июнь-август ойларида каскад усулида қисқа муддатли семинар-ўқув курси  ташкил этилиб, мазкур ўқув курси орқали МТТларда фаолият олиб борувчи тарбиячи-педагогларни  янги дастур бўйича ўқитиш ишлари олиб борилмоқда.

Мазкур ўқув семинар-ўқув курсининг 1-босқич машғулотлари жорий йилнинг 24-26-июнь кунлари Мактабгача таълим ташкилотлари директор ва мутахассисларини қайта тайёрлаш ва уларнинг малакасини ошириш институти (Мактабгача таълим институти) профессор-ўқитувчилари томонидан амалга оширилиб, ушбу машғулотларда мастер-тренерлар ўқитилди. 30 июнь-2 июль кунлари бўлиб ўтган ўқув курсининг 2-босқич машғулотлари Мактабгача таълим институти, Қорақалпоғистон Республикаси ва вилоятлар педагогик маҳорат марказларида ўтказилди ва унда мастер-тренерлар томонидан тренер-менторлар ўқитилди.

Айни пайтда ўқув курсининг 3-босқич машғулотлари муваффақиятли тарзда олиб борилмоқда. Ўқув режасига кўра, 4-8 июль кунларида ўтказилаётган мазкур машғулотлар таянч мактабгача таълим ташкилотларида тренер-менторлар томонидан давлат мактабгача таълим ташкилотларининг директор ўринбосарлари (директорлари)нинг малакалари оширилмоқда.

Жорий йилнинг 9 июль – 29 август кунларида  давлат мактабгача таълим ташкилотларида  ўтказиладиган ўқув машғулотларида МТТ директор ўринбосарлари (директорлар) томонидан тарбиячи-педагоглар ўқитилади.

Амударё тумани ММТБга қарашли 5-сонли таянч давлат мактабгача таълим ташкилотида 4-8 июль кунлари учун белгиланган ўқув-режаси асосида  тренер-ментор Гулчеҳра Юлдашева томонидан давлат мактабгача таълим ташкилотларининг директор ўринбосарлари  ва директорларини ўқитиш ишлари  қизиқарли савол-жавоблар, инновацион  услублар асосида   олиб борилмоқда.

Машғулотлар жараёнида ўқув курси иштирокчиларига тренер-ментор Гулчеҳра Юлдашева замонавий таълим дастурларига  киришда Сингапур тренер-таълим моделини тавсия қилиш орқали боланинг интеллектуал ривожланишида муҳим аҳамиятга эга бўлган  компетенциялар, жумладан, мулоқот воситаларидан турли вазиятларда фойдаланиш кўникмаси, ўйин ва ўйиндан ташқарида тажриба ва билим кўникмаларидан  ижтимоий фойдаланиш, боланинг ахлоқий маҳорати, атроф оламни онгли равишда идрок этиш ва уни амалда қўллаш, ижтимоий-ҳиссий, нутқ, мулоқот, ўқиш, ёзиш  кўникмалари, билиш жараёнининг ижодий ривожланиши юзасидан  қизиқарли ва ҳаётий  тажрибалар мажмуини тақдим этди.

Дарвоқе, замонавий таълим дастурларига кўра, Сингапур таълим модели PISA каби халқаро баҳолаш тизимларида юқори ўринларда туради. Дастурнинг натижавийлиги шундаки, мантиқий ва мустақил фикрлашга, муаммоли вазиятларни ҳал қилишга урғу беради. Айниқса, Marshal   Cavendish Eduсation (МCE) дастурлари замонавий таълим ёндашувларини ўрганишга бағишланган. Халқаро стандартларга асосланган дастурларнинг моҳияти ва уларни маҳаллий таълим тизимига интеграция қилиш йўлларини кўриб чиқиш бугунги куннинг долзарб вазифасидир.

Тренер-ментор  Гулчеҳра Юлдашева семинар-ўқув курси  машғулотларида  мактабгача таълим ташкилотлари директор ўринбосарларини STEM дастури, Kinder Thinkers,  Bigeye Tots, Primary Mathematiks Grade K  дастурлари ва энг   замонавий таълим дастурлари билан муфассал таништириб, ушбу таълим дастурларини амалиётга жорий этиш  бўйича зарур тушунча ва тавсиялар бериб  бормоқда.

Семинар-ўқув курси машғулотлари муваффақиятли тарзда давом этмоқда ва унда туман Мактабгача ва мактаб таълими бўлими тасарруфидаги МТТлар, нодавлат  ҳамда давлат хусусий шериклик асосида фаолият олиб борувчи  муассасаларнинг директорлари, директор ўринбосарлари ва тарбиячи-педагоглари замонавий таълим дастурларини амалиётга жорий этиш бўйича ўз билим ва малакаларини оширмоқдалар.                                                                                                   

РОБИЯ ЙЎЛДОШЕВА.